il Chardun

revista  rumantscha independenta

CH - 7559 Tschlin

fon 081 866 36 76

IBAN CH

12/2010

Duonnas dapertuot        

 

"Ma inua sune?"

"Chi?"

"Ma ils hommens!"

"Che hommens?"

"Ils hommens in generel, magisters, cusgliers federels, students, eau vez be a duonnas dapertuot."

"Öh, uossa exagereschast, que ho bain aunch'intuorn avuonda hommens."

"Ma adüna damain. Eau nu se inua chasvaneschan."

"Tü managiast, l'emanzipaziun da las duonnas ils ho eliminos?"

"Redot, redot, pütöst."

"Ed uossa, che fainsa?"

"Vainsa nus duonnas da fer qualchosa cunter?... Scu adüna, las duonnas faun alura schond. Ils hommens spettan be sün que."

"E che propuonast?

"Forsa quotas?"

"U dapü peja?"

"Dapü peja nu füss mel. Cun grass as clappa las müers!"

 

Chatrina Josty

 

 

 

 

 

11/2012

L'Engiadina, nossa chara deponia      

 

L'Engiadina es üna lada vallada alpina, fuormada dals andamaints geologics da tschients da milliuns d'ons, dals vadrets e dals paurs chi cultivan daspö millennis la terra. Noss'Engiadina, üna cuntrada bellischma e fich attractiva, pels Engiadinais, per giasts e turists da tuottas sorts, interessats vi da cultura, natüra, sport, wellness e speculaziun. Tuot es «deposità» in Engiadina.Per spordscher pistas optimalas as depositescha tonnas e tonnas da naiv artificiala. Per organisar evenimaints grondischems, p.ex. olimpiadas, vegnan regularmaing adüna darcheu depositadas ideas vanagloriusas e narras. Per cha las ballas da golf possan gnir depositadas vegnan chavadas fouras dapertuot aint ils prads. Per giovar a golf as stoja pudair depositar blers raps, golf es ün sport cuostaivel. Tant da las deponias dal sport.Ils raps giovan - sco dapertuot - eir in Engiadina üna gronda rolla. Ma la particularità da l'Engiadina sun las deponias dals pliffers in fuorma d'immobiglias sco appartamaints, chasas, villas, stallas e tablats. Viva la speculaziun! Il pês per la cuntrada sun las fouras immensas, adüna plü grondas, chi vegnan chavadas per stabilimaints nouvs. Las massas da s-chav dvaintan plü e plü problematicas. I nu's sa plü ingio ir cun tuot. Ün impressari ha gnü la stupenda idea da depositar seis s-chav in ün cuntschet da lavinas, fich dasper a seis fabricat. Pratic, nesa? Las dimensiuns füssan stattas gigantescas: ün volüm da 100'000 meters cubic, üna lunghezza da 170 meters, üna largezza da 27 meters e l'otezza da 12 meters, ils cuosts: 4 milliuns. Nossa chara deponia, vairamaing! A prüma vista es la fabrica d'ün cuntschet tanter spuondas üna buna roba. Ma quist cuntschet füss stat pel giat, vess sgradà complettamaing la cuntrada magnifica. Ingün nu til ha vuglü, cun excepziun dal impressari, ün da Cuoira. Ils paurs chi vessan pers bler bun terrain agricul, ils abitants sco eir las instituziuns da la protecziun da la natüra han fat recuors cunter il proget absurd, cun success. Quist'istorgia dal cuntschet muossa, ch'in Engiadina i nu's sa plü, ingio chi's po ir a depositar. Forsa as pudessa depositar tschertas robas aint ils lais e guadagnar uschè amo nouv terrain da fabrica? L'Engiadina sainza lais – amo adüna attractiva?

 

Regula Bücheler, Brail

 

 

 

 

 

10/2010

«Ballairatt» – a sotan las rattas! U forsa pütöst ils squals?

