04/2014

Il chardun electronic - 10 ans               

göri

 

Be quiettin ho chatscho il chardun sias rischs aint il muond electronic avaunt desch ans e flurescha aunch’adüna mais per mais. Haun ils electrons sgüzzo ün miel sias spinas ? U cu esa da’s declarer il resun modest ? Es que forsa uschè cha nossa glieud nun es auncha fich adestra aint il muond electronic e manchainta per quelo dad ir ad observer quista flur exotica ?

Ad es mel güdicher quaunts ögls chi la guardan, a quista flur. Nus savains be quaunts clics ch’ella clappa - e quelo es vair bgers : millis al mais scha nu’m fal. (ca.2'800, la red.) Ma vain clicco be per sbagl sün www.ilchardun.ch? Magari derivan ils clics dals servezzans secrets ? U be da las collavuraturas e collavuratuors chi vaun mincha mumaint darcho a guarder lur bel artichel ? U pudainsa propi fer quint cha’ls clics registros derivan da nossa glieud, congualabla a la glieud chi vaiva a sieus temps abuno il Chardun stampo ?

Eau d’he dit exotic ! Daspö cura es nossa prüveda plaunta spinusa dvanteda exotica in nossa cuntredgia? Daspö ch’ell’es electronica !

Il CHARDUN es propi qualchosa speciel. Eau in mincha cas nu cugnuosch niaunch’ün mez da massa chi s’adatta uschè bain p.ex. al bsögn da la glieud chi es pür vi dal imprender nossa lingua. Inua oter po la lectura, il lectur, ler texts rumauntschs tadland al listess mumaint que ch’ella legia ? Inua vegnan explichos pleds difficils ? Be clicker e già as muossa la traducziun ! Ed artichels cha glieud gnida notiers da la Bassa e chi nu so auncha uschè bain rumauntsch scriva eir pel CHARDUN electronic : Quels artichels pudainsa ler illa lingua originela scu eir illa traducziun rumauntscha!

Sch’eau dess auncha cuors da rumauntsch, schi fessi in mincha cas adöver da quista spüerta unica, apunto bod exotica (e pigliess in quint cha vess da fer ler a mias scolaras, scolars, forsa üna vouta eir ün artichel ün pô insus u al cuntrari forsa dafatta memma spinus per mias delicatas scolaras, scolars !)

Que ch’eau giavüschess al chardun electronic pel avegnir füss : cha dapü glieud as partecipess a discussiuns cha quist mez pussibiltescha, e cha dapü glieud dess rimbomb, saja protestand u saja ludand ils artichels cumparieus.

il Chardun

revista  rumantscha independenta

CH - 7559 Tschlin

fon 081 866 36 76

IBAN CH