il Chardun

revista  rumantscha independenta

CH - 7559 Tschlin

fon 081 866 36 76

IBAN CH

02/2015

Saivs sun la soluziun!            

 

Soo, uossa finelmaing dess gnir fatta intuorn la plazza aviatica da Samedan üna saiv. A d‘eira però eir ura! Quista idea geniela vess gieu da gnir realiseda già dalönch inno. Al trafic da cuntrabanda exagero esa tuottüna da trer no il schlöp. Uossa finelmaing saron passos ils temps cha tips dubius saglivan our dals  Lear-Jets güsta plachos, suot bratsch ün sach cun schals fats our da launa dad antilopas dal Tibet e vi e davent vers Gravatscha. Hai, ed eir pervi da la sgürezza as po esser pü cu schligerieu. Pensè be, muongias spassegiaivan pera sülla pista dals aviuns causa ch’ellas as sentivan pü daspera al tschêl!.

La charn da las trimmas dal raz dad Angus saja steda ruineda e na pü mangiabla causa cha las trimmas angusas hegian clappo ün schoc terribel cur cha pilots hegian gieu da der gas e strer intuorn l’ultim mumaint il guvernagl da lur aviun chi vess vairamaing gieu da‘s placher. Ils sgraffels da las cornas da las trimmas angusas eiran pera fich bain visibels vi dal butatsch da l’aviun. Uossa esa a fin cun trimmas chi vaun a spass sülla pista, per furtüna!

Eir la valur simbolica d’üna simila saiv nun es da suotstimer. A penser per exaimpel vi dal mür da Berlin cun sia forza politica explosiva. Ok, lo es que sto pütost il strer davent il mür chi ho chaschuno ün‘extasa d’allegria, ma que es oramai be ün detagl. Eriger saivs es da princip üna buna roba chi pissera per situaziuns cleras: D’üna vart las limusinas da potentats solvents, tar nus fich bainvis, da l’otra vart las trimmas dal raz Angus, ils tschiervs e quels spassagiunzs naïvs.

Cler, üna simila saiv nu daletta güsta als ögls. Ma congualo cun las millieras d‘avantags stu la protecziun da la cuntredgia per üna vouta avair il saun güdizi da fer concessiuns. A vo tuottüna per la liaungia!

 

D. Jenny

 

Ingiuvinera: Che nu tuorna tar quist text?

Resposta: (cumanzer a leger davousvart) Sanroc nuah nun sugna dad zar lad sammirt.