il Chardun

revista  rumantscha independenta

CH - 7559 Tschlin

fon 081 866 36 76

IBAN CH

07/2014

L'intenziun nu correspuonda adüna al resultat da que cha's fo           

 

Ün fich cuntschaint pittur d'eira gnieu ün pô amar. El s'agitaiva cha sieus purtrets gnivan cumpros vi e pü be pervi da lur valur e na perche ch'els plaschaivan a lur cumpreders.

"Proprietaria legitima da quist purtret es quella persuna chi l'ho invulo" ho'l per quelo scrit sül ram dad ün'ouvra chi al paraiva gratageda specielmaing bain; ed in impissamaints  vzaiva'l già ün'intera rotscha da glieud chi as vaiva "aquisto" sieu purtret. El s'imaginaiva cha sieu purtret gniss in avegnir invulo mincha di u almain mincha eivna, uschè cha sia ouvra gniss in circulaziun güsta scu ch'el as giavüschaiva. Minchün in quella rotscha as pudaiva resguarder scu proprietari legitim e listess paraiva garantieu cha'l purtret  nu restess tacho be tar ün'unica persuna chi, scha vo bain, niauncha nu la savess appredscher inandret e la tgness zuppeda in qualche chascha forta per lascher augmanter sia valur.

La gallaria la pü cuntschainta da la cited vaiva fat l'exposiziun ed  aint il catalog d'eiran indichedas tuot las singulas ouvras, minchüna cun indicaziun dal predsch. L'ouvra speciela vaiva il predsch il pü superbi. Nos pittur d'eira preschaint a la vernissascha be aspettativas! Vaiva qualchün già fat la reservaziun dal purtret? D'eira magari già qualchün intuorn  chi's preparaiva per l'invuler?

Ma a la vernissascha nun es auncha capito ünguotta. Pür la not zieva: Il gallarist ho annunzcho a la pulizia cha sur not saja gnieu ruot aint illa gallaria e cha propi quel purtret manchaiva la bunura.

La pulizia ho fat grandas investigaziuns, la sgüraunza dal gallarist s'ho intermissa, ad es perfin eir gnieu considero cha'l gallarist svessa hegia invulo il purtret, insomma ad es gnieu tschercho e fat tuot il pussibel - ma il purtret nun es mê pü gnieu notiers. E fin al di d'hoz nu so üngün che chi'd es capito cul purtret prezius - niauncha quel chi ho invento quist'istorgia.

 

göri