 

Vais udieu eir Vus Rumauntschs dals placats tessinais "ballairatt", creos da la secziun tessinaisa dal PPS (Partieu populer svizzer)? Per quels chi nun and saun nouvas: as tratta d'ün placat chi muossa ün chaschölun. Ün chaschölun chi simbolisescha la Svizra. Ün chaschölun chi attira las rattas. Rattas taliaunas e d'oters stedis da l'Uniun europea, chi faun pera üna vita da mich'e lat grazcha a nos chaschölun elvetic. Cler cha'l placat ho provocho polemicas. D'üna vart pü cu 45'000 cunfiners taliauns – sparmalos a mort. Da l'otra vart üna part dals pü cu 300'000 abitants dal chantun Tessin – sparmalos a mort. Ils üns perche cha's saintan discriminos, ils oters perche cha nun haun lavur. Ed uossa vainsa il chaschöl! Ün vaira chaschöl. Quels da quista vart dal cunfin vöglian cha las rattas tuornan al pü svelt pussibel darcho in lur tanna. Quels da l'otra vart nu sun pü pronts da renunzcher a la manuocha gustusa. Ed in tuot quist battibuogl d'inculpaziun e cunterinculpaziun as perda la survista. E scu cha pera eir il saun inclet. Cha'l diavel porta! As rendais insè quint che gö chi vain giuvo? As rendais quint cha quels chi'ns frizzan sü cunter las "rattas", sun precis quels chi las attiran? Quels chi sbregian il pü dad ot cunter ils esters in Svizra, sun quels chi'ls iffinan. Per pejas misras. Adüna pü misras. Privand uschè a nus indigens da pejas meritedas e legitimas e viepü eir da nossas plazzas da lavur. Nos chaschöl es in prievel – que es üna chi'd es sgüra. Tmair nu stuvains però in prüma lingia rattas u oters ruzgigliaints, dimpersè ils squals chi tegnan in maun il timun da nos guvern, da l'industria e da l'economia. Els faun ün vaira chaschöl cun nos chaschöl. Our da spür'ingurdia. Po esser cha las rattas sotan a noss cuosts, ma'ls squals ün di ans startagliaron.

 

Bettina Secchi-Fluor

 

 

 

 

 

09/2010

Scha…             

 

Scha…
que gratagia a la Engadinerpost Posta Ladina dad impiegher schurnalistAs creativas da lingua rumauntscha per realiser bunas cuntribuziuns süllas nouvas paginas digitelas – lura ho'la eir in avegnir abonents… e nus giodains auncha dapü artichels interessants in nossa lingua. Eviva la Posta Ladina. Dimena, magisters dal s-chelin ot intimè da scriver cumponimaints a noss scolars, per cha'd hegians eir damaun schurnalistAs rumauntschas criticas e creativas. Minchatunt faun ün ed ün duos!

Scha…
tuot ils Rumauntschs abunessan scu gest minimel da solidarited nossa giazetta dal di lura pudess crescher quel spiert da cumünaunza illa rumantschia, cun u sainza il rumantsch grischun. E tü, che s-chüsa (marscha) hest tü da nun avair abunno la Quotidiana? Daspö quella vouta cha d'eirast dischillus as ho müdo bger, sest!

Scha…
vschinaunchas chi sun hoz bilinguas negligeschan l'adöver correct dal rumauntsch, cumbain cha'd haun svess definieu in reglamaints dad esser vschinaunchas bilinguas e cumbain cha vains hoz la ledscha da linguas… Chi controlla, chi s'intermetta, chi po achüser? Stuvains introdüer üna gruppa independenta chi controlla ed achüsa? …. Reglas e ledschas sainza controllas e sainza sancziuns nu funcziunan!

Scha…
nus ans permettessans da dumander: "A'm do be da buonder quants raps cha'l Chantun da our per la lingua tudas-cha!" E scha nus ans permettessans da declarer:"Quella lingua tudas-cha ans cuosta memma bger!" Scha nus ans permettessans da fer telas dumandas e remarchas, sgür cha que dess politikers (forsa eir rumauntschs) chi nun inclegessan aunch'adüna na, quaunt sfrunto cha que es invers nus sch'els faun telas remarchas in reguard a la lingua rumauntscha e que in ün chantun triling. Scha nus durmins al fos mumaint, poch güda da fer ün sbragizi zievatiers!

 

Maria Marmuogn

 

 

 

 

 

08/2010

Vacanzas O che bel cha quai es!             

