il Chardun

revista  rumantscha independenta

CH - 7559 Tschlin

fon 081 866 36 76

IBAN CH

02/2015

cumgià – (da la satira)           

 

Satira es ün gener d’art (literatura, carraicatura, film), chi critichescha cun exageraziun, ironia e schnöss mordaint persunas ed evenimaints. La satira sacrifichescha circunstanzas da möd ridicul cun viz rigurus (citat dal Duden). Il glistess böt perseguitescha in tscherts lös il tschütschaiver.

 

Daspö ün pêr decennis chüra il Chardun la satira sül chomp da la lingua rumantscha. Il prüm in fuorma d’üna giazetta respectiv d’ün quadernet, davo in fuorma electronica. Plü bod d’eira quai alch sco ün’instituziun. Quai es passà. Hozindi regna l’indifferenza, ün dals gronds problems moderns da nossa società! “Il Chardun nun es plü satira” as doda bler, scha quai va per la s-chüsa, da na plü s’interessar pel Chardun.

 

Da la satira vain hoz bler fat abüs. Ün bun exaimpel es la giazetta “Charlie Hebdo”. Fich populistic ha quista giazetta profità da la fobia generala da l’Islam. Las carricaturas chi prouvan da trar a Mohammed i’l ridicul sun plütost spuizi sco satira. E davo la terribla reacziun dals Islamists radicals vess la satira tuot dandet dad esser populara.

 

La satira dal Chardun nun es e nu d’eira mai populistica. E quai nun es sco chi para plü popular. Satira es ün “gener d’art”. Ma quist art svanischa. I regna l’indifferenza. Invezza vess l’umur da tour il suraman. Co oter as voula supportar uschinà il gir dal muond?

 

Ün grond maister da la satira d’eira sainzoter Charlie Chaplin. Per el d’eira dafatta la guerra ün tema da satira. El ha demascrà ils agitadurs da guerra sco persunas tragic-ridiculas e tras quai retrat totalmaing la legitimaziun per l’ur agir absolut inuman.

 

E quai es mia devisa per l’uscheditta terza part da mia vita: Na perder l’umur, vzair il muond e la società sco ch’ella as preschainta: Sco satira. In quel sen piglia uossa cumgià da mias lecturas e dals lecturs dal Chardun. A buna ans vair i’l muond da la satira!

 

CASA