il Chardun

revista  rumantscha independenta

CH - 7559 Tschlin

fon 081 866 36 76

IBAN CH

01/2015

Il pü ot bain                

 

A nun es simpel dad imsürer il bainster ma que as po fer conguels. Uschè as ho pudieu ler d’incuort, cha daspö l’an 2000 nu saja creschieu il BIP i’ls centers turistics uschè ferm scu illa media svizra. La differenza fascha our 13%, la differenza in conguel culs centers urbans saja auncha pü granda. Cha que saja dramatic, illas regiuns alpinas sajan las vistas per l’avegnir sombras scha nu’s fatscha qualchosa cunter. A nu s’ho perô pudieu ler inüngiur cha las regiuns alpinas dispuonan da valuors natürelas chi maunchan illas citeds,

Per il nouv concept dal spazi (Raumkonzept) dal chantun Grischun, il quêl es gnieu elavuro cun agüd da bgeras rapreschantantas e rapreschantants da la politica e da differentas instituziuns es la prosperited e’l bainster da las regiuns l’aspet il pü important. L’importanza da la natüra e da la cuntredgia vain adüna darcho menziuneda i’l conzept dal spazi scu motor dal turissem. Il scopo da la natüra unica saja in prüma lingia dad implir ils lets dals giasts. Ün conzept regiunel chi dess musser sü la qualited da viver per l’avegnir per tuot ils abitants vess però da metter otras prioriteds: la natüra nun es be la fundamainta economica dimpresè la fundamainta vitela.

Tal workshop chi vaiva da svilupper il nouv conzept dal spazi esa gnieu pruvo da der importanza eir al „mantegner la biodiversited“ u da fixer aint il concept dal spazi eir ils territoris chi tuochan daspö cuort temp tal BLN, l’inventar federel da cuntredgias e monumaints da la natüra. Quist intent nun ho chatto l’incletta dals respunsabels pel concept dal spazi.

Per menziuner ils territoris dad importanza naziunela saja il nivel chantunel dal concept dal spazi memma ot, ho que gieu nom sün dumanda. Quelo significha, cha’l nivel chantunel es pü ot cu il nivel naziunel i’l quel vegnan definieus ils territoris protets. Il cussagl federel ho promulgo üna strategia davart la biodiversited. In quella strategia vegnan formulos böts fich concis per mantegner nossa fundamainta natürela e sia diversited multifaria. Per ragiundscher quists böt druvess que eir concepts chi resguardan la natüra. Ils aspets economics e’ls aspets dal trafic cuntradischan al giavüsch da mantegner la cuntredgia e la natüra. Quist conflict vain almain menziuno aint il concept dal spazi culs pleds „Finden der Balance zwischen Schutz und Nutzung“. La sfida la pü importanta füss steda, da concretiser quists conflicts. Be scha’s lascha valair l’importanza da la natüra, chi nu po gnir definida be in möd economic, survain la natüra sia valur cunvgnainta. La natüra scu tela stu gnir mantgnida.

 

Il speciel da l’homo sapiens es sia granda capacited intellectuela. El ho l’abilted da vzair e dad interpreter sieu egen svilup e cun que da güdicher sieu fer cun tuot sias conseguenzas. Grazcha a quistas abilteds vess el dad esser capabel da realiser, cha la qualited da viver es per l‘avegnir pü importanta cu la prosperited economica e’l bainster. La natüra nun es be importanta e preziusa, ella es il bain il pü ot cha nus vains.

 

David Jenny