 

Ir in vacanzas, laschar chi tuna, nu s'occupar da nöglia ed invlidar ils pissers da minchadi. Che bel da nun avair ingün'idea che chi passa in Svizra. Eu nu lej las gazettas, eu nu guard la televisiun ed eu nu taidl il radio. E meis telefonin n'haja güsta eir miss dvart. Eu nu sun simplamaing na quia. Ingün nu po avair contact cun mai. Id es grondius. Ils Leuenbergers, Merzs, Blochers ed ils Tonis nu m'occupan. Che sentimaint da libertà!

Forsa as stoja propi far be quai per avair ün sentimaint da vacanzas. Far sco scha'l muond nu füss plü quia. Quà ingio ch'eu sun esa eir ün zich muond mo eu nu m'interess per quel zich e neir na per quai chi capita quia…..

Vairamaing as pudessa avair quist sentimaint da vacanzas eir a chasa sainza ir dalöntsch davent e pajar üna pruna pel viadi e pels hotels e lapro eir amo spüzzantar l'ajer. Perche be as vaja adüna plü dalöntsch pussibel in vacanzas? Eir a chasa as pudessa as retrar in ün chantun ed ignorar ils mezs da massa. Pro'ls kiosks as stuvessa simplamaing ir dasperavia e guardar da tschella vart perche là penda adüna l'infuormaziun importanta vi da la paraid.

Eir als cuntschaints as stuvessa evitar dad inscuntrar perche quels quintessan dal sgüra darcheu tuot las novitads e las vacanzas füssan a fin. Il meglder füssa da gnanca ir our d'chasa. Forsa eir da trar nan las tendas per chi nu's vezzess propi nöglia. Perche uschinà as vezza l'avra e schi's vezza l'avra as pensa subit als paurs e quels nu sun mai cuntaints, perche bod esa massa chod, massa fraid, massa bletsch o massa süt i lura es il stress e la cumpaschiun fingià darcheu quia. Schi, las tendas paran propi importantas. In lügl ed in avuost as vezza nempe bleras chasas in Svizra cun trat las tendas o cun üschöls serrats. Eu sun persvasa cha in quellas chasas sta glieud chi ha decis da far almain ün pêr eivnas vacanzas!

 

Giovannina Tratschin, Tschlin

06/2010

Dialog politic            

 

"Cuguoschast a Micheline Calmy-Rey?"

"Hej: Brün, blond, brün."

"Che brün, blond, brün? Ella saro bain cotschna, u na?"

"Eau discuor da la frisura! Nu sest pü, cur ch'ella es gnida eletta i'l Cussagl federel ho'la gieu quella frisura cun las franzlas, strivlas da brün e blond... Que d'eira sgrischaivel!"

"Ah, tü managiast ils mèches?"

"Hej, precis, Mècheline! Haha!"

"Ma schmetta da fer schnöss dad üna cussgliera federela. Que nu's fo!"

"Eau poss eir fer schnöss da la 'Bundeskanzlerin', scha tü voust."

"Managiast ad Angela Merkel? Que es in cas la duonna la pü pussaunta sün tuot il muond."

"Hejej, eau se, ün dret "Schwergewicht" è'la, hihi!"

"Que es però eir Eveline Widmer–Schlumpf, schabain ch'ella paisa il pü da tuot 45 kils."

"Quella ho üna nouva frisura, in cas. Que d'heja vis in giazetta."

"Di tü! E che ho la dit ill'intervista sper la fotografia?"

"Ho'la dit qualchosa? Eau nu craj. Ma la giazetta scriva cha sia frisura saja 'voll ans 80'."

"Aj, e povra Barla Cahannes nun es gnida eletta. Hest vis che mutsch ch'ella ho fat aint il Telesguard?."

"Svess la cuolpa. Cun quella frisura!"

 

cj

 

 

 

 

 

05/2010

La tschendra                  

 

