il Chardun

revista  rumantscha independenta

CH - 7559 Tschlin

fon 081 866 36 76

IBAN CH

02/2015

Don’t do IT

Impiegher infra trais ans 20 differents vendeders a prouva – don’t do IT!Eviter persunas cun qualificaziuns i’l mister per ils pudair tgnair suot: don’t do IT! Eviter dad impiegher Svizzers per pudair der pejas da l’Italia: don’t do IT.

Ma in Bregaglia ho que nom: DO IT!

 

 

 

Ed üngün nu disch ünguotta!

Già algua la naiv, las sfessas i’l catram sül pass s’evran scu minch’an. Esa propi vaira cha nu do üna qualited da catram chi resista e chi nu pretenda cha vias stöglian gnir sanedas mincha duos ans? Chi survain la carica da fer las vias? Chi tscherna la megldr’offerta? Vain resguardeda la megldra qualited dal materiel? Fintaunt cha’s tratta da vias dal Chantun nu disch üngün ünguotta, scu scha que nu füssan nos raps! Ma chi chüra las vias d’inviern e da sted? Que sun ils stradins diligiaints! Ma grazcha per lur impegn, nu disch mê üngün - eir que es fos! Dimena a tuot ils stradins: Grazcha fich in nom da tuots!

 

 

 

Adonta cha…

La Corporaziun Energia Engiadina ho do cuntribuziuns da 0,5 milliuns per cultura e sport adonta cha…

Üngün adonta cha, la populaziun nu po schmancher cha las ouvras haun be survgnieu ils drets dad ütiliser l’ova da l’En pervi da quista cundiziun: 5% dal guadagn per cultura. Scriptuors ed oters idealists haun cumbattieu quella vouta per eviter cha l’En gnia privo da si’orma, al chanalisand  e violand per la producziun dad energia. Bgeras bellas poesias chi dechauntan l’En scu orma da la val, avaina viva da nossa patria, simbol per nossa cultura chi vain violeda e vendida. Zieva lungias discussiuns e trattativas as vaiva stabilieu l’accord dals 5%. Ma cura e chi ho invento cha quels raps sajan eir per sport?  Perche sun tuots d’accord cha quels raps vegnan druvos per progets cha’l maun public vess da finanzier? Stè attends e nu schmanchè per che scopo cha’ls raps d’eiran predestinos: Lingua e cultura!
Adonta cha tuots acceptan hoz la producziun d’energia cull’ova da l’En, nu pudains schmancher cha la cultura ho merito quels raps ed ad es ün oblig da’ls der, sainza ma e scha e sainza “adonta cha…”

 

 

 

Peschs impedeschan da sortir da la producziun da l’energia atomara

Ils peschs sun la cuolpa cha guadagnains damain conferman tuot las ouvras idraulicas in Grischun! Püssas vschinaunchas concessiunarias vöglian fer plaunt ed abolir la ledscha federela per proteger las ovas. A nun es auncha cler scha la Confederaziun surpiglia la perdita chaschuneda tres quellas prescriziuns. Ma in Grischun as d’eira proactiv. In üna prüma prouva as vaiva pudieu eliminer cun success tuot la populaziun da peschs in ün flüm laterel. Quista metoda d’eira gnida sviluppeda in collavuraziun dal Livigno e da Zernez üna collavuraziun sur cunfin; ün proget chi imprometta. Sainza peschs – üngün’ova restanta! Damain ova restanta, dapü entredgias! Uschè simpel es il problem.

 

 

 

Il luf e’ls set nanins faun radio

A d’eira üna vouta illas muntagnas blovas, d’inuonder gnivan giò las ovas üna dumanda per üna concessiun da radio. Uschè es naschieu il radio Piz. A vaivan survgnieu il dret dad emetter, scha realiseschan üna pertschientuela prescritta, ma modesta, in lingua rumauntscha. Cur cha’l figl d’eira mort zieva pochs ans ho’l surdo il bain a sieu bap e quel ho müdo tuot ed ad es naschieu il Radio Grischa, ohni romanisch, mier siind doch nid blöd! E cur cha’l bap es mort ho’l luf surpiglio l’affer e voul uossa fer il Radio Südostschweiz. Ed uossa fo la famiglia da somedia üna granda festa. Nu crajast? A rapportan las giazettas, la plattafuorma online, la Televisiun Südostschweiz ed a sotaron e faun festa e faira cun tuots. Tadlè be il radio Südostschweiz scha nu crajais! Wer isch denn do blöd?

 

abuob