il Chardun

revista  rumantscha independenta

CH - 7559 Tschlin

fon 081 866 36 76

IBAN CH

05/2014

...per at marider hest temp ün’otra vouta   

 

Bgeras da nossas veglias chanzuns populeras quintan dal cordöli da giuvens e giuvnas chi nu pudaivan marider a chi ch’els vulaivan. Bap e mamma pensaivan ch’els sulets savessan chi chi füss ün bun spus o üna dretta spusa. Sch’ella nun eira bella schi almain eir’la benestanta. Ils pochs chi crajaivan d’avair trat la buna büs-cha badaivan zieva ün pêr ans d’ardainta amur cha la tscherna nun eira tuottüna na steda furtüneda. La consequenza es cha bgers giuvens pêrins nu vöglian dafatta pü as marider.

In quels temps pü vegls, avaunt 65 ans, Fortunat a Griatschouls ho publicho üna descripziun da La Renaschentscha dals Patagons. Bgers lectuors da quist cudesch haun scuviert la stretta sumgentscha traunter ils Patagons e'ls Grischuns. L’unica differenza eira cha ils kaziks (ils presidents da tuotta sort) e kukurès (ils cussgliers guvernativs) patagons nun avaivan üna granda influenza sül pövel ch’els vulaivan redscher. Forsa cha quella vouta eira que eir uschè in Grischun.

Hoz vöglian ils signuors da Cuira esser scu bap e mamma dals cumüns chi nu faun inandret. Els pensan ch’ün stöglia marider ils cumüns melscorts chi cumplichan be la lavur dals kukurès d’hozindi. Vuliand als achaser be dalum, schi haune invento la poligamia scu ta'ls pövels islamics u ils abitants da tschertas islas dal Ocean pacific. Ma neir quelo nun pera d’esser il sömmi dals Engiadinais. Vzand cha ün hom ed üna duonna daun gia cò e lo pissers in üna lai, schi impissains che cha que dess cun ündesch insembel in üna tela relaziun. Ils kaciks da Cuoira dischan be: „scha nu fais per cumand schi gnis mis in avuadia e nu pudais pü decider ünguotta .“

Nos kaziks cumünels e quels dal cumön, imbrichos in lur partieus da la kazikeria, nu sun tuottafat decis che fer: scha que dess ün unic cumün d’Engiadin’Ota, schi avessan tredesch kaziks da perder lur plazza. Intaunt pudessan els invezza furmer ün cussagl regiunel sainza members tschernieus dal pövel. Prubabel ch’els chattan ch’üna tela soluziun cunvgniss il melder per els svessa.

Ch’al dianzer porta! Nun essans nus pü buns da fer taschair ils  kaziks e kukurès cha nus tschernins asvessa, scu cha faivans auncha il secul passo ? Nus avains tuottüna üna constituziun dal cumön,  accepteda dal pövel als 21 october 2007 cun pü cu 72% da las vuschs ed appruveda da la regenza grischuna als 11 december 2007 ed auncha üna vouta als 16 avrigl 2013. Perché cha il guvern ho appruvo duos voutas nun es dal tuot cler; saro forza gnieu müdo qualchosa sainza ans dir? Perche nun avess quella pü da valair? Il landamma nu po uossa be bütter quist act constituziunel cullas scuadüras . El es respunsabel da'l fer respetter e la cumischiun da controlla ho da survaglier quista respunsabilited. Dasper la structura regiunela administrativa pudains nus, sün basa da la constituziun, metter ad ir ün cussagl da cumön tschernieu dal pövel.                                      

 

Claudio Caratsch