Tenor definiziuns es tschendra material anorganic, na plü combustibel. La tschendra vain prodotta scha nus fain fö in pigna e davo cha la laina es arsa o scha nus grigliain. Schi vain runcà e scha’l god arda o scha ün vulcan es activ e schlavazza daja eir tschendra. Eir scha’ls corps umans vegnan ars i’l crematori - nus dvaintan tuots üna jada tschendra. La tschendra vala sco buna grascha. Laschain tuot las definiziuns ed interpretaziuns e tadlain l’istorgia da la tschendra: La tschendra da nossa pigna a Brail bramaiva da far üna jada vacanzas, da viagiar dalöntsch, fich dalöntsch davent cul aviun, per verer il muond, las bellezzas dal planet terra. Ella füss ligera e nu drovess sgür ingün ticket. Raps per pajer ün bigliet nu vaiv’la, nossa tschendra. Ella s’ha ditta: «Eu am pudess forsa zoppar aint illas sfessas dals sezs da l’aviun, business class, suot il chül d’ün CEO, là füssa bel chod. O lura dadoura aint ils turboreactuors, cun climatisaziun natürala. Ma ingio be less eu ir? Vers nord o süd, vers vest o forsa vers l’ost? Sün ün’isla, Cuba forsa? Restar sün terra franca, ir eventualmaing in China? O giodair la riva dal mar, surfar illas uondas da la costa orientala da l’Australia. O ir in muntogna, illas Rocky Mountains per far heliskiing?» Nossa tschendra vaiva difficultats da’s decider, la spüerta es uschè immensa e globala. Suletta nossa tschendra nu laiva partir. Perquai ha’la tscherchà i’l internet ün cumpogn da viadi, suot chiffre «dalöntsch». I nun es bod na da crajer, ella ha chattà schurmas d’interessats, eir da pitschens lös incuntschaints sco Brail, per exaimpel Hvolsvöllur in Islandia. Las tschendras s’han missas in movimaint per s’inscuntrar e svolar lontan. Bè, ingüns aviuns nu giaivan plü. Las tschendras han impedi ils svols dals aviuns, tuot las colliaziuns sun gnüdas annulladas causa il privel da dons vi dals turboreactuors. Las tschendras han impedi svess lur idea dal grond viadi. La glieud ha badà quant quiet chi’d es sainza aviuns vi dal tschêl. Cur chi nu s’ha plü pudü viagiar in lontananzas as haja badà quant bel chi’d es a chasa. La glieud ha darcheu chattà il plaschair d’üna pigna choda d’ün fö da laina. I s’ha cumanzà ad arder plü paca benzina e kerosin.

 

Regula Bücheler, Brail

 

 

 

 

 

 

04/2010

La baselgia e sias valuors

 

Avaunt ün pêr ans ho dumando mieu figl intuorn Pasqua: “Scha Gesu es mort il Venderdi Sench, perche as müda alura minch’an la data?” Quella vouta varo’l gieu var set u och ans. D’incuort ho mia figlia stuvieu scriver ün cuort cumponimaint sur da sia festa preferida. Insè saja que la festa da Nadel, m’ho’la tradieu, ma cha in fuonz nu sapch’la pü scha l’istorgia da Nadel saja propi vaira. “Chi po cumpruver cha Gesu es naschieu illa not dals 24 als 25 december?” Ella ho ündesch ans. Sch’ün mat da set-och ans ed üna matta dad ündesch ans faun da quistas ponderaziuns, am duni da buonder cha milliuns d’umauns creschieus e sculos nu cumainzan eir els as fer tschertas dumandas. Cu es que pussibel, ch’els sustegnan ün’instituziun chi ho suottamiss cun mezs crudels e brutels innumbrabels pövels uschenumnos pajauns? Ün’instituziun chi ho chalcho tschientiners a la lungia e chi chalch’aunch’hoz la forza e la potenza da la duonna? Ün’instituziun chi predgia modestia ed ümilted e chi a sieus rapreschantants “divins” conceda da viver in palazis e da purter saida e craps prezius? E finelmaing ün’instituziun chi protegia dafatta sieus preirs pedofils? Che stu auncha capiter per cha’ls buns cristiauns sdasdan da lur letargia? Per cha badan sün che fundamainta marscha cha l’instituziun baselgia es fabricheda? Inua sun tuot las valuors cristiaunas, citedas uschè suvenz? Stittas traunter dogmas, cumands e scumands. Mia figlia ho finelmaing tschernieu il Nadel scu tema. Cha l’atmosfera da Nadel la plescha zuond, ho’la scrit, eir sch’ella nu saja pü propi sgüra cha l’istorgia correspuonda a la vardet. “Ma in fuonz nu quinta que neir na taunt. Scha nus ans trattains bain e’ns respettains vicendaivelmaing, restaro Nadel adüna üna festa magica.” E na be Nadel. Tuot la vita füss darcho magica.

