il Chardun

revista  rumantscha independenta

CH - 7559 Tschlin

fon 081 866 36 76

IBAN CH

10/2014

„Die Jungen arbeiten und

bezahlen für die Alten“        

 

Flavia Kleiner ho 23 ans, es stüdenta a Fribourg, parcielmaing assistenta e co-presidenta da la „Operaziun Libero“, ün muvimaint politic da giuvens stüdents. Aint ill’emischiun da Radio SRF „Tagesgespräch“ da venderdi, als 17 october ho ella declaro:“Faktisch sind es die Jungen, die arbeiten und die Jungen, die bezahlen und die Alten können davon leben“. Dunque: ils giuvens lavuran e pejan pels vegls.

Flavia Kleiner es ida a scoulina ed a la scoula populera, finanzieda da la generalited. Ella ho frequento il gimnasi a Bülach, per quel nun haun ne ils genituors ne ella stuvieu pajer niaunch’ün rap, pigliand our ils cudeschs da scoula. Tuot es gnieu finanzcho our da las impostas. Ella frequainta l’Universited da Fribourg, eir quella scoulaziun vain surpiglieda per granda part da la generalited. Siand ch’ella es creschida sü i’l chantun da Turich ed abita a Fribourg ho ella pü grands cuosts per viver. Culs raps ch’ella guadagna scu assistenta es ella buna da viver almain per part, il rest pajaron ils genituors u ch’ella survain stipendis. Guadagno nun ho Flavia Kleiner praticamaing auncha ünguotta e sias contribuziuns per l’AVS sun fin uossa minimelas. Pajer per cha’ls vegls possan viver??

Eau stögl declarer da prüma davent ch’eau d’he simpatia per l‘Operaziun Libero, baininclet. Ma quista tendenza fich deraseda da dir cha’ls giuvens lavuran e pejen pels vegls nu’m vo per staila.

Nossa generaziun es creschida sü per granda part in relaziuns modestas e nus vains imprains a spargner. Nossa generaziun ho gieu la schanza dad avair adüna lavur. Nus vains guadagno bain ma vains eir stuvieu lavurer diligiaintaming. Nus vain pajo fich bgeras impostas, vains pajo fich grandas contribuziuns per l’AVS, vain pajo aint per nossas chaschas da pensiun e magari eir per la terza picha, nus vain spargno per pudair ans praster la chesa da fliamaint, scha que vess üna vouta dad esser necessari.   

Cler, sch’eau discuor da „nus“ schi es que  üna generalisaziun. A do eir da quels chi nun haun gieu taunta furtüna ed haun gieu problems finanziels. Ma eau sun sgüra cha que es üna minurited. Dal rest, mieu neiv es mort cun 65 ans ed ün mais, eir el ho pajo AVS e chascha da pensiun…

Eau chat cha que saja ün‘impertinenza da quists giuvenils da dir:“ Die Jungen arbeiten und bezahlen damit die Alten leben können.“

 

Baldina