il Chardun

revista  rumantscha independenta

CH - 7559 Tschlin

fon 081 866 36 76

IBAN CH

12/2014

Democrazia – scritta cun custabs pitschens

 

Al principi da l’an nouv nu vögl eau considerer, cu cha que sto i’l vest cun la democrazia taunt glorificheda. L’incletta democratica erodescha, illa politica, ill’economia ed illa societed. L’egoissem e’ls interess persunels sun pü importants cu la solidarited. L’elita finanziela s’ho distanzcheda dal pövel  - e – melavita insembel cun l’elita eir la politica. Ün exaimpel sül champ federel: la realisaziun da las duos iniziativas dal pövel „Fabrica da seguondas abitaziuns“ e „Immigraziun da massa“. Ils giavüschs d’üna magiurited vegnan spennos e tardivos fin cha nu’s vezza pü lur finamiras uriundas. E cu sto que culla democrazia, cun la politica e cun la vöglia dal pövel in Engiadin’Ota? Ils votants e las votantas vulessan mantegner il cussagl da cumön, il parlamaint regiunel; ma quel vain liquido sainza substituziun. A sieu lö varegian ils presidents cumünels pled in chapitel. Scha dains ün sguard il passo vzainsa cha las damas e’ls signuors, tuots burgais, haun regno sainza resguarder ils interess dal pövel.

La constituziun nouva dal circul, la fabrica da seguondas abitaziuns, la plazza aviatica da Samedan, la scoula da musica, la refuorma dal territori e l’iniziativa Weber sun tuot fatschendas cha’ls partieus haun cumbattieu. La Glista libra vaiva pü buns argumaints chi haun mno a bunas decisiuns.

Al cussagl da cumön faun part, scu commembers da la Glista libra, ün pêr persunaliteds chi haun ün penser critic e chi sun independentas. Cun lur analisas cleras e marcantas e cun argumaints evidaints – nu sun ellas stedas bunas da persvader al cussagl da cumön - ma bainschi als votants ed a las votantas. Quistas persunaliteds mancharon in avegnir cur cha’d es da chatter üna soluziun politica. La „classe politique“ po dunque darcho regner dasperavi al pövel. Cun que cha mauncha in avegnir ün parlamaint saregia que pü difficil da mner per temp üna discussiun seriusa sur da dumandas importantas. Democrazia vain scritta cun custabs pitschens. Contribuziuns scu quista nu saregian bunas da müder qualchosa vi da quist fat.

 

Robert Obrist