il Chardun

revista  rumantscha independenta

CH - 7559 Tschlin

fon 081 866 36 76

IBAN CH

11/2014

La saiv              

 

Ils fils da saiv sun davent, la pas-chüra es darcheu libra, access e passagis sun darcheu averts. La cuntrada nun es plü tagliada da lingias geometricas. Ma las saivs nu disturbessan uossa plü ad ingün, ingün nu chamina plü tras prada, pas-chs e god. Ils turists sun davent e’ls indigens stan daplü in chasa, protets dal fraid e dal s-chür. Ed il muvel es miss in stalla, il pavel pront sün tablà o imballà in plastica. Tuot es pardert pel inviern. Ma han tuots tet e refügi, dapertuot?

Saivs, mürs, cunfins, barricadas, barrieras e check points - mürs nouvs vegnan fabrichats, cunfins vegnan serrats e las controllats da cunfin vegnan intensivadas. Il mür da Berlin es gnü demoli avant 25 ons, ma in Ukraina, in Palestina ed in otras regiuns vegnan actualmaing construits mürs nouvs e saivs plü otas, na pel muvel dimpersai per umans. Forsa eir in Svizra, mürs invisibels? Metter a l’ur, excluder, isolar, s-chatschar, mordriar - emigrar. Povertà e fom, ingüstia e corrupziun, terrur e guerra – las organisaziuns internaziunalas güdan quant ch’i pon, ma i rivan al limit. 

 

Müdain la perspectiva, drivin ils ögls pel positiv e pel bel: saivs pon esser ouvras d’art. Construidas da lain cun pösts cudetschats ün in tschel. Saivs fattas cun indschegn special. Chi ha ozindi amo quist savair? Mincha regiun ha seis agen tip da saiv. E mürs sechs, elemaints da la cuntrada culturala da bellezza. Crap sün crap, minchün bain clet oura e mis cun precisiun a seis lö uschè cha’l mür tegna per lönchezzas. Ils mürs sechs sun spazis da viver fich importants: per serps e lütschernas, per mürs e lindornas, per scarafags ed arogns. Ma eir plantas sco sempervivs, grassellas e felschs creschan sün ed aint ils mürs sechs.

Saivs e mürs servan per separar, ma eir per structurar, tgnair insembel e proteger. Guardain cun plaschair üna bella saiv da lain. Seis pösts fan sumbriva sün terra, ün purtret da quaidezza e pasch.

 

Regula Bücheler, Brail