il Chardun

revista  rumantscha independenta

CH - 7559 Tschlin

fon 081 866 36 76

IBAN CH

11/2014

Alleluja!        

 

La crema da la crema da la politica, nomnadamaing l’elita dals politikers da G-20 s’han radunats a Brisbane in Australia. Ed Angela da la Germania es tuot euforica: La conferenza ha ragiunt gronds progress pro’l marchà liber mundial e pro la protecziun dal clima. Dafatta ils Americans e’ls Chinais han uossa impromiss, da pisserar per üna reducziun da la producziun da CO2. Xi da la China voul l’on 2030 avair ragiunt il maximum da la producziun da dioxid da charbun e davo stabilisar quel sül nivel da quella jada. Barack da l’America voul redüer il “morder” dal clima fin l’on 2025 per 26 fin 28 %. Uschè precis sa el calcular, cuntuot cha bainbod surpiglian in America ils Republicans la pussanza, e quels nu sun faquint ils amis dal clima.

 

Ed uossa il müravglius: Al glistess temp dess l’eonomia mundiala darcheu crescher e s-chaffir milliuns da plazzas da lavur. E perquai esa da liberalisar inavant il marchà - e tuots sun cuntaints. Che bels propösts! E’l remeidi miraculus a nom Tisa (Trade in Services Agreement). Quista cunvegna ha la finamira da liberalisar a mordio. Affars privats dessan avair access a tuot ils marchats da servezzan da tuot ils pajais partecipats e ston gnir trattats listess sco las instituziuns publicas. Pigliain l’exaimpel cha ün concern da Luxemburg metta ad ir in Svizra ün scoula privata. Alura sto quella gnir sustgnüda precis sco üna scoula publica. Üna demontascha dals stadis e dal service public. I nu douvra profets per vzair ouravant, che chi capita cul provedimaint d’aua, il transport ed otras infrastructuras publicas. E’ls stadis dvaintan statists dasper il concerns mundials e las bancas chi cumondan fingià hoz üna gronda part da las festas sün quist muond. La revoluziun da Brisbane rimplazza da revoluziun francesa! La Posta svizzra e la “Deutsche Bahn” laschan salüdar. Quellas firmas han experienza in reguard al marchà da la liberalisaziun, voul dir dal fat, cha’ls interess dals acziunaris ston gnir valütats bler daplü co quels da las impiegadas e dals lavuraints.  

 

Scha l’umanità da nos temp i’ls “pajais svilupats” füss capabla, da s’unir ad ün’unica frasa chi correspuonda a sia mentalità, ella s’uniss faquint sül bonmot: “Après nous le déluge”. Davo nus il diluvi! Be uschè am possa declerar l’euforia dad Angela, Xi, Barack, Francois e tuot la cumpagnia. Invezza nu suna gnanca capabels, da schoglier ils conflicts acuts sün quist muond. La fomina i’l terz muond, elminar la razza da terrorists chi nu cugnouoschan ingüns scrupels da mazzar per lur cretta difusa. O il conflict actual ill’Ukraina. E Vladimir nu voul discuorrer da quai. El banduna la conferenza. Ma Angela da la Germania es euforica. Alleluja!

 

CASA