il Chardun

revista  rumantscha independenta

CH - 7559 Tschlin

fon 081 866 36 76

IBAN CH

10/2004

Che es success?                

 

Impè da der üna definiziun da quist term cun spectrum vast prouvi dad enumerer exaimpels pussibels our da differents champs chi muossan che chi es success. La prüma part dals exaimpels es cumparida in settember, cò es la cuntinuaziun.

  • Tü est regent. Discumadaivel e seccant es cha la populaziun in Tieu stedi discuorra 3 linguas. Cu fer per gnir liber almain dad üna? Il pü simpel füss da fer a la romauna: „divide et impera“, ma que es vaira prievlus. Scha la glieud bada cha tü semnast zizagna, tegnane insembel scu la rescha e’t sbancan l‘ultim auncha ad a Te. Ma Tü nu stust niauncha pisserer svessa per la discordia! Illa barchina la pü falambra as dispütane già dich ed avuonda eir sainza Tieu agüd. Que basta cha Tü dettast ün brav stumpel al güst mumaint da la güsta vart cha la barchina cupicha e tuot as najainta e Tü hest pos e poust regner oramai be pü in 2 linguas. (Politica chantunela)

  • Tü est regent ma Tieus adversaris sun stos buns, cun ün mantlign grec ridicul, da fer soffler ils vents cunter Te. Üna burrasca fraida prouva da’T bütter our d’chanvo – ma Tü nu dest luoch. Cul temp es gnieu intrigo telmaing cha dafatta Tieus conregents as separan da Te, els At piglian davent ün decasteri zieva l’oter. Dafatta Tieus amihs dal partieu At sbüttan, ma Tü nu dest luoch. Tü sortast dal partieu e restast inavaunt illa regenza – sainza dovairs, ma cun success! Pür cur cha Tieu temp es accumplieu At retirast scu previs ed uossa giodast Tia meriteda pensiun. Üngün nu discuorra pü da Te. Quecò schi es success! (Politica chantunela)

  • Success hest, scha tü est cusglier naziunel, tuot chi at tscherniss scu regent, ma Tieu partieu do la preferenza ad ün oter. Quel perda la tscherna cunter il candidat d’ün oter partieu... „E che vess quecò da chefer cun success?“ am dumandast. Buna dumanda. Per ün u per l’oter es quecò in mincha cas sto ün sacre bel success. (Intrigas dal partieu)

  • Tü est collavuratur sflurieu d’ün periodic sto imbalsamo chi es vi dal resüster. Tü At hest piglio avaunt dad inventer cas straordinaris da success. Ün success inudieu füss que scha tü perdessast pür tar tieu ultim exaimpel tieu ultim lectur. U füss que forsa dafatta üna lectura chi vess gieu taunta pazienza? Tieu success füss in mincha cas tuottafat inaspetto. (Success persunel)

 

göri

 

 

 

 

 

 

09/2004

Che es success?                  

 

Impè da der üna definiziun da quist term cun spectrum vast prouvi dad enumerer exaimpels pussibels our da differents champs chi muossan che chi es success. Ils exaimpels sun spüramaing inventos e scha qualchün craja listess da chatter tschertas parallelas cun cas reels ho’l dad attribuir quellas sumgentschas a sia egna fantasia (e’s stu lascher plaschair la remarcha cha tar sia fantasia nu’s tratta que da la pü netta).

  • Success hest, scha tü est pittur, hest vivieu bainschi üna vita da murdieu, ma zieva 150 ans pejane 80 milliuns per ün unic da tieus queders. (Cultura)

  • Ziev cha tü est steda ans a la lungia üna povra fluretta sblecha – sainza bod üngüns insects ma cun quantiteds da meil – hest ün bel di iffino ün expert da marketing chi t’ho fat ün nouv vstieu in culuors da pumpa ed uossa at visiteschan schurmas d’insects, schabain cha meil nu poust pü der bod üngün

  • quel hest druvo per pajer l’expert. (Hotellaria)

  • Tü est cusgliera naziunela, ma Tia politica nu plescha als capos da Tieu partieu. Il pü gugent At büttessane our, ma sper Tia intelligenza excepziunela e dischagreabla als capos, possedast eir üna granda popularited e ramassast regulermaing bgeras vuschs. Ils capos At claman dimena per sclarir la chosa (chi es già lönch clera a tuots). Tü nu müdast Tia frisura niauncha zieva il schlass levacho dals capos e tuot vo inavaunt scu aunz. Gratulaziuns! Tieu success es tuottafat excepziunel. (Politica da partieu).

  • Tü est benestant. Ma disfurtünedamaing hest pers ün bun amih tres l’agir meskin dad üna naziun cunter Tia glieud. Tü clappast üna rabgia potenta cunter quella naziun, At mettast insembel cun da Tia glieud e planiseschast cun els insembel ün attentat spectaculer ch’üngün nu po survzair. Tia naziun adversaria es schockeda e‘s sainta uossa legitimeda da desdrüer tuot que chi sül muond la secca. In Tieu nom occupeschane ün pajais inter ma Tü vainst da sguinchir u almain da fer crajer cha Tü sajast sguinchieu. Il resultat finel es cha l’ira s’augmainta e la cifra da rabgiantos scu Tü crescha ad ün crescher ed uossa già la prosma naziun chi’s sainta legitimeda da desdrüer tuot que chi la secca ed insomma Tieu success es oxorbitant. (Politica mundiela)

 

göri