il Chardun

revista  rumantscha independenta

CH - 7559 Tschlin

fon 081 866 36 76

IBAN CH

10/2014

Il dovair d’infuormaziun da las medias      

 

Per furtüna daja las medias, ouravant tuot SRF ed RTR. Na propcha, sch’eu nu gniss infuormà in detagl sur da l’elecziun da Miss Svizzra Lätitia Guarino e sur da las nozzas da sömmi da Michelle Hunziker cun Tomaso Trussardi – i’m mankess alch in mia fuormaziun generala – e quai füss puchà. Las reportaschas dürant tuot il di sur da las nozzas da Michelle d’eiran propcha per rumper il cour. Las moderaturas e’ls moderatuors dal Radio rumantsch han discuorrü in möd emoziunal, i’s tschüffaiva bod las larmas pro quista transmissiun da furtüna dal pêrin.

 

Ün païn da pensar m’ha bainschi dat l’intervista ufficiala culla Miss svizzra. In ün discuors cun üna schurnalista güsta davo l’elecziun vaiva ella dit, ch’ella as trupagia per la Svizzra pervi da la decisiun reguard l’iniziativa d’immigraziun. Ün affrunt total. Ün sbrai da sculozza as ha derasà in Svizra. La Miss svizzra nu’s po exprimer politicamaing, ella sto as redüer sül bla-bla. Ed uschè es quai lura eir capità ill’intervista ufficiala culla televisiun svizzra. Lätitia Guarion d’eira magari malsgüra. A mincha dumonda chi vess pudü scuvrir sia tenuta politica es ella ida our’d via, per la paja s’ha pudü gnir a savair alch sur da seis ami e sur da sia cretta. L’ambaschadura “pel cour d’uffant” as sto drizzar davo las reglas da la società. Cun Lätitia n’haja propcha ün pa malavita, ella es in fuond sgüra üna duonna intelligiainta. Michelle Hunziker percunter nu conquista meis cour. Cuntuot cha las medias vaivan comunichà, ch’ella implischa ils cours da tuot la glieud.    

 

CASA