il Chardun

revista  rumantscha independenta

CH - 7559 Tschlin

fon 081 866 36 76

IBAN CH

09/2014

Difficil cur cha la politica ho

pled in chapitel                     

 

A Samedan ho realiso la Societed cooperativa “Abiter fin a 25 / Wohnen bis fünfundzwanzig“ infra cuort temp ün stabilimaint cun 27 abitaziuns dad üna fin quatter staunzas. Il stabilimaint es gnieu fabricho in dret da fabrica sün terrain da la vschinauncha da Samedan e dess servir a giuvens ill’eted fin a 25 ans chi vöglian ster eir zieva lur furmaziun professiunela in Engiadina ma nun haun la pussibilted da pajer ils fits „normels“ per abitaziuns. Que chi ho surprais es, quaunt svelt cha’l proget ho pudieu gnir realiso.

 

L’iniziant e president da la societed cooperativa es Ernst Huber. Tal di da las portas aviertas d’heja dit a l‘iniziant cha’s stuvess fabricher eir ün stabilimaint cun abitaziuns per seniors.

Cha fich bgera glieud l’hegia dit il listess, es steda sia resposta. Ch’el pudess bain fabricher ma cha mauncha il terrain. Ma in vicinanza da la dmura dad attempos Promulins do que terrain dals vschins da Samedan, parcellas predestinedas per ün simil stabilimaint. Ideel es que, scha  abitaziuns per seniors as rechattan in vicinanza d’üna dmura per attempos. Ils abitants paun profiter da l’infrastructura da la dmura per attempos, dal sustegn medicinel e da la cafeteria.

Perche nun es que pussibel da fabricher abitaziuns per seniors cur cha la politica ho pled in chapitel scu tar Promulins?  

 

Baldina