il Chardun

revista  rumantscha independenta

CH - 7559 Tschlin

fon 081 866 36 76

IBAN CH

07/2014

Focus sün üna spezcha da bes-chas           

 

A do circa 1.4 milliuns spezchas da bes-chas cuntschaintas sün nos planet. Ed almain tauntas sorts fin uossa incuntschaintas pudessan auncha gnir tiers. Tuottas dispuonan d'üna istorgia d'evoluziun, tschertünas d'üna veglischma, otras d'üna pü giuvna, tuottas sun ünsocura in prievel da svanir. In quist rudè da gnir ed ir da las sorts vulains nus piglier oura üna sort da bes-chas, nus vulains descriver quella e Vus, chers lectuors, cheras lecturas vais la lezcha dad eruir da chenüna spezcha cha que as tratta.

La spezcha in dumanda exista già ca. 150'000 ans e nu s'ho müdeda daspö quella vouta. Ils babuns vivaivan i'ls gods tropics da l'Africa inua ch'els staivan il prüm sülla bos-cha, pü tard tscherchaivane eir frütta, pomma, dscherms e buorfs per terra vi.

Cur ch'üna süttina ho diminuieu ils gods tropics avant var 4 milliuns ans s'haun retrats ils antenats da la bes-cha in dumanda illa Savanna inua ch'els haun cumanzo ad ir sün duos chammas impè da sün quatter. Ils antenats ils pü giuvens da nossa bes-cha haun sviluppo ün grand gust dad ir a spass ed ün pêr populaziuns haun cumanzo ad emigrer vers il nord e l'ost ed haun perfin banduno il continent africaun. Otras populaziuns sun restedas illa terra nativa. Our da quistas gruppas s'ho finelmaing sviluppeda nossa sort da bes-chas. Ella es fich sociela e viva in famiglias u clans per pudair as proteger cumünaivelmaing dad inimihs. La sort nun es ne specielmaing ferma, ne specielmaing svelta ed ella nu dispuona neir na dad inclinaziuns extraordinarias. Ma bgers da sia spezcha sun fich scorts ed intelligiaints. Lur babuns vaivan imprains ad invuler il butin da bes-chas rapazas. Quelo gratagiaiva però be sch'els eiran buns dad ingianer a quellas bes-chas rapazas. Adüna darcho capitaiva que cha acziuns per gnir a butin nu reuschivan e fin finela haun survivieu be quellas bes-chas e lur famiglias chi eiran raffineda e savaivan ingianer a las bes-chas rapazas. Uschè sun dvantos ils individuums da quista spezcha adüna pü intelligiaints. Lur tscharvè s'ho augmanto düraunt quella generaziun per ca. 100'000 neurons ed es creschieu a  ca. 1400 cm3. Ma lura es success qualchosa decisiv cun conseguenzas persistentas: Ils individuums haun cumanuo a comunicher da möd differenzcho. Pussibelmaing es que gnieu ad üna mutaziun illa domena dal nuf da la gula u prubabelmaing eir ad üna mutaziun i'l tscharvè, mutaziuns chi haun pussibilto quista comunicaziun. Uossa pudaivan ils individuums tuot in üna vouta descriver l'avegnir e discuter insembel. Aint il clan as ho sviluppeda üna distribuziun pregnanta da las lezchas. Uossa giaivan be pü specialists a fer butin, oters vaivan da proteger als debels ed adoptaivan ils iffaunts relaschos dad individuums morts. A gnivan fattas ouravaunt cunvegnas in quel reguard. Quist agir eira be pussibel grazcha ad üna comunicaziun differenzcheda. Bger pü bgers iffaunts da quist clan vivaiva pü lönch, Eir iffaunts main ferms u maint intelligiaints survivaivan grazcha a quista fuorma d'üna cumünaunza sociela. Il tscharvè nun es però pü creschieu, sia grandezza stagnescha daspö tar ca. 1500 cm3.

Gruppas da quista spezcha sun idas dalöntsch davent, haun ramasso pomma e frütta e sun idas a chatscha. Düraunt millennis s'ho la spezcha deraseda sur tuot il planet ed ho coloniso tuot ils continents cun excepziun da l'Antarktis. Ella nu s'ho guera transfurmeda. Singulas gruppas haun finelmaing desistieu da la vita da nomads, ellas haun cumanzo a tegner animels da nüz, ellas haun cumanzo da semner plauntas ed a racoglier lur früts. Ellas haun invento üsaglias per schligerir la lavur. Il numer dals individuums es creschieu, specielmaing lo inua cha la spezcha as vaiva domicilieda e nu mnaiva pü üna vita da nomads. Scu tar tuot las spezchas da bes-chas es que gnieu eir cò a situaziuns da concurrenza. Ma tar quista spezcha nun as trattaiva que tals conflicts be da rivaliteds, na a gniva a cumbattas a las quelas pigliaivan part interas massas. Il resultat eiran fich bgeras victimas d'amenduos varts.

Sül territori svizzer s'haun radunedas populaziuns e quellas faivan adüna be que cha la magiurited dals indiviuums decidaiva. Illas Alps daiva que viepü bgers lös inua cha's vaivan furmedas gruppas chi agivan be a favur dad oters, lur böt eira da tegner a quels individuums esters uschè lönch scu pussibel sün lur territori. Ma lur agir nun eira dischinteresso, els faivan quelo be causa ch'els survgnivan dals esters tschertas marcas da valur. Quistas marcas da valur sun dvantedas viepü importantas, ils individuums indigens haun cumanzo a desdrür lur abitat per pudair eriger abitats per quels esters, e que be pervi da las marcas da valur. Minchataunt gniva que a dispittas traunter ils individuums indigens. Tschertüns pretendaivan cha saja dad avair dapü pisser dals abitats per cha'ls esters portan marcas da valur eir a lungia vista. Ils esters gnivan nempe be scha'ls abitats nun eiran surfabrichos memma ferm. Finelmaing es que gnieu eir a dispittas traunter ils individuums indigens e quels esters causa cha'ls esters vaivan da der no memma bgeras marcas da valur.

Vairamaing nu's pudaiva incler quistas dispittas, taunt ils individuums indigens scu quels esters vaivan avuonda da maglier. A daiva perfin pevel in surabundaunza. Ma quel gniva per granda part mno  notiers d'utro. Il  punct dispittaivel nun eira a tuottavia la nudritüra dimpersè unicamaing las marcas da valur. Scienzios nomnan quelo il „self-perpetuating effect“, per tudas-ch as dschessa „Selbstläufer Effekt“. Scha las marcas da valur e lur importanza per la spezcha indigena augmantaro auncha u scha la fracziun critica chi'd es pel mumaint illa minurited surpiglia il timun nun es pel mumaint auncha cler. L'abitat es hoz in mincha cas già degrado considerabelmaing in grandas parts da las Alps

L'evoluziun da la spezcha cuntinua. Nus nu savains da dir hoz in chenüna direcziun. Que cha's so hozindi grazcha a la paleontologia e l'archeologia es, cha'l tscharvè da la spezcha in dumanda nun es pü creschieu düraunt ils ultims 150'000 ans.

Ed uossa, chers lectuors, da chenüna spezcha da bes-chas as tratta que?

Soluziun (da ler da davous inavaunt): sisnenidaigne sneipas omoh

 

David Jenny