il Chardun

revista  rumantscha independenta

CH - 7559 Tschlin

fon 081 866 36 76

IBAN CH

05/2014

La cramarina tirolaisa                  

 

Hoz vegnan be pü telefons, pü bod gniva auncha il viagiatur da Just u la cramarina tirolaisa. A nu rendaro pü dad ir da porta a porta a pruver da vender qualchosa. Pel solit nun es üngün a chesa, tuots vaun a lavurer.  Il telefon es pü pratic. Fich bgers chi lavuran in ün call-center sun esters chi nu saun bain tudas-ch. Sgüra ch'els nu guadagnan bger.

Serrer la porta davaunt il nes d'ün viagiatur nun eira simpel, a's vaiva fadia da gnir liber da quels viagiatuors. Il telefon as po simplamaing pender sü. Ma eau d'he adüna retgnentschas da pender sü be uschè, eau pens cha quels da l'otra vart am schmaladeschan sch’eau pend sü. Perque d'he eau pront ün pêr s-chüsas:

Sch'els vöglian vender ün cuors da computers di eau cha mieu hom/figl/ dschender/abiedi saja informatiker e'm güda adüna. Sch'els vöglian fer müder da la Swisscom ad ün otra firma di eau cha nus hegians nossa vit'intera adüna telefono culla Swisscom e nu vöglians müder, punct. Sch'els vöglian persvader da müder la chascha d'amalos indichesch eau noss'eted. Pel solit pendane sü il telefon sainza dir adieu. Eau nu tils schmaladesch!

Ma uossa d'he eau udieu auncha ün’otra s-chüsa chi pera d'avair l'effet giavüscho, üna s-chüsa ch'eau poss be arcumander a tuots:

“Ich kann nur romanisch!“

 

Baldina