il Chardun

revista  rumantscha independenta

CH - 7559 Tschlin

fon 081 866 36 76

IBAN CH

1/1

03/2015

Adieu Chardun                   

 

„Je suis Char...dun!“, m’es gnieu adimmaint spontanamaing cur cha sun gnida a savair cha’l Chardun do sü il spiert. L’uonda da solidarited „Je suis Charlie!“, chi’d ho inundo l’Europa e’l muond inter zieva la mort dad ündesch caricaturists ed ün pulizist frances in schner da quist an, m’ho do da stüdger. Che sen ho satira, am d’heja dumandeda. Quaunt inavaunt po’la ir? Inua glivra il dret a la libr’expressiun ed inua cumainza il dovair al respet reciproc? Nus vains bger discuto la fatschenda traunter schurnalists e redactuors. Gnieus nun essans ad ünguotta. Ils üns chattan cha la liberted stetta sur tuot, ils oters sun da l’avis cha respet saja la maxima. Che ch’eau pens? A me fo tuot quista bigottaria ster stutta. Quist discurröz da liberted e drets e güstia e democrazia... Blablabla! Democrazia vela al pü da tuot per persunas alvas cun ün tschert pais politic ed economic. Tuot il rest – ils mellans, brüns, nairs, cotschens ed alvs fallos – haun poch da dir ed auncha main da rir. Crajais ch’eau exagerescha? Schi cu esa pussibel cha milliuns d’Indiauns pateschan fam, intaunt cha sün lur champs creschan tonnas da ris? Precis! Perche cha quel stu gnir exporto vers l’Occidaint. Per cha nus democrats hegians üna schelta da ris adequata a nos stil da viver democratic, liber e sten güst. Ed alura tuot quist tam-tam cun la liberted d’expressiun. Essas vairamaing libers da dir che cha pensais? Fè la prouva. Sü, dai! Dschè damaun a vos schef ch’el saja üna foura d’chül. Chi so quaunt lönch cha vossa carriera professiunela düra auncha... Satira sdarlossa, squassa, sdasda. Satira diverta, agita, provochescha. Fin a la mort da las voutas. Ed alura? As müda qualchosa? Na propi. Per müder il muond stöglian seguir fats als pleds. Per cha’l muond dvainta pü güst, liber e democratic stuvainsa inscuntrer a noss conumauns cun respet, saun inclet e charited. Uossa cha’l Chardun moura, pudessans realiser pass per pass que cha vains predgio i’ls ultims ans scrivand satira: Der chüra a nos stupend planet ed a tuot las creatüras chi vivan sün el. Mincha fin es ün cumanzamaint. Üna nouva schanza. Adieu Chardun! Viva il respet. Viva l’amur! 

 

Bettina Secchi-Fluor