il Chardun

revista  rumantscha independenta

CH - 7559 Tschlin

fon 081 866 36 76

IBAN CH

11/2014

Che vegn our da la stalla da Cuira ?         

 

In mincha stalla da gillinas basta ün chöd. Ils oters chöds chi naschan nun haun üngüna funcziun, els vegnan mis dvart e la vita als dvainta lungurusa. Alura partan els bod u tard vers la stalla da Cuira, ün lö suot las muntagnas grischunas inua cha sun già bgers schumars chi nu servan pü al transport, chevras zoppas e vachas chi nu daun pü lat. L’unica roba ütila cha quista stalla prodüa es üna granda muntagna da grascha.

Ma eir lo ils chöds superpü resaintan la lungurella. Ün di, ün dad els ho propost ch’els scrivan ledschas. Cun lur griflas agüzzas haune cummanzo a sgrifler la terra in lur curtin. Traunter ils pochs chi s’interessaivan per quista rüzcha minchün legiaiva qualchos’oter in quista confusiun mel scritta. Ma ils chöds haun fat canera e dit cha tuot il Chantun stöglia fer adöver da quistas nouvas ledschas.

I’ls cumüns engiadinais, las gillinas haun be declaro cha quists chöds nu sapchan niauncha fer övs, e dumando che cha‘s possa spetter da simila gianüra. Ün vegl buoch, ün sabi cun lungia experienza, ho udieu quista remarcha güdiziusa.

El ho dit a las gillinas, ch‘ellas pudessan sainz oter fer a savair lur parair intuorn lur cumün e tres tuot las muntagnas grischunas, e declarer ch’as possa vuscher cunter quistas tuctarias sü da Cuira e las sbütter. Ma cha el nun hegia auncha mê vis üna gillina ad ir a vuscher. Las gillinas haun dit cha que nu saja üsit in lur cumün cha femnas giajan a vuscher. Ma il buoch ho be respost cha saja da cumanzer üna buna vouta, pustüt uossa cha las gillinas avaivan ün parair, nempe cha da Cuira nu sajan da spetter üngüns övs ma be grascha.

Las gillinas haun pondero quists imbüttamaints chi las haun persvasas. Tar la prosma votaziun chantunela es passo  ün grand ramadam sur las muntagnas our, in tuot il chantun las gillinas sun tuottas idas a vuscher e cun immensa partecipaziun e granda magiuraunza sun las propostas da la stalla da Cuira gnidas sbüttedas. Sperains cha quist zeli as mantegna per las prosmas votaziuns.   

 

Claudio Caratsch