10/2010

Il prestisch dal rumauntsch es creschieu cuntinuedamaing daspö ch'eaum'algord.

 

Cur ch'eau d'eira auncha ün tracagnot m'algordi cha que daiva prunas da creschieus chi lagnaivan a l'avierta cunter nossa lingua ed auncha i'l gimnasi a Samedan vaivans ün magister da tudas-ch chi faiva schnöss da nus Rumauntschs, saja pervi da nossa pronunzcha dal pled "Kopf" inua cha zieva il "K" gniva dalum l'"o" impè dal "h" chi seguiva tar quels da lingua materna tudas-cha, u saja que in spredschand tuot que cha nus scrivaivans e dschaivans.Hozindi sun bgeras magistras e magisters da quel gimnasi chi ubain imprendan svessa rumauntsch ubain cha'd haun noscha conscienza da nun imprender nossa lingua – ma da fer schnöss aviertamaing craj cha que nu vain adimmaint pü ad üngün.Curius es cha tals iffaunts nu s'ho müdo daspö mia infanzia ünguotta: Ils scolars da süsom l'Engiadina fin pü u main a Zuoz discuorran invidas rumauntsch traunter pêr. Il rumauntsch nun ho dafatta üngün prestisch tar els. Rumauntsch es la lingua dals poppins. "Poppisproch" – uschè am vaiva dit ün mattin chi's sentiva surour la perioda da poppin cur ch'eau al vaiva dumando perche ch'el nu vöglia discuorrer rumauntsch cun me.Eir illas classas otas nu's fo que bain da discuorrer rumauntsch scha's voul esser bainvis tals collegas, cuntuot cha in generel poch a poch crescha la bainvuglientscha vers il rumauntsch darcho zieva cha'ls iffaunts haun passo üna tschert'eted. E passeda la puberted, as po adüna darcho observer cha singulas persunas admiran darcho vi e pü il rumauntsch – be cha per alura propi eir discuorrer rumauntsch i'l minchadi nu basta quell'admiraziun in generel listess na. A Samedan inua cha la scoula bilingua es gnida introdütta già avaunt püss ans observi adüna darcho il seguaint fenomen: Tuot ils creschieus da Samedan, taunt quels da chesa our Rumauntschs cu quels dad otras linguas, discuorran tudas-ch culs iffaunts sün via – eir scha que es teoreticamaing cuntschaint a tuot chi abita a Samedan cha mincha scolar e scolara samedrina so eir rumauntsch. Cu esa da declarer quist curius fenomen? Adattan in quist cas ils creschieus lur scala da prestisch a quella dals iffaunts? Ma eau craj cha la resposta es pü simpla: Eau varo be surstimo il prestisch cha la lingua rumauntscha gioda hoz cur ch'eau m'he miss a scriver quist cumponimaintin.

 

 

göri

 

 

 

 

 

07/2010

Salvamaint tres transparenza             

 

L'umanited es hoz confrunteda cun ün dals pü grands problems da sia istorgia. A do nempe glieud chi nu muossa lur vista e quecò significha ün prievel extrem per l'umanited. In prüma lingia as tratta que tar quist problem da duonnas muslimas chi portan la burca, ma a do eir otra glieud chi's zoppa! Pigliainsa be tuot quels motociclists cun lur öglieruns e chaplinas ma eir ils pumpiers da salvamaint scu eir ils sudos in exercizi cun sü mascras da gas, ma eir oters cas urgiaints scu taunt millis da Niculaus als 6 december e güst'aunch'üna vouta taunts mascros düraunt il carnaval - per manzuner be üna part da tuot ils cas catastrofels chi imnatschan la societed umauna. Adüna davaunt ögl quist prievel enorm m'es gnieu il straglüsch da salvamaint l'oter di ed eau sun persvas cha cun ün pô buna volunted da tuot las varts pudaro gnir resolt facilmaing quist pü grand problem da l'umanited. Nus vivains bain i'l 21evel tschientiner, na? L'umanited ho sviluppo nouvs materiels, na? Tuot ils cas manzunos dad inmascramaint paun gnir scholts scha'ls purteders da tels as procuran materiel transparaint. Our da quel fabrichan els lur mascra u mandura da töff u mascra da gas, lur barbunas u lur burca e già saro scholt il pü grand problem da l'umanited dal 21evel tschientiner. Grazcha per l'attenziun.

