03/2015

Nos ultim Chardun                 

 

Quist es l’ultim Chardun online e l’ultima pagina dal Chardun aint illa Quotidiana. Zieva 11 ans vainsa decis da glivrer cun nossa giazetta umuristica-satirica. Düraunt ans eirans nus da l’avis dad avair var 2500 visitas al mais tar nossa giazetta online. L’an passo vainsa müdo il proveditur e vains stuvieu constater, cha’l numer da las visitas nu’s cunfaiva brichafat cun nossas aspettativas. Scha maunchan ils lectuors nu vela que la paina da fer giazetta.

Nus vains adüna fat gugent quista lavur e’ls collavuratuors nu manchaivan. Prubabelmaing as stuvessa fer üna giazetta pü moderna e pü attractiva. Que füss üna lavur per glieud pü giuvna ingascheda. Nus vains bainschi gieu collavuraturas giuvnas chi scrivaivan propi bain, ellas vaivan oters temas ed ün oter möd da s’exprimer. Ma zieva ün pêr ans haun ellas glivro da collavurer, saja que causa ch’ellas giaivan a stüdger a l’ester u ch’ellas vaivan üna plazza giò la Bassa ed  as  sentivan memma dalöntsch davent per pudair contribuir qualchosa actuel.

Ils respunsabels dal Chardun haun decis da mantegner la homepage dal Chardun www.ilchardun.com. Uschè vainsa la pussibilted da reagir scha bsögn fo e gnir cun üna giazetta online speciela. Eir l’archiv chi cuntegna tuot las contribuziuns dals ultims 11 ans resta activa.

Impü vainsa decis dad edir ün cudesch cun contribuziuns e caricaturas dal Chardun.

La palorma dal Chardun nu suos-cha neir mancher. Quella ho lö sanda, als 17 october a l’hotel Bär/Uors a Zernez cun tschaina, bal e contribuziuns cabarettisticas. Noss lectuors sun invidos amiaivelmaing a quista palorma.

 

Infos ed annunzchas fin als 30 avrigl quia

il Chardun

revista  rumantscha independenta

CH - 7559 Tschlin

fon 081 866 36 76

IBAN CH