il Chardun

revista  rumantscha independenta

CH - 7559 Tschlin

fon 081 866 36 76

IBAN CH

04/2014

Nussas nun essans fattas our da costas!   

Bettina Secchi-Fluor

 

Ad es apaina passo il temp da Pasqua, inua cha’ls Cristiauns s’algordan cuntschaintamaing da la mort e da la resüstaunza da Gesu. Da las voutas vain la Pasqua celebreda in marz, alura darcho in avrigl e zieva danövmaing in marz. Mieu figl ho bado già cun var set u och ans cha cò qualchosa nu tuorna. La data da la mort da Gesu as müda dad an in an... Cu es que pussibel? – sia dumanda. Que nun es pussibel! – mia resposta. Clerics cristiauns haun fat da tuot per fer passer ils murbins als pajauns e’ls metter a püt üna vouta per tuottas. Our da la festa prümavairila da renaschentscha e fertilited es dimena dvanteda la resüstaunza dal figl da l’unic vaira Dieu. A Nadel capita qualchosa simil. Il retuorn da la „glüsch pajauna“ s’ho transmüdeda illa naschentscha da la „glüsch dal muond cristiauna“. Adüna darcho s’inscuntra a quist fenomen i’l Cristianissem. Quist act da spredsch e violenza invers otras persvasiuns e visiuns. Invers umauns d’otras culturas e culuors. Ed eir invers l’univers feminin. Cu es que pussibel? – mia dumanda. Cu es que pussibel cha güsta las duonnas crajan a tuot quist firlifanz? A la legenda ch’ün unic hom pussaunt hegia creo tschêl e terra e cha daspö quella vouta sajan tuot ils hommens legitimos d’impuoner lur idejas al rest dal muond? Que nun es pussibel! – mia resposta. Nussas nun essans fattas our da costas masculinas. E nussas nun appartgnains al sex debel! A l’incuntrari. Nussas essans fermas. Nussas vains la capacited da der vita. Ad es ura e strasura cha bandunans il reginam da las parevlas patriarchelas e cha protegians finelmaing darcho ils früts da nos sain matern. Our d’amur per las generaziuns venturas e per nos magnific planet!