il Chardun

revista  rumantscha independenta

CH - 7559 Tschlin

fon 081 866 36 76

IBAN CH

09/2014

Darcheu ün nouv iPhone?            

  

Perche be rumpa tuot uschè svelt ? Id es puchà cha hozindi ils telefonins dad "apple"  rumpan uschè svelt. Prosmamaing saran in d'ün cuolp ruots tuots e quai precis quel di chi cumpara il nouv iPhone. Lura las colonnas e'l chatschöz davant las butias saran immensas. Plü bod vaiva ün telefonin da 500 francs da tegner nan ün temp. 500 francs quai d'eiran da plü bod regals da cunfirmaziun o forsa d'ün anniversari raduond e cun quels raps daiva lura  ün'ura, ün anè d'or o ün bun apparat da fotografias chi düraiva bod üna vita. Ed hoz daja per quels raps ün telefonin o ün tablet chi surviva  forsa ün on o il plü lönch fin cha'l prossem model amo plü chic es sül marchà. Precis quel di nun ha teis telefonin plü ingüna valur ed i vegn lura dit chi's stopcha cumprar il nouv e cha quai saja bun per promover l'economia. Cur chi fa dabsögn fa l'uman natüralmaing tuot il pussibel per la cumünanza. E cur cha'ls apparats nu funcziunan plü vegnna simplamaing büttats davent perche chi nu cunvegn da tils cumadar ed eir perche cha'l nouv es adüna amo meglder. Chi cumoda hozindi amo uras, apparats da fotografar o televisiuns? Relaziuns e lais nu vegnan  pel solit neir na plü cumadadas. L'experienza culs telefonins ans muossa, cha'ls models nouvs sun adüna bler meglders e chi san far tuot plü bain, uschè chi's piglia  lura - güsta davo la dispitta - ün  hom o üna duonna nouva e per chattar ün o üna nun esa da las jadas gnanca da star in colonna.

 

Giovannina T. Tschlin