08/2010

Ils festivaler e'ls indigens        

 

Uossa cha la sted es bod passeda haun fat fagot eir la granda part dals festivalers. Incredibel che cha vain tuot spüert d'insted in Engiadina. Concerts da musica classica, concerts a l'ur dals lejs, concerts da rock e da jazz, open airs, exposiziuns da purtrets, exposiziuns da fotografias, sun and symphony, films davart temas pussibels ed impussibels ed in speciel davart l'Engiadina, referats multifaris, excursiuns botanicas, excursiuns filosoficas, marchos, vernissaschas, festas sül stradun, predgias champestras, festas da vschinauncha, predgias sün alp, festas da risotto suot tschèl aviert, la festa per la sencha speciela dals Taliauns sü Marguns, la festa da las trenta tübas süll'Alp Languard per numner be ün pêr activiteds organisedas dals festivalers.
La tscherna es granda, la qualited pü buna e main buna. Chi mê sun tuot quels exposituors e referents e musicists e cineasts e pittuors e botanikers e cuschinunzs e ravarendas e fotografs e filosofs e vendeders ed oratuors? D'inuonder vegnane notiers. E chi sun ils aspectatuors? Sun que giasts chi nu saun che fer, chi haun lungurus u chi haun finelmaing temp – düraunt lur vacanzas – dad ir ad ün concert u da visiter üna exposiziun u dad ir a tadler ün referat u da's lascher orienter davart la flora alpina u dad ir a tadler las tübas u la predgia alpestra, da fer part üna vouta ad ün act champester in mangias d'chamischa ed in vestimainta da sport e s-charpas da gimnastica, els chi stöglian trer aint di ed an ün vstieu s-chür e metter sü cravatta.
Eir eau d'he fat adöver da la spüerta dals festivalers ma be in möd restret. Eau sun steda illa baselgia da San Gian a Schlarigna a tadler al Quartet Carmina ed a la clarinettista Sabine Meyer ed eir illa baselgia da San Peter a Samedan a tadler a la Compagnia Rossini. Que ho valieu la paina.
Schmancher nu suos-chi il concert da la Chantoria Engiadinaisa. Ma quella Chantoria nu tuocha vairamaing tals festivalers. Per la Chantoria Engiadinaisa eira gnida cumpreda a sieu temp la Laudinella a San Murezzan ma avaunt ün pêr ans es la Chantoria gnida sbandida our'd chesa. Ils giuvenils vessan pudieu gnir auncha in november u in meg illa Laudinella ma ils giuvenils haun vacanzas la sted e na in november ed in meg. Perque es la Chantoria Engiadinaisa uossa dachesa i'l internat da la Scoula da turissem a Samedan. Per furtüna paune auncha gnir, per furtüna ils pudainsa auncha udir…
Basta, per quista sted ils festivalers haun fat fagot. Ils festivalers da quist inviern chi vain percunter sun già vi dal organiser ma la spüerta es differenta. Ella as drizza als giasts d'inviern chi haun per part oters interess.
Restan ils indigens. Per furtüna vains eir nus nossas occurenzas per uschedir scu cuntrapais. Nossas occurenzas indigenas, rumauntschas, per exaimpel ils incunters i'l Chesin Manella u ils cuors da la Chasa Fliana. Ün bun exaimpel es sto il di in onur da Luisa Famos « ingün nu tilla ha invlidada » organiso in Chesa Planta a Samedan per la poetessa ladina chi vess pudieu festager sieu ochauntevel anniversari. Quel di es sto ün evenimaint, ün di meditativ cun prelecziuns, referats, films, musica e reminiscenzas persunelas da persunas chi cugnuschaivan bain a Luisa Famos. Ün inscunter simpatic per la Rumantschia, ün giodimaint. Grazcha als organisatuors!

 

Baldina

 

 

 

 

 

02/2010

Tschernas e votaziuns

 

bck. Ils caricaturists dal CHARDUN s’haun laschos inspirer dals temas da las votaziuns e da las tschernas dals 7 marz, els haun fat ün pêr fich bellas caricaturas.
Las discussiuns in Engiadin’Ota in vista a las votaziuns dvaintan viepü düras. Specielmaing tal credit pella concurrenza d’architectura per la chesa da chüra, previsa davous l’ospidel dvainta la discussiun viepü disgustusa. Ils partieus burgais