il Chardun

revista  rumantscha independenta

CH - 7559 Tschlin

fon 081 866 36 76

IBAN CH

10/2014

Valuors cristiaunas          

 

D’incuort tschantaivi düraunt ün gianter in fatscha ad ün politiker local a me incuntschaint. Zieva ün pêr pleds superficiels disch el dandettamaing: „Nus stuvains decider che cha vulains.“ Cler. Decider che cha’s voul as stu permanentamaing. Che chotschas dessi trer aint hoz, che cuschiner, che scriver... Impazchaintamaing sgualatta’l il cho. „Nus stuvains decider cu cha la Svizra dess guarder our in avegnir.“ Aha. Schi. Natürelmaing. Ma el sgualatta auncha pü ferm sias pêr pennas e’m do d’incler ch’eau nun incleg ünguotta. „Vulainsa cha noss iffaunts possan viver inavaunt in ün pajais sociel- ed economicamaing stabil...“ Ubain? „...u vulainsa renunzcher a sgürezza e bainster e piglier sü auncha dapü fügitivs.“ „Üna dumanda difficila.“ „Simpla“, m’interrumpa’l, „üna dumanda fich simpla chi pretenda üna resposta clera e netta.“ Sia resposta clera e netta es evidaintamaing stabilited. El voul sieu pos bainmerito, üna vita cumadaivla ed ün bel mantun in banca. „Ma quels chi rivan a noss cunfins nu sun ogets, que sun umauns“, replichi. „Umauns chi profitan da nos stedi sociel“, respuonda’l indegno. Eau nu dun luoch: „Schi, ma avaunt cu güdicher as vessa da cugnuoscher l’inter’istorgia.“ „Istorgia nu m’interessa.“ Ma di tü, que nu’s dschess. „Per pudair der fuorma a nos futur, esa però indispensabel da cugnuoscher nos passo, in quist cas eir l’istorgia da la colonialisaziun e dal sfrüttamaint“, prosegui alura cun zeli. „Papperlapapp“, m’interrumpa’l darcho. „Ch’Ella guarda be che cha’ls Africauns haun per exaimpel cumbino daspö cha’ls colonialisatuors s’haun retrats? Zist segn! Perque vegnane uossa a picher porta tar nus.“ „Ma que nu’s po tuottüna...“, prouvi aunch’üna vouta. Ünguotta da fer. El sto sü, disch ch’el hegia uossa otras incumbenzas e svanescha. Spüffand am volvi vers üna cuntschainta. „Chi diavel es quist cò? Ün fidel member dal Partieu populer u da la Lega dei Ticines’?“ Sfrignand malizchusamaing am respuond’la cuort e bön: „Partieu cristiaun democratic.“ Ün Cristiaun? Pfff! „Ama tieu prossem scu...“ ehm, na, cu vo l’oter dit? „...e rendè la terra suottamissa a vus...“ Precis!

 umadaivlamaing. ehm, na, cu ho que nom? eram volv vers mia collega da lavur las güstas decisiuns in futur, saja que indispensabe

 

Bettina Secchi-Fluor