il Chardun

revista  rumantscha independenta

CH - 7559 Tschlin

fon 081 866 36 76

IBAN CH

09/2014

Ma bella val mi'Engiadina             

 

Daspö forsa ün mez an At guarda in Engiadin'Ota giò da grands placats qualche persuna indigena, cha tü cugnuoschast forsa dafatta, e suravi sto scrit in grands custabs "Mein Tal mein Spital".

Eau stögl admetter ch'eau sun sto ün pô stut da quist slogan il prüm mumaint già ch'eau, stüpid, nu vaiva inclet sia genialited fand la ponderaziun primitiva ch'eau viva bain in üna stupenda val e na forsa in ün ospidel u lazaret.

Ma l'oter di m'es finelmaing gnieu il straglüsch chi m'ho relevo tuot e musso quaunt geniela cha la rima unica dal slogan es in vardet.

D'inuonder as vaiva l'inventur dal slogan lascho inspirer?

Que stu esser sto mieu admiro Andrea Bezzola, barmör daspö il 1897!

In sia poesia "Adieu a l'Engiadina" vaiva'l in sieu seguond vers scrit  "...tü m'hast levà mal e dolur, o bella val, o bun dutur...". Sgür cha nos magnific autur dal "Mein Tal mein Spital" vaiva in sieu sböz miss "Mia val, mieu ospidel". Ma alura ho'l bado dalum cha a quist slogan manchaiva il kick ultimativ ed uscheja, zieva lungias nots da ravaschia al stu esser apparida la soluziun incredibelmaing straminabla culla rima dal tuot inaspetteda ed unica... s-chüsè, eau nu sun bun da m'artgnair da la repeter per la terza vouta: "Mein Tal mein Spital".

Nun es que extraordinari e cumplettamaing admirabel cu cha que es gratagio a quist geni d'ün hom da la publicited dad assimiler nossa cultura e da la render ütila a bön da nos ospidel?

Eau nu poss fer reverenza avuonda davaunt quist umaun ingenius chi es sto bun dad incorporer nossa veglia cultura illa vita moderna d'imminchadi. Che forza assimilativa!

 Eau m'impais cha que füss indicho cha assimilessans plaunet eir la chanzun da mieu admiro Andrea Bezzola e cha chauntans in avegnir "Lur bel Tal, lur Engadin".

 

göri