il Chardun

revista  rumantscha independenta

CH - 7559 Tschlin

fon 081 866 36 76

IBAN CH

01/2015

Scha’d essans già tal tema          

 

Vais eir già vis il bel büro da nossa chascha d’amalos. Trais posts da lavur cun telefons, computers e tuot que chi tuocha tiers. Bella mobiglia moderna e chadregias comfortablas pels cliaint. Baininclet, per üna vschinauncha da var trajamilli abitants. Cun spetter aint in quel büro m’es gnida adimmaint la situaziun dals ans sessaunta da l’ultim secul. Ün hom pü vegl, prubabelmaing pensiuno, mnaiva la chascha d’amalos locala in sia egna stüva. Nossa vschinauncha vaiva quella vouta var 7‘000 abitants. Sün üna curuna vaiva’l ils ordinaturs, sün maisa la Hermes Baby. Uras da büro eiran il mardi e la gövgia saira, adüna da las 18.30 fin a las 20.00. A’s stuvaiva ir la saira a’s lascher der ils formulers necessaris per la persuna amaleda ed a dumander cussagl.

Scha’d essans già tal tema chaschas d’amalos:

D’incuort d’heja vis üna statistica chi muossa qualchosa interessant. Mincha umaun drouva ils meidis, ils ospidels e’ls medicamaints il pü ferm düraunt ils ultims quatter ans da sia vita. A nu dependa scha quist umaun moura cun quaraunta u cun ochaunta ans, adüna chaschunan ils ultims quatter ans da la vita d’ün umaun ils pü grands cuosts per las chaschas d’amalos.

Vairamaing es que logic. Ün umaun chi ho sur nonaunta ans es sgür e tschert sto ün umaun fich saun, uschinà füss el già dalönch mort. Quel umaun nun ho druvo bgers medicamaints e meidis ed ospidels. El ho pajo sias premgias vita düraunta e pü vegl ch’el es gnieu e pü otas premgias ch’el ho pajo. Custieu nun ho el dapü a la chascha d’amalos cu ün umaun mort cun quaraunta ans.

Perche ho que adüna nom, cha’ls cuosts da las chaschas d’amalos s’augmaintan causa cha’ls umauns vegnan adüna pü vegls?

 

Baldina