05/2014

Esser cunter il turissem es sco chavar svessa l'aigna fossa            

 

Eu sa, impustüt in nossas regiuns vivaina dal turissem, natüralmaing, da che lessan viver uschinà? Il turist - na il giast - es il rai. “As suottamettai la terra”, quai disch fingià la bibla e be quel chi va in viadi vain a cugnuoscher bler, quel chi sta be a chasa, quel nu vain sapiaint. La globalisaziun e las tariffas bler massa bunmarchadas dals svouls han manà ad üna migraziun moderna dals pövels. Manajà nu sun quia ils fügitivs – “quels nu sun turisticamaing fich interessants” (vista da las instanzas politicas e turisticas da Laax), na i va per quels chi viagian e svoulan in destinaziuns lontanas e main lontanas. Quai nu dess disturbar ad ingün da nus. Eir sco cha’l viadi finischa, quel es ün’impromischiun, üna pussibiltà fantastica da gnir a savair, che cha’l globus po spordscher: orizonts, nardats, miraculs, benefizis ed infamias, traviamaints (Verirrung) bornats. Ed uossa natüralmaing la dumonda: Chi es turist, chi vala sco viagiatur, chi sco ester,  (da plü bod as dschaiva al turissem: industria dals esters) chi sco giast (economia dal giast)? La definiziun pudess esser quella, da definir la valur dal viadi e’l scopo dal ir davent. Eir il respet da la populaziun e da la cultura, da la lingua, dal lö e dal pajais da destinaziun, quai para a mai ün indicatur fich important.

Ballerman a Mallorca, turissem da sex a Bangkok, ün viadi da duos dis a New York per far cumischiuns, vacanzas al mar in Türchia in üna zona protetta, barricadà dals indigens, i’s pudess vzair alch da la povertà dal pajais. Ma sco dit: eir quels vivan dal turissem, dischan ils promotuors, quels chi profitan, investuors benestants. “Viver as poja dals giasts, dals viagiatuors – ma na dals turists”, quai n’haja dudi dürant üna dieta sur dal turissem persistent. Aha! Quai pudess esser ün criteri! Insomma: Eir eu vegn da temp in temp in viadi, cul velo a pè o cul tren. Minchatant eir in citads “culturalas” plü lontanas e quai dürant il temp da l’uscheditta “stagiun morta”. L’on passà in november a Firenza e Venezia, avant cuort a Salzburg. Ma vulair visitar eir dürant quist temp ils lös culturals, voul dir las citads veglias, baselgias ed oters centers istorics, ün’illusiun. Millieras da turists da la China, dal Giapun e dal rest dal muond, ün’invasiun! Ils doms, las baselgias, las plazzas istoricas: atmosferas da fairas e festas popularas. Ingio restan las forzas spiritualas da las baselgias i’l straglüsch dals apparats da fotografias, dals mezs moderns electronics? Clingeling là, chatschaduoira da malpaziaints dapertuot, inquietezza i’ls centers istorics, affrunt cunter l’istorgia e la cultura!  Circa 30 milliuns “turists” visiteschan minch’on la cità da Venezia, üna cità cun gnanca 400'000 abitant(a)s ed i sun adüna plü pacs. Ils giuvens scapan.

 

Provain da definir la differenza tanter turist, viagatur e giast a man dad üna vallada alpina, p.ex. l’Engiadina bassa, chi dal rest proclamescha ün turissem persistent. Il turist es quel, chi tscherna quista destinaziun alpina pervi dal ir cul skis o eir pervi da l’après ski. El nu vain pervi da la cultura, la lingua o pervi dad ün’inscunter culs indigens. El pretenda impustüt naiv, pistas sainza mots, pistas specialas per disciplinas exclusivas, predschs bunmarchats e las mangiativas piglia’l cun sai. El vegn pel solit cun l’auto e nu douvra la spüerta dal trafic public. Scha nossa vallada nun acclumplischa quistas pretaisas, alura tscherna’l la prosma jada ün’otra destinaziun. Il viagiatur es quia per cas. El “fa” las visitas obligatoricas e davo va’l inavant, magari al listess di. E lura vaina amo ils giasts, quels chi’s interessen eir ün pà per nus. Eu ris-ch la prognosa, cha la destinaziun Engiadina-Scuol ha la mutada d’ün lö da vacanzas da giasts in ün lö da turists. Eir quia patischa la lingua, la cultura e la glieud giuvna muossa la tendenzas da partir vers las citats, las paurarias diminuischan.

 

Uossa suna amo in debit da definir mia tenuta. Eu nu less esser turist. Mia devisa ha scrit Arnold Rauch in üna chanzun: “Eu sun il mariner chi mai nu va, chi mai nu va davent da chà…”

 

CASA

 

il Chardun

revista  rumantscha independenta

CH - 7559 Tschlin

fon 081 866 36 76

IBAN CH