06/2014

Confusa              

 

Her n’haja chattà per cas ün versin - üna sabgentscha:

What the superior man seeks is in himself; what the small man seeks is in others. (Confucius)

Quai cha l’uman superiur tschercha, es in el svessa, quai cha l’uman pitschen tschercha es in oters.

( umanur <-> umanin )

Cun plaschair e sainza bler pensar n’haja constattà : eu toc pro’ls superiurs.

Ils sbagls tschercha sco prüma adüna pro mai, eu scu bravina davant mia porta e scha alch nu va sco chi stess ir, nun han mai ils oters la cuolpa.

Be ultimamaing m’a dit ün char ami, ch’eu ponderescha massa bler, invezza da giodair la vita. Ha! Tras quista sabgentscha suna rehabilitada e na üna tötta chi sguazza seis temp.

 

Ed implü, perquai cha’l muond es plain umanins, vain eir ün qualunque dozzà sül podest - saja ch’el sa pensar bain, saja pitturar, saja manar, saja taloccar, saja chantar o designar büschmainta…etc. in mincha cas impreschiunar. L’umanin ha dabsögn dad idols perquai ch’el as chatta meglder tanter oters chi han listess gust e listessa opiniun e l’umanin nun es jent sulet cun seis avis, lura as sainta el tuot pers.

Tuot il frust sur da tschertas ignoranzas da la glieud ha chattà üna spiegaziun.

 

Dürant ün pêr minuts n’haja alafin inclet il muond. Ün sentimaint da cuntantezza e satisfacziun es gnü sur da mai. Üna brama perfin, oramai ch’eu toccaiva pro’ls umanurs.  Fantastic e müravglius.

Il sentimaint da suldüm ed extravaganza es eir svani - umanurs SUN isolats, quai es destin - natüralmaing daja üna schurma umanins e be pacs umanurs.

 

Davo quist success emoziunal am suna indurmanzada sco üna raïna.

Insömgiand am n’haja turpchada, perquai cha meis giat Püffin am ha declarà a man d’ün cabel las culuors, blau, jelg, cotschen e vert. El discurriva perfettamaing - ed il fat ch’eu n’ha mancà da respet tout ils ons passats, perquai ch’eu crajaiva cha Püffin sapcha be dir miau am ha fat svarguognar. Sdruagliada suna riond dad ot our da spür plaschair vi da meis giat usché scort.

Sten d’eira ad Andermatt a far üna gita culs skis sül Piz Pazola e‘l Rossbodenstock, insembel cun seis bap.

Cur cha’l giat es our d’chasa, las mürs rupettan.

Bler da rupettar nu daja plü per mai. L’unic es: laschar avert l’üsch da chadafö e da la stanza da durmir per cha’ls giats am possan far cumpagnia. Quai es uschiglö scumandà a la mürina.

 

Intuorn las tschinch e mezza suna lura darcheu sdruagliada.

Our in piertan faiva clic - glüm, clac - s-chür, clic-clac… sainza lapro pass da las pattinas dals giats. Davo var desch jadas n’haja rivi ils ögls, impizzà la glüm e baincomal : Püffin d’eira sezzà giò our in piertan fond stüdis dal sensur da muvimaints, per bun rumantsch as dschessa Bewegungsmelder - ün tagnin per spargnar meglder strom… o na ?

 

Improvand darcheu da m’indrumanzar n’haja cumanzà a resentir üna fotta. Perché ma ? Nu d’eira  là stat alch cun superiur ed inferiur.

Per mai ün pon cotschen. Eu n’ha difficultats dad incleger umans chi crajan d‘avair acquistà ün livel superiur da conscienza e chi sun persvas da megldrar il muond cun lur impissamaints positivs.

O d’eira gritta pervi dad ün’emischiun ch’eu vaiva tadlà la saira avant sün SRF 2 ?

