il Chardun

revista  rumantscha independenta

CH - 7559 Tschlin

fon 081 866 36 76

IBAN CH

10/2014

Victor Stupan         

 
MAMMA

Nus d'eiran sco d'uffants tschantats a maisa

- uschè n'haja sömgià be tschella not –

süsom il bap e lura nus, tuots ot,

e tü giosom sper mai. Sco alch surpraisa

glüschiva in teis ögl, ün vaira spejel,

limpid e cler, sco perla da ruschè.

Aint il man dret avaivast ün curtè,

teis schnester rinserraiva ün pan sejel.

 

Tü ans tagliaivast zuonda davo zuonda,

e per minchün bundantamaing avuonda.

Mo plü cha tü ans daivast da teis pan,

plü grond ch'el gniva in teis agen man.

Uschè, sco cha creschind va aint il cour

l'amur da quels chi tilla partan our.

 

 
T'ALGORDAST?

T'algordast, Uorschlina?

lntuorn Büman

joslaivan insembel

fin giò pro quel trembel.

Tuornond sü Saglina

ans daivan il man.

T'algordast amo?

 

E fin sü Saglina

nun hast pled flippi.

Noss ögls as guardaivan,

noss mans as toccaivan.

Sulai d'Engiadina.

che's voula daplü?

T'algordast amo?

 

E lura hast fat locca

la stretta dal man.

E nossas ögliadas

as varan sbassadas,

mo tia bocca scuttà m'ha:

daman!

T'algordast amo?

 

 

Victor Stupan  es nat a Sent als 31 schner 1907 sco ottavel uffant dad üna famiglia da paurs. Davo il seminar da magisters da la scoula evangelica dad Aschera/Schiers dvainta el magister privat a Malögia ed a Turich. El stüdgia a Turitg, Paris e Grenoble e conclüda sco magister secundar. Sco tal instruischa el a Puntraschigna, Landquart e dal 1958 al 1972 las classas bassas dal gimnasi a la Scola chantunala a Cuoira. El es mort als 24 da favrer 2002 a Cuoira.