il Chardun

revista  rumantscha independenta

CH - 7559 Tschlin

fon 081 866 36 76

IBAN CH

06/2014

Curaschi e fantasia               

 

Quels banadieus Zürigais haun schon bger dapü mum cu quels marketinghers da l’Engiadin’Ota. Schi sun els bain stos buns da spender bgers raps per cumprer ed installer ün grü aint illa Limmat e per pretender cha que as tratta dad art e cha quel grü as rechatta in ün port. Cler, già aint il cudesch dad Ida Bindschedler „Ils iffaunts da Turnach“ vain descrit cu cha chargiaivan precis in quel lö - inua cha’s rechatta hoz il grü - la barcha per ir da sted a ster oura sül pajais.

Il grü es il tema principel a Turich, el agita, irritescha e provochescha la discussiun. Natürelmaing cha’l PPS es cunter il grü, a dess perfin gnir lantscho il referendum per scumander in avegnir simils s-chandels culturels. Intaunt tuot chi vo a Turich a guarder il grü, a fer fotografias ed a discuter..

Ma que nun es la prüma vouta cha Turich pissera per discussiuns. Eau m’algord cha üna sted eira tuot la cited plain vachas. Prubabelmaing eira il tema „Zurück zur Natur“. Da quellas vachas as vezza auncha hoz cò e lo. Ün’otra sted eiran libers ils liuns in tuot las vias e plazzas da Turich, bels liuns in tuot las culuors. Eir quella vouta sun ils fotografs e turists ieus a Turich a fer fotografias. Pü tard haune miss ad ir düraunt üna sted baunchs per fer la posa, eir quels baunchs eiran fich differents ün da l’oter, baunchins fantastics ma be pü u main cumadaivels.

1/1

E che faun  ils marketinghers da l’Engiadin’Ota? Els plaundschan cha San Murezzan hegia pers si’orma e tuot que ch’els sun buns da prodür es üna fotografia cun duos duonnas in costüm engiadinais cun üna tüba sülla spedla. Üna tüba, s’impissè be! Ün instrumaint cha’s cugnuoscha in Engiadina pür daspö l’era Danuser. Que es bod auncha pês scu cur cha Vico Torriani solaiva chanter „Buna not, dorma bain“. E que chi’m pera il pês da tuot es, cha que nu vain niauncha ad üna discussiun pervi da quellas blondas in costüm engiadinais. Da pü bodun, cur cha nus eirans auncha giuvnas eiran las reglas per pudair ir in costüm bger pü severas e rigurusas. Stinvs fins u üna cigaretta nu füssan gnieus in dumanda, maindir bellet vi dals levs, schi a daiva perfin glieud chi pretendaiva cha’s stuvess savair rumauntsch per pudair ir in costüm. Ed hoz? Hoz piglian las duonnas in constüm engiadinais cun ellas üna tüba. Craj bain cha’d hegian fastidi cun lur orma!

 

Baldina