il Chardun

revista  rumantscha independenta

CH - 7559 Tschlin

fon 081 866 36 76

IBAN CH

08/2004

Clo Duri Bezzola                    

 

(bck) Cur cha nus vain cumanzà quista prümavaira culla pagina dal CHARDUN ha telefonà eir Clo Duri Bezzola ed ha dit, ch’el vöglia eir scriver minchatant üna columna pel Chardun, ch’el haja bainschi daspö ün pêr ons cancar e saja dependent d’üna sopcha cun roudas ma cha quai nu l’impedischa da scriver. Id es lura rivada sia prüma contribuziun ed uossa es pervgnüda la nouva da sia mort.

Eu n’ha tut ils Charduns da plü bod giò’d curuna e n’ha cumanzà a sfögliar ed a leger ils DIARIS cha Clo Duri ha scrit dürant ons. El vaiva ün s-chazi da pleds vast e vairà, seis diaris sun critics, descrivan detagls minuzius e sun listess diaris plain umur chi dan prouva da seis plaschair vi da la vita e da sia amur pel prossem.

Malavita ha la mort premadüra tut massa bod la penna our’d man a Clo Duri Bezzola.

 

 

 

 

 

 

07/2004

(bck) A do simplamaing temas chi’s preschaintan scu sün ün tablet sainza cha’s vess discus che chi dess gnir tratto. Quist mais es que la tscherna dal nouv cusglier guvernativ chi dess esser tenor giavüsch dal PPS in prüma lingia ün promotur dal svilup e na ün rapreschantant dals paurs u magari perfin ün advocat chi focusescha sia lavur süls interess da terzas persunas. Inundaziuns, Flaz e lejs impè da plazzas aviaticas es il seguond tema da quista pagina dal CHARDUN e nevaira, tschincuns v.d. raps es insomma adüna ün tema irritand. (Fin da redacziun es adüna als 20 dal mais.)

 

 

 

 

 

 

06/2004

Il tema il pü important ed actuel in Europa sun pel mumaint las maestraunzas da ballapè i’l Portugal. Sport es eir ün dals temas dal Chardun da quist mais. Da sport e politica, sport e duonnas e dal stadion da ballapà da Turich s’occupa la marella critica dad Onna Maria Depuoz. La discussiun davart ils gös olimpics in Svizra e la dumanda scha Laax e Lai pudessan eir taglier giò ün töch da la tuorta e profiter economicamaing nun es pel mumaint uschè actuela scu las maestraunzas da ballapè, ma quels progets couschan permanentamaing eir scha nu’s oda bger. D’üna sort da sport as tratta que eir tar las intenziuns da las autoriteds da Samedan, da der il permiss pel pü grand center svizzer per imprender ad ir cul auto sül glatsch. Cha las reacziuns da la populaziun sün quellas intenziuns sajan stedas positivas, ho scrit d’incuort il cussagl cumünel.

E lura, ün tema brisant es il rumantsch grischun, quel nu suos-cha neir na mancher aint il Chardun da quist mais. E tenor tradiziun dal CHARDUN vegnan trattos eir temas trists in möd umoristic e critic. Ils Grischs sun stos ultimamaing in tschercha da la basa, a do tips chi sun adün’auncha landervi a tschercher!