il Chardun

revista  rumantscha independenta

CH - 7559 Tschlin

fon 081 866 36 76

IBAN CH

08/2014

I vain pretais, cha la festa da giubileum dal PN saja statta CO2 neutrala. Ma hast vis quellas plazzas da parcar plainas stachdidas? E la propaganda turistica chi han fat! Es quai i'l sen dals fundaturs?

Martin P., S.

  • Schi! E reguard propaganda turistica: Quella es ida sperapro e nun es gnüda fatta directa- o explicitamaing dals respunsabels dal PN. Quai es il turissem chi profita da mincha occasiun, chi's fa natüralmaing pro, sainza ingüns resguards, sainza ingünas retgnentschas.
    Cha quai nun es il sen dals fundaturs, s'inclegia bain da sai stess. Ma ils temps s'han apunta müdats.

 

 

Her dürant las novitats n'haja stuvü rier. I'l Portugal es la banca 'Spirito Santu' ida bancarutta. Mo di be tü, che capriolas cha'l spiert sonch fa, am n'haja dit! Nun es quai singular cha'l spiert sonch va in fallimaint!!!

Steivnin

  • Daplü co be 'singular'. Da's dar da buonder esa eir, cha la Baselgia nu s'ha intermissa cunter quist nom deplazzà.

 

 

Nun es quai üna varguogna, cha Israel devastescha il Gaza?

Leonora P. S.

  • Ün vituperi! Ma quels stinats dal Hamas dessan tuottüna schmetter d'inviar rakettas cunter l'Israel. Cun quist'acziun nu ragiundschna sà na oter co chi spordschan apunta la 'noscha' güstificaziun als Israelis per lur attachas. Ils Israelis stuvessan tuottüna schmetter be dalunga, quai eir perche ch'els rivan da 'bloccar' las raketas.
    Da sentenzchar es dimena surtuot l'Israel.

 

 

Perche as po Putin prestar tuot quai ch'el voul? El ria be da las sancziuns.

E la buna Svizra nu's voul associar a las sancziuns.

Gian Armon T.,S.

  • Scha'ls politikers dals stadis dal vest nu vessan 'fat la cuort' a Putin s'arüdond sülla Krim a l'Olympia, schi nu pudessa'l avair quista prepotenza.E... nu dir: La Svizra! Quai es surtuot il baubau o la poppa da strom dal parti da l'economia, il 'straordinari' cusglier federal Johann.