1/1

03/2015

Murir e resüster                 

 

Ad ho adüna do divers möds da murir: pustüt in temps pü vegls, schnuaivlas guerras e epidemias mazzaivan bgera glieud e las povras victimas eiran in panica cur cha‘s approsmaivan quels cataclysems. Sgür il möd il pü nosch da murir.

A l’oter extrem ho que adüna do, daspö ils filosofs da l’antiquited, quels chi s’approsmainvan calmamaing ad ün destin inevitabel e murivain serains i’l circul da lur famiglia e da lur amihs. Que daiva eir crastiauns chi s’allegraivan dad ir sü in tschêl zieva üna vita implida da pieted, eir scha vaivan da gnir mazzos da beschas sulvedgias nel circus da la cited.

Auncha oters, victimas dad accidaints imprevisibels murivan sainza bod s’inaccordscher. Hoz do que glieud chi voul murir per eviter duluors maladivlas.

I’l muond vegetal do que morts natürelas da plauntas chi seguan lur möd individuel da crescher e da’s sdasder l’an zieva. Il chardun offra la particularited d’avair il pü bel aspet d’utuorn, zieva esser già fisicamaing mort in sias föglias chi pizchan, ma da renascher la sted zieva per furmer novas föglias e spias.

Nos Chardun es eir sto ün da quels chi daiva inavaunt sias squittedas schabain cha nus avains pudieu constater zieva ün tschert temp cha ils lectuors da la web-page dvantaivan adüna pü pochs. Eiran els dvantos stüffis da nossas glossas u avaivane dafatta temma da nos pizchs ?

In il cudesch da Reto Caratsch „Il comissari da la cravatta verda“ conguela l’autur il destin dal rumantsch cun la vita da la mattetta Ursina chi dvainta mamma e nona. „Intuorn l’an 2020 muriro’la e cun ella insembel eir sia lingua materna. Ils sains da funarel plandscharon la fin da l’Engiadina, dal pajais da nos cour, da quel chi vaiva fat chosas grandas e bellas. Ura d’partenza, ura d’cumgio. Laschè ch’ün sepoula ils morts.“ Ma il destin da quist cudesch chi vain let inavaunt in scoulas e universiteds ans do cuffüert e nossa lingua vegn inavaunt discurrida e scritta in bgers cumüns grischuns.

Il Chardun fo cugnuoscher sia palorma, ma el subsistaro in fuorma virtuela, pront da rivir sias pennas scha dvantess necessari d’uzzer la vusch cunter spierts vargugnus e manzneders.

 

Claudio Caratsch

il Chardun

revista  rumantscha independenta

CH - 7559 Tschlin

fon 081 866 36 76

IBAN CH