il Chardun

revista  rumantscha independenta

CH - 7559 Tschlin

fon 081 866 36 76

IBAN CH

12/2010

La margaritta antibotanica           

Ün'istorgetta plüchöntsch trista

 

"El m'ama, el m'ama, el nu m'ama....!" Fond quista prümavaira üna spassegiada n'haja dudi quist cuntschaint 'oracul' da trais giuvnettas chi's vaivan plachadas sün ün muot dasper la via champestra. Eu am n'ha badantà ün mumaint. I d'eira ün di bellezzas, sco fat aposta per far simils gös. "El m'ama...!" ha güvlà üna da las mattatschas. "Che? Quel pöst!" ha sgiomgià ün'otra.Las giuvnettas vaivan aint da quels outfits modernischems chi nu's cunfaivan cun quist gö zaclign chi's dschess our d'moda: "University of Oklahoma, MENEM, I love me!!!" La nostalgia nu's lascha para sragischar usche facil! E la brama neir brich!Ma l'istorgetta chi vaiva cumanzà uschè benignamaing nun es malavita amo glivrada.

Giond inavant e passond dasper il plazzal da la viavant STUAG via m'ha dat in ögl il logo, v.d, il signet da la firma successura Implenia, da la plü gronda firma da fabrica svizra. Quella appartegna per gronda part al nouv cusglier federal Steiner-Ammann. (Cha quel es gnü tschernü nun esa da's dar da buonder. O?) E lura? Il signet? Üna margaritta per üna firma da fabrica!Per quel gener da firmas chi sepulischan mincha secunda 1 m2 terrain svizzer. Dimena üna flur sco simbol perverti! Cinissem e sarcassem concretisà o illustrà.

Cha politikers scadents van a tscherchar alch occupaziun per passantar lur 'temp liber', quai es legitim. I pudessan far da tuotta sorts assistenza per conumans in bsögn, far transports da paziaints, ingaschamaint cultural e social etc.Quai vala - s'inclegia - eir per politikers grischuns! Seguond che mandat da cusglier administrativ chi surpiglian 'savura' quai da corrupziun dürant lur temp d'uffizi. Eu n'ha be dit, chi s a v u r a!

Da guadogn nun hana sgür brich dabsögn, cun lur amplas pensiuns! O?Ed uossa va il vegl cusglier federal Leuenberger as metter a disposiziun da la firma da fabrica cun la margaritta!!! Bainschi craja el da pudair avair ün'influenza sülla firma reguard protecziun da l'ambiaint. Eu crai cha quista clamada saja plüchöntsch ün alibi per la firma, ed eu crai, cha Leuenberrger saja ter naiv.

Cha politikers scadents stopchan eir dvantar decadents, quai - almain aint illas stailas - nu stat scrit.

 

Jacques Guidon

 

 

 

 

 

08/2010

Il test d'Ibrahim per eruir co chi stetta
cun üna regiun               

 

"Scha tü voust savair, sch'üna regiun es povra o richa, schi be fa surasèn dals recipiaints d'immundizchas. Scha tü nu vezzast ne immundizchas ne recipiaints, lura es la regiun fich richa. Scha tü vezzast be recipiaints, ma ingünas immundizchas, lura es la regiun richa. Scha tü chattast immundizchas dasper ils recipiaints, lura nun es la regiun ne povra ne richa, lura è'la simplamaing üna regiun turistica. Scha tü vezzast percunter be immundizchas, ma ingüns reciapiaints, lura es la regiun povra."

 

our da Eric-Emmanuel Schmitt, Monsiuer Ihbrahim et les fleurs du Coran

 

 

 

 

 

02/2010

P O L O

 

Meis perguaià chavà
meis zelus Pegasus
S’ha plachà –
ma di be tü, che viz!
Sül laj da San Muriz.

Pür am dumandai
Ma perche quai?

Svolond be suravia,
ha’l vis cagiò la tim nöblia
quella comme il faut
dal Polo.

I til paraiva stran: chavals invia ed innan
insomm’ün singular travasch.
Sün quai cun grond fracasch
s’ha’l intermiss i’l gö
sadajond e spüdond fö,
cha l’event es i in paglia
da quist’acziun da vaglia.

Our’d clocca il turissem Engadin
m’ha dit, cha quist varà ’na mala fin!
Ma eu be am darà la paina
da scurznir la purziun d’avaina
da meis zelus
tapfer Pegasus.