 

göri

 

 

 

 

 

06/2010

REPOWER             

 

Rätia-Energie ho dimena müdo nom. Ella as nomna uossa re-power, quecò voul forsa dir "forza REgenereda" ubain "forza d'energia REtica" u forsa es que üna scurznida da "puRE-power", qualchosa cha la REpower blaga eir in mincha occasiun cun milli tuns e vuschinas dutschas. Que es simplamaing stupend, quista REclama da la REpower. Ella es la pü netta, la pü collieda culla natüra, ella REnascha ed es la pü verda. Perche ho'la insè müdo nom? Perche nu d'eira "Retica" pü bun'avuonda? La ipotesa la pü plausibla es quella: Daspö cha quista societed d'energia es vi dal investir in üna grand'ouvra da cravun in Germania ho l'uffizi grischun da turissem pretais – in ün scrit secrettischem - cha quist "retica" vegna s-chasso our dal nom. Il ris-ch da perder üna pruna giasts our da la Germania es memma grand. Cun ün oter nom invezza üngün nu bada cha que as tratta cò da nos chantun net e pür. Cha 46% da las aczias da la REpower appartegnan al chantun grischun nun ho da savair üngün e nu dessa dimena neir gnir musso già cul nom! Ma forsa haune eir müdo nom be già cha ün dals pü ots in quista societed s'agitaiva cha ils custabs finels da "energia retica" al traivan adüna adimmaint ün pled ch'el vaiva daspö ans pruvo da sbandir our da sieu muond: "... etica." Cun REPOWER es quel pled sbandieu definitivamaing.

 

göri

 

 

 

 

 

 

04/2010

Signet abüso

 

Avaunt ün pêr ans d’eiran mia tanta e mia mamma abitantas da la dmura d’attempos e da la dmura da chüra a Promulins. Nus d’eirans grats e cuntaints in famiglia dad avair ün lö inua ch’ellas gnivan chüredas bain. Da quel temp d’eira gnieu creo ün nouv signet ed eau m’algord ch’ün cuntschaint da me am vaiva dit: “Che cha quels vaun a spender raps per nouvs signets, cò vess bain bastieu il vegl!” Ma eau nu d’eira brichafat da l’avis cha que sajan raps büttos our da fnestra: Il nouv signet vaiva mantgnieu l’ideja da la puscha, ün bel purtret per madüraunza e per musser cha tuot passa ma cha’d es eir spraunza cha’l sem da la puscha porta inavaunt la vita, ma intaunt cha’l vegl signet d’eira sto ün disegn naturalistic schi quist nouv d’eira concipieu scu segn, insomma scu logo, ed eau d’eira tuot superbi dad esser eir eau part da quista bun’instituziun. Taunt pü schmort suni sto cur cha d’he quist an gieu dad inscuntrer a quist signet sün ün fögl volant chi faiva reclama politica. Chi po be as permetter da druver “mieu” signet per üna propaganda chi vo cumplettamaing cunter mia ideja? Intaunt la votaziun es fatta, la concurrenza dad architectura vain invieda e tuot fo sieu gir. Eau pudess metter mieu cour in pêsch. Tuottüna am pera que necessari da revgnir a quist fögl volant - na per vulair marmugner dal passo ma per avair sclarieu la chosa pel avegnir. Che vess dit la vart aderenta d’üna chesa da chüra davous l’ospidel scha nus – chi vulaivans ponderer scha Promulins saja propi da sbütter a priori scu lö e que sainza stüdi – vessans decoro nos fögl volant cul signet da la dmura? E che dschessan noss hoteliers, scha ün di l’organisaziun da turissem d’Engiadin’Ota giavüschess qualche milliun per üna sela da congress ad Arosa (fand valair cha saja dad esser solidaric cun noss chantunais turistics), e tar la votaziun correspondenta s’inserviss l’organisaziun dal logo deraso hoz tres tuot las instanzas e tuot ils affers d’Engiadin’Ota cun mincha scrit e placat? Quel logo ho bain il dovair dad unir la populaziun e da’ns fer sentir tuots respunsabels per nossa regiun! Am do da buonder scha noss hoteliers füssan cò perinclets cha’s possa druver il signet cumünaivel per fögls volants d’ün’ideja unilaterela politica!

göri
 

il Chardun

revista  rumantscha independenta

CH - 7559 Tschlin

fon 081 866 36 76

IBAN CH