05/2014

Las guerras chi haun...             

 

...gieu lö daspö la seguonda guerra mundiela haun bod tuottas gieu scu s-chüsa religiun u lingua u tuots duos. Pigliains la guerra chi'ns d'eira il pü daspera: la guerra in Jugoslavia i'ls ans 90 dal tschientiner passo. Ils Serbs cun lur religiun christiaun-ortodoxa, ils Croats scu catolics e'ls Mohamedans dal Cosovo ed eir da Montenegro, e tuots gnivan our apparentamaing bain. A daiva bgers matrimonis masdos, eir amicizchas ed uniuns surour ils cunfins da la religiun.

Dandettamaing s'ho quecò müdo, ad ho do ün'escalaziun incredibla: M'algord da las dispüttas, minchataunt cun puogns e perfin cun armas dafatta traunter ils impiegos chi lavuraivan cò in Svizra e chi fin lo nu vaivan dapü discordia cu oters, anzi a tgnaivan insembel scha que giaiva cunter impiegos dad oters pajais. 

Il conflict dad hoz ill'Ucraina nu pera dad avair la religiun scu s-chüsa pütost la lingua. Lo peran quels da l'ost chi discuorran rüss dad avair temma cha lur lingua - scu eir la glieud svessa chi discuorra quella -  pudess gnir suppressa intaunt cha la glieud chi viva pü i'l vest as fo pissers cuntraris: els haun temma cha'l rüss piglia il suramaun.

Che chosa virulenta cuntegna la religiun e la lingua ch'ella s-choda telmaing  l'anim da nus umauns?  Bain, que nu's tratta mê be da religiun u be da lingua, in vardet as tratta que adüna da pussaunza e da possess. Ma religiun e lingua sun buns da  s-chuder e frizzer sü la glieud e provocher telas escalaziuns cha bod minchün sün via nun es pü bun da discuter dimpersè resguarda a tuots scu adversaris chi nu sun da "sia pasta". Bod minchün as müda dad ün mumaint a l'oter ed es pront da fer guerra! Glieud chi as sentiva pacifista müda e dvainta rabgiusa in üna maniera ch'ella nu's mê savieu figürer aunz.

Eau m'impais cha que as tratta da l'emoziunalited extrema cha religiun e lingua portan in se. Eau poss be m'observer a me stess: Scha'm figür cha gniss scumando in nos pajais da discuorrer rumauntsch reagissi sgrischaivelmaing agressiv - eir sch'eau in temps normels craj dad esser pacifist e cunter  tuot las armas e la forza dal militer.

 E que nu voul niauncha ün scumand, a basta già be dad observer quaunt cha nossa glieud as  s-choda vi dal rumantsch grischun.
Per part eir glieud chi nu s'ho mê interesseda per lingua vo süllas barricadas e s'unescha. Dafatta Sursilvans ed Engiadinais as collian al proidiomatissem, glieud chi nun ho aunz mê pruvo dad incler ils oters idioms maindir da'ls sustegner l'ün a l'oter.

Cun quista constataziun nu vögli pretender cha la glieud da la vart dal RG nu's  s-choda, anzi: Que es apunto classic cha adversaris scu promotuors d'üna tendenza linguistica dvaintan cumbattants e perdan lur möd straffotent u contemplativ apaina cha's saintan attachos.

 

göri

 

 

 

il Chardun

revista  rumantscha independenta

CH - 7559 Tschlin

fon 081 866 36 76

IBAN CH