il Chardun

revista  rumantscha independenta

CH - 7559 Tschlin

fon 081 866 36 76

IBAN CH

12/2014

El clima es destruido, salva el progreso económico!                

 

Quai d’eira da leger sün ün transparent dad üna pitschna gruppa da protest dürant la conferenza da clima da l’UN a Lima. E quel disch tuot: Ils gös sun fats, il clima nun es plü da salvar. Ma gio da tuot as po salvar l’economia. Invezza stà il sistem d’ün svilup persistent da creschentscha da l’economia in stretta colliaziun culla destrucziun da l’ambiaint. Il böt chi’s derasa sur la conferenza es quel, da limitar il schodamaint da la terra a maximal duos grads. Tenor stüdis dal cussagl mundial da clima vessan las emissiuns perquai da gnir redottas per 40 fin 70 % fin l’on 2050 e fin dastrusch a nolla fin la fin da quist tschientiner.   

 

Ma i nu voul ingün profet per identifichar la situaziun politica chi regna quist muond. Ingün dals stadis nu voul cumanzar cun üna reducziun dal CO2, voul dir, ingüna regenza nu voul pretender dal pövel ün reducziun da las pretaisas per mantegner il standart da vita i’ls pajais industrialisats. Ils pajais dal terz muond sun insomma adüna ils fregats. Els prodüan pacas immissiuns donnaivlas pel clima, patischan però il plü ferm pervi dal müdamaint negativ dal clima.

 

Scha’l muond as sviluppescha fin l’on 2050 sco’ls ultims 25 ons, alura es l’imaginaziun insupportabla, co chi’s preschainta la situaziun da l’ambiaint quella jada. La populaziun dals stadis industrials surpassan lur capacitats ecologicas fingià uossa per trais fin quatter jadas. Lapro vain amo il problem dal müdamaint dal clima chi metta suotsura tuot la situaziun meteorologica mundiala. I’s fuorman diversas zonas stabilas chi patischan suot l’augmaint da la chalur e zonas chi patischan suot temperaturas adüna plü fraidas. In parts da l’America e da la China hana gnü i’ls ulltims duos mais fraidüras extremas e pro nus han surpassà las temperaturas chodas la media dals ultims 100 ons per divers gradas, in mincha cas daplü co 2 %.

“El clima es destruido”, las activistas e’ls activists dal Peru as rasegnan. E na be quai vess da far pissers.  

 

CASA