il Chardun

revista  rumantscha independenta

CH - 7559 Tschlin

fon 081 866 36 76

IBAN CH

02/2010

L’arsaja

 

Eu chat cha’l deport da noss atlets a Vancouver nun es absolutamaing na sportiv, schi, el es dafatta sainza diplomazia. Nö zich svizzer! A quists nars da sveltezza süllas pistas manca propcha la sensibilità per la situaziun politica dad hoz. Nos pajais stà fingià sül banc dals achüsats pervia da nossas bancas chi fan curius affars cun discs cumpacts e cun datas da cliaints e quists atlets demonstreschan a Vancouver in ün möd exemplaric l’arsaja dals Svizzers dad avair or. Sco cha quist Defago fila giò per las pistas e co cha quist Ammann es sigli! I’s vezzaiva l’arsaja fingià pro la partenza. I lura Dario, quel glüschiva eir sco ün marenghin cur ch’el ha bütschà la naiv. Eir sch’üna medaglia ha be ses grams or schi vendscha malavita listess l’arsaja dad avair üna medaglia in busacha il spiert olimpic. E perche es quai uschea? Perche cha’ls Svizzers cugnuoschan il predsch da l’or e san cha quel es ot. Oters pajais chi han eir crisas politicas as cumportan in möd plü radschunaivel e cun daplü tactica. La Libya per exaimpel ha decis da na tour part als sigls culs skis per na blamar als Svizzers amo üna jada. Eir ils plü svelts curriduors da cuorsa aval da l’Iran han stuvü - sün cumond dad Ahmadinedschad - desister a la cuorsa aval. Là haja gnü nom ch’els stopchan star a chasa e güdar a prodüer uran. Als atlets svizzers es quai precis listess che chi fan tschels. Immez la crisa tanter Berna e Berlin cuorrna e siglna als Tudais-chs davant il nas via süls podests. La Germania spetta be süll’occasiun per tour vendetta. Per mincha medaglia d’or cumprarà Angela Merkel ün dc cun datas e metterà quels intuorn culöz e là esa lura aint daplü or co be ses grams.

Giovannina T., Tschlin 17.2.2010