il Chardun

revista  rumantscha independenta

CH - 7559 Tschlin

fon 081 866 36 76

IBAN CH

11/2004

Figl: Tü bap, sast tü co chi’s disch spitzfindig in rumantsch?

  • Bap: Spitzfindig, maa... sast char figl, il tudais-ch es üna lingua cun ün s-chazi da pleds bler plü grond sco il rumantsch. Guarda üna vouta aint il dicziunari. Di’m figl, che staja scrit suot spitzfindig aint il dicziunari tudais-ch/rumantsch.

Figl: Spitzen, Spitzfeile, spitzfindig, quia è’l!

  • Bap: Legia avant!

Figl: fin, subtil, sofistic, rafinà, ün be rampigns, ün be crötschs, pedantaria, sfender ils pails in quatter, tscherchar il pail aint il öv. Ma bap, perche manajast tü cha’l s-chazi da pleds saja in tudais-ch bler plü grond. Guarda quia nus vain nouv differentas manieras da dir spitzfindig per rumantsch!!

  • Bap: schi, ma uossa stessast amo tscherner il pled adattà per quai cha tü voust dir. Ingio hast insomma clet sü quist pled?

Figl: Barba Tumatsch til ha dovrà - el d’eira ter grit!

  • Bap: Ma schi chi es stat bun da far gnir grit a barba Tumatsch, fin cha quel vain nar voula magari bler, sast!

Figl: Barba Tumasch ha let aint illa Quotidiana ün artichel sur da l’orientaziun da la LR pervi da l’introducziun dal rumantsch grischun in scoula. Il manader da la gruppa “rumantsch grischun in scoula”, Ivo Berther ha declerà cha’l rumantsch grischun dess rimplazzar ils idioms scrits e na las variantas discurridas (dialects). E quai ha apunto fat gnir nar a barba Tumasch.

 

 

 

 

 

 

08/2004

Figl: Tü bap, esa vaira cha Scuol voul fabrichar ün tunnel dad autos per ir aint in S-charl?

  • Bap: Chi disch alch simil, figl

Figl: Barba Tumasch. El disch, cha’ls da Scuol drouvan ün tunnel pels Hollandais chi vöglian ir aint in S-charl.

  • Bap: Ma be per quels pacs chi vöglian ir a vaira il Piz Amalia nu douvraraja güsta ün tunnel, ed es il Piz Amalia insomma aint in S-charl?

Figl: Barba Tumasch manaja, cha’l cumün da Scuol saja fich weise vorausschauend.

  • Bap: Figl, discuorra tantüna rumantsch, tü stoust mantegner tia lingua materna.

Figl: Barba Tumasch disch, cha’ls da Scuol sajan sabis e….e hajan fantasia per s’ imaginar il futur.

  • Bap: Taidla figl, ils da Scuol han gnü üna idea magnifica e moderna per attrar turists, eir scha’ls Hollandais sun cuntschaints sco plütost racars. E quel zich schnöss chi’d es gnü fat in tuot la Svizra sarà invlidà subit cha’ls lets dals hotels sun occupats.

Figl: Ma, barba Tumasch nu manaja cha’ls Hollandais vöglian ir a l’hotel, tuot ils Hollandais vöglian para gnir a star tuot an aint in S-charl.

  • Bap: Barba Tumasch es bluord, quels nu vessan gnanca lö tuots aint a là.

Figl: Barba Tumasch manaja cha Scuol fabricha, subit cha’l tunnel es fat üna Satellitenst.. s-chüsa, üna cità da satellit da S-charl fin aint illa Alp Astras cun chastè e tuot pel rai e per la princessa Amalia.

  • Bap: Ma quai es propi ün’idea idiotica da barba Tumsch, perche vessan ils Hollandais dad ir a star in Svizra, quels han ün pajais bel, situà sper il mar, planiv, plain tulipanas e nu sun adüsats vi da muntognas.

Figl: Barba Tumasch disch, cha’ls Hollandais sajan in cas fich cuntaints da pudair gnir in Engiadina cur cha’l mar va sura pervi cha las temperaturas s’augmaintan e fan alguar ils vadrets e’l glatsch dals pols. Chi darà amo oters pövels chi abitan sper il mar chi tschercharan ün nouv pajais e cha’ls Hollandais sajan lura in mincha cas al süt.

06/2006

Figl: Bap, es que vaira cha’ls Samedrins sun insaziabels?

