il Chardun

revista  rumantscha independenta

CH - 7559 Tschlin

fon 081 866 36 76

IBAN CH

07/2014

Fer cumpritas sül Piz          

 

Hozindi tuot es in viedi. Specielmaing düraunt las vacanzas. A la staziun da San Murezzan as vezza di per di innumbrablas gruppas da giasts – üna granda part sun Asiats – chi vegnan a la staziun cun ün bus, vaun bel in lingia sül perrun e partan cul tren. Ils pü curaschus e temeraris ris-chan dad ir our'd lingia per fer a la svelta üna fotografia!

Ils Asiats sajan pera giasts fich richs chi spendan bgers raps sch'els haun temp da fer quetaunt. Tenor las infurmaziuns ch'eau d'he survgnieu dad insiders, per bun rumauntsch as dschessa dad infarinos, spendan ils giasts da l'Asia enorm bgers raps sül Jungfraujoch. Ün dals affers chi lavura il pü bain sül Joch es quel chi s-chamgia raps. Il cuors da s-chamg cha l'affer spordscha nun es güsta ün dals pü favuraivels ma que nu pera dad avair influenzas. Ils giast chi rivan sül Jungfraujoch vaun il prüm plaunin (pervi da l'otezza insolita) oura a fer fotografias, alura tuornane darcho inavous. Els haun auncha temp aunz gianter e zieva gianter pel shopping. (Bger oter nu saun els vairamaing che fer, las fotos sun fattas e guardo intuorn haune già). Els nun haun be il temp necessari, els chattan eir ils affers cun souvenirs, cun uras, cun vstieus, cun clinöz, cun tschiculatta e pralinés ed apunto eir per s-chamger lur raps. Il Jungfraujoch es il lö inua ch'els haun finelmaing temp da cumprer ils regals ch'els stöglian mner a chesa e'l büro da s-chang es aviert tuotta di.

Lindt e Sprüngli ho inauguro be l'oter di üna butia nouva sül Joch. Sgüra cha vais let cha Roger Federer ho giuvo a tennis sü lo tar l'uvertüra da la butia. Que d'eira ün marculdi cun stupend bell'ora e fuollas da glieud. La gövgia ho la butia da Lindt und Sprüngli stuvieu serrer las portas già a las 16.00 e'ls impiegos sun ieus a chesa giò Wengen u solsegnerinua. Il motiv?: A vaivan vendieu tuot, a nun eira resto niaunch'üna cocca u ün praliné. Garantieu, que m'haun quinto mieus infarinos!

Sch'eau vess qualchosa dachedir tar las Pendiculeras da l'Engiadin'ota schi mettess eau ad ir affers sül Piz Nair, sül Corvatsch e sülla Diavolezza. Na be ün restorantet ed alchüns suvenirs – prubabelmaing derivant da Hong Kong - na, affers scu sül Jungfraujoch. Ed eau dumandess dals affers ün pertschient vi dal richev. Ma eau nu d'he halt ünguotta dachedir!

 

Baldina