il Chardun

revista  rumantscha independenta

CH - 7559 Tschlin

fon 081 866 36 76

IBAN CH

04/2014

Chavriöl süll’autostrada                 

 

Üna comunicaziun da la pulizia: „Attenziun süll’autostrada tanter Cuoira e Domat as rechatta ün chavriöl, ch’els giajan plan in tuottas duos direcziuns.

“Quista indicaziun aint il radio n’haja dodi la bunura avant las ot ed amo üna vouta avant las ot e mez. Pover chavriöl, nun è’l stat bun da far trais sigls e passar surour la saiv. Che mâ ha’l tut a man pü d’üna mezz’ura süll’autostrada? Cuorri sco ün mez nar adüna drett’oura, sper ils autos via chi til gnivan incunter? Chi sa che colonnas cha quai varà dat in quellas uras da rush!

Ma alch simil poja dar eir cun ir cul tren. Taner Murg ed Unterterzen, sper il Laj Rivan s’ha fermà il tren in ün lö tuottafat insolit. El es stat là lönchezzas. Las glüms funcziunaivan amo, i nu mancaiva dunque la forz’electrica. Davo üna mezz’ura s’ha’l planet darcheu miss in muvimaint ma el giaiva be planin. Eir il tren chi ans es gnü incunter viagiaiva sco üna lindorna. Il conductur nu s’ha muossà ed el nun ha neir na infuormà tras l’otpledader. Fin a Walenstadt es il tren i be planin e nus eschan rivats a Cuoria cha nos tren per l’Engiadina eira fingià dalönch innan parti. Davopro eschna listess gnüts infuormats chi d’eiran gnüdas vissas persunas tanter ils binaris in vicinanza da Murg.

Tuot ils maschinists dals trens in quella regiun han survgni il cumand da’s fermar e plü tard da circular sün distanza da vista, per bun rumantsch as dschessa sichtweite. Quels chi han dat il cumand as rechattaivan i’l center da cumand a Kloten. Els nu vaivan üngün’idea scha quellas persunas vaivan fingià traversà ils binaris o na. Chi mâ tils varà avisà chi d'eiran persunas tanter ils binaris?

Plü bod d’eira quai bler plü simpel. Plü bod vess ün impiegà da la staziun da Murg guardà our da fnestra o füss i cul velo davo ils binaris via a verer scha las persunas eiran amo la. Magari vess el constattà cha quai d'eira darcheu üna vouta il Peter e la Karin chi d'eiran massa pultruns dad ir fin aint pro la barriera per traversar ils binaris ed ir a bognar aint il Lai Rivan. Ma quels a Kloten nu pon verer our da fnestra o ir cul velo e la staziun da Murg es oramai deserta.

Plü bod eira tuot bler plü simpel!

 

Baldina