  • Bap: Chi disch que, figl ?

Figl: Barba Tumasch disch, cha’ls Samedrins vöglian maglier tuot causa ch’els haun l’intenziun da fabricher il pü grand Winterfahrtrainings-Center da la Svizra.

  • Bap: Figl, discuorra tuottüna rumauntsch, tü stust mantegner tia lingua materna!

Figl: Ils Samedrins vöglian fabricher il pü grand center daaaa…, bap cu as disch que Winterfahrtrainings-Center in rumauntsch?

  • Bap: Center daaaa…, che mê vess que insomma dad esser?

Figl: Barba Tumasch disch, cha que saja üna granda pista da glatsch e cha sün quella as possa imprender ad ir cul auto mega svelt intuorn las curvas.

  • Bap: E perche as stuvessa savair ir cul auto sül glatsch sco ün mez nar?

Figl: Barba Tumasch disch, cha quels crajan cha l’ir cul auto dvainta uschè pü sgür eir sün via e cha a Samedan hegiane auncha plazza dich ed ed avuonda giò la planüra sper la plazza aviatica. Ed ün po spüzza e canera daplü o damain nu quinta, managia barba Tumasch.

  • Bap: So, so, managia barba Tumasch.

Figl: Barba Tumasch disch, cha in quella zona d’industria da Samedan vegna insomma fabricho tuot que cha las otras vschinaunchas nu vöglian, per exaimpel eir üna Mineralwasserabfüllanlage, s-chüsa ün implaunt per imbutiglier ova minerela per San Murezzan ed üna halla da glatsch artificiel per tuot la regiun. Impü vöglia fabricher il Coop eir auncha ün center da “Do it”

  • Bap: Taidla cher figl, ils Samedrins haun investieu bgers raps pel nouv let dal Flaz e per revitaliser l’En. Uossa es Samedan sgür dad innundaziuns, perche nu vessan els da profiter da quista situaziun allegraivla? E lura, ils Samedrins vivan in Svizra ed in Svizra regna la democrazia e’ls Samedrins paun as duster sch’els nu vaun d’accord cun lur autoriteds cumünelas, il pü tard tar las prosmas tschernas e tü fessast meglder da fer tias lezchas impè da tadler adüna que cha quinta barba Tumasch.

 

 

 

 

 

 

04/2004

Figl: Bap, che es vairamaing üna corifea?

  • Bap: Chi discuorra da corifeas, figl?

Figl: Barba Tumscha disch, cha’l professer Brändli da l’ETH a Turich saja üna corifea tar dumandas dal trafic public.

  • Bap: E che ans vo tiers a nus quel professer e sieu trafic public?

Figl: Il professer Brändli es da l’avis, cha sbandir il bus d’Engiadina our da las vschinaunchas füss la pü granda tuctaria cha’ls Engiadinais pudessan fer, managia barba Tumasch.

  • Bap: Schi schi, quel professer ho bun dir, el nu stu ir cul auto tres las giassas da nossas vschinaunchas e spetter cha’ls bus dal trafic public sajan finelmaing passos speravi. Scha’ls bus d’Engiadina as fermessan be a l’ur da las vschinaunchas e passessan be speravi, vessans bger damain trafic tres las vschiaunchas, quelo es garantieu.

Figl: Barba Tumasch managia, cha’ls Engiadinais nun hegian imprais ünguotta our da la problematica da las staziuns da la Viafier retica memma dalöntsch davent da las vschinaunchas, per exaimpel la staziun da Guarda e Ftan. Ils abitants da Guarda e Ftan sajan perque dependents dal auto e nu giajan cul tren.

  • Bap: E che ho quelo dachefer culs bus d’Engiadina?

Figl: Barba Tumasch disch cha’ls bus dal trafic public sajan Feinverteilers.

  • Bap: Figl, discuorra tuottüna rumauntsch, tü stust mantegner tia lingua materna!

Figl: Ils bus dal trafic public stöglian as fermer lo inua cha’s rechatta la glieud disch barba Tumasch. Tuot quels esters chi piglian hoz il bus d’Engiadina per ir culs skis, gessan darcho cul egen auto sch’els stuvessan chaminer fin giosom vschinauncha cun quels s-charpuns melprüvos, managia barba Tumasch, e cha lura ils bus d’Engiadina füssan vöds e las vias auncha pü ferm stoppedas cun autos.