I’s trattaiva dad ün pader a Roma chi lavura  be amo sco exorzist. El ha 76 ons ed es ün profi.

Var 50 paziaints vegnan pro el mincha di. Avantmezdi trametta el davent il diavel pro’ls cas leivs e vers saira sbandischa el a satan da quels chi discuorran in linguas estras e’s büttan per terra. I vegnan adüna daplüs.

Sia stanza es plain figürinas dad anguels. Regals dad arcugnuschentscha chi til fan plaschair.

 

Eu n’ha jent l’Italia e’m saint da chasa pro nos vaschins. Eir il temperamaint da la glieud m’es familiar. Là suna sco ch’eu sun e nu’m dumond mai - davo ün inscunter - sch’eu na fat alch suotsura. I fa mal a verer cha problems economics vegnan diabolisats.

Il versin da Confuzius d’eira eir quia cuffort. Umanins disperats chi tscherchan üna soluziun. Eir quai ha seis uorden.

 

Hoz nu quieta il versin da Confuzius plü. La grandaschia es passada. Forsa nu til n’haja gnanca inclet inandret.

Ün umanin chi fa ün bogn da sulai suot ils gronds pleds dad ün sabi ed as sainta surperiur ?

Eu stögl admetter: eir eu n’ha meis uordenins, meis chaschuotins invisibels per meis conumans. Blagör – modest - fraid - cordial - sun criteris polarisats chi decidan scha ün inscunter es pussibel o na.

Superiur - inferiur prova da sviar. Però minchatant am tocca üna sajetta da cumplex d’inferiurità, la persuna chi d’eira sül podest survain ün stumpel o ün da meis trats caracteristics survain üna valur  plü gronda, tant per cumpensar. Üna soncha nu suna.

 

Scrit bod a fin l’artichel n’haja discutà cun Sten.

Na be la perspectiva filosofica quinta, magnaja el, eir l’aspet biologic es important. Mincha singul uman ha dabsögn da crajer in ün aspet superiur in sai…uschigliö manca il scopo da viver o la forza e la motivaziun da surviver.

Che aspet ch’el tscherna, dependa da sia scolaziun.

( …ha para dit Confucius avant 2000 ons ! )

 

Voul quai dir, tuot in tuot : laschain a minchün sün seis podest e scha no eschan ingaschats per üna roba ( politica p.ex.) imprendaina a clomar amo plü da d’ot, per cha’ls umanins badan, cha ün umandur es al timun ?

When it is obvious that the goals cannot be reached, don’t adjust the goals, adjust the action steps.

 

Schi’d es evidaint, chi nun es pussibel da pervegnir a la mera fixada, na correger il böt, ma’ls pass chi mainan fin là.

 

The superior man thinks always of virtue; the common man of comfort.

 

L’uman superiur pensa adüna vi da la virtüd, l’uman ordinari vi dal confort.

 

The virtuos man is driven by responsibility, the non-virtuous man is driven by profit.

 

L’uman virtüdaivel es manà da la respunsabiltà, l’uman dischonest dal profit.

 

K’ung-fu-tzu ha vivü ca. da 551-479 avant Christus. Pür tschient ons plü tard es gnü scrit sü quai ch’el ha dit e fat. Ils Jesuits han tradüt seis texts in latin e tras quai ha’l survgni il nom Confucius.

(Il plü vegl bös-ch genealogic chi da, es quel da la famiglia da Confucius )

Dal rest, Confucius ha dit cha’l stadi dal uschedit uman superiur nu saja acquistabel, però il svilupp in quella direcziun desiderabel.

 

La via es il böt.

La vita es propcha simpla, però no insistin a tilla far gnir cumplichada. ( duos per mai e per finir ;-) )

( wikipedia e http://sourcesofinsight.com/confucius-quotes/)

 

CoSi

il Chardun

revista  rumantscha independenta

CH - 7559 Tschlin

fon 081 866 36 76

IBAN CH