Bettina Secchi-Fluor
 

 

 

 

 

 

03/2010

Di da la mamma

 

Eau am giavüsch üna burca. (as disch bain “la” burca, già cha be duonnas la portan, già cha’s disch la stoffa) Eau sun gnida a la conclusiun cha quist “vstieu” nun e be ün “sdratsch” u ün sach cun cuccar. Na, la burca es il costüm , il s-chüd e panzer da la regina. Che pussaunza cha hest, scha girast cun la burca; üngün nu’t vezza, ma tü vezzast tuot. Oters haun respet u da fatta temma da te. Tia vusch dvainta importantischma ed auncha dapü tieu taschair. Schi. Eau vuless avair üna burca. A stu esser ün sentimaint grandius d’esser circundo da quel spazi da protecziun intuorn te. Eau sun protetta dals sguards inguords prepotents, ma eir da quels invilgius e plain critica. Grossa u stiglia , poch importa, eau stun bain. Vstieus a la moda paun ir as fer arder, eau sun libra suot mieu mantel magic. A nu do pü üngüna controlla u critica, ne dad homens ne da duonnas. Quaunts raps cha spargn scha nu vegn pü tal cuaför, na da dir! Ma eau sun eir protetta dad otras chosas: la grippa dal chuccal, quella dals utschels, eau sun al sgür. Nu clap ne cottas dal sulagl, nu patesch d’ajer curraint – eau sun al reparo. Il Segner ans ho regalo quist vstieu, al diavel culs fazöls da cho: viva la burca. Dimena pel di da la mamma am giavüschi üna burca.

Maria Barbott
 

 

 

 

 

02/2010

Il chaz forà o l’invliduoss

 

Cur chi va mal a l’economia ed in temps da crisa patischan adüna ils debels e lura esa pussibel chi vegnan suot las roudas da la güstizia. Eu less dedichar quistas pêr lingias ad üna gruppa da glieud chi staiva vairamaing fin uossa suot protecziun e chi’d es gnüda uossa, in temps da crisa da finanzas suot grond squitsch. Els sun dvantats victimas, ils povers defraudaders d’impostas. Vairamaing sun quai umans sco tü ed eu. Els nun han nöglia dachefar culs imbruogliunzs d’imposta . Na e madina! I dà üna gronda differenza e duos cleras categorias. Ils defraudaders nu vöglian in mincha cas na ingianar al stadi. Els sun umans chi han be invlidà chi han inclur pro üna banca in Svizra amo ün pêr milliuns. Quai nun es ün delict, quai es üna malatia e quella ha nom “Alzheimer”. Quai sun povrets e güsta la Svizra cun sia tradiziun umanitara es obliada da sustegner quists umans amalats. La protecziun dal secret da bancas stuvess esser in prüma lingia ün bsögn moral da la Crusch Cotschna. Mo na, no eschan fingià uschè inavant cha tuot quels invliduoss chi van sün via sainza chotschas perche chi han invlidà da tillas trar aint e quels chi giran per quai d’intuorn perche chi nu san plü ingiò chi stan gnaran surdats a la güstizia americana…. Hai, usche inavant eschna! No chi ans vain adüna defais pels debels eschan uossa landervia ad invlidar ils invliduoss. E che pudessna be far per nossas bancas? Davo l’acziun “mincha rap quinta” pudessna far ün’acziun “mincha milliun quinta” perche a quists povers bankiers esa propcha da güdar. Cur cha Grübel ha tschel di preschantà las cifras nouvas n’haja propi bod stuvü cridar ed eu n’ha survgni cumpaschiun cun el e cun tuot ils managers da bancas. Quai füss terribel schi survgnissan damain paja e forsa eir na plü il bonus. Quels vessan magari amo da vender lur Ferraris, Bentleys e Jaguars ! E che be fessna schi nu vessan plü lur villas? Inimaginabel! Eu stoss scriver a Grübel e verer sch’el nu pudess metter sü ün container da vaider a Turich illa via da la staziun. Forsa as pudessa motivar eir ad Ospel per quist’acziun ed a Christoph Meili, chi pudess surtour la survaglianza da las collectas. Quist lamantöz es propi sgrischaivel ed eu sun persvasa cha stuvain güdar. O nöglia?!

Giovannina T., Tschlin
 

duonnas, la baselgia e sias valuors - Bettina Secchi
00:00 / 00:00