08/2014

Lingiadas da vegliuords           

 

758 da 100‘000, quaunts pertschients u promils sun que? Eau d’he pruvo da fer our il quint. Sun riveda al resultat, cha 758 da 100‘000 sajan 7.58 promil u 0,758 pertschient. Scha que nun es vaira  schi fè il bain da trametter ün email a la redacziun!

Dinuonder ch’eau d’he quistas cifras? Our d’ün rapport dal BfU, l’Uffici federel per la prevenziun dad accidaints, publicho aint illa Zürighaisa als 6 avuost. Cha’l prievel da perder la vita cun cruder s’augmainta cun gnir vegl. Aint il rapport eira scrit cha duos terzs da las persunas chi hegian pers la vita s‘hegian inchambüerledas u sajan sglischeds ed ün terz sajan crudedas giò da s-chelas.

Tar glieud pü giuvna perda la vita be 1 da 100‘000 tar ün simil accidaint. Tar persunas traunter 80 e 90 ans sun que già 230 persunas e tals propi vegls da sur 90 ans sun que apunto 758 da 100‘000!!!

Eau cun mia fantasia extravaganta d’he dalum vis quels 100‘000 vegliets da sur 90 ans, tuot in lingiadas, üna davous l’otra, il prüm quels auncha bain in chamma, magari cun spievel da champagna intuorn culöz lura quels cun üna crotscha e cun chapè da sulagl, quels chaminan auncha vaira dret sü e sun eir auncha buns da tegner il tempo, seguieus da quels cun duos crotschas chi haun già da guarder da river zieva e stöglian magari eir tussir e fer traunteraint üna posa per gnir a fled. Alura vegnan quels cul rulator,  auncha pü inavous quels culs s-chabels cun roudas e quels in lets da l’ospidel u da la chesa da chüra.

Na, ils vaschels (eau nu savaiva niauncha cha vaschè ho il listess plural scu il cafè causa ch’eau nu d’he auncha me stuvieu scriver da vaschels), ils 758 vaschels nu d’heja pruvo da m’imaginer!

 

Ma eau am dumand perche cha’l BfU nu scriva:“ 0,758 % da las persunas da sur 90 ans perdan la vita cun cruder“. Fo que memma poch‘impreschiun a persunas cun üna fantasia stavaganta u haun quels dal BfU eir difficulteds tal fer our ils pertschients, precis scu Dina?

il Chardun

revista  rumantscha independenta

CH - 7559 Tschlin

fon 081 866 36 76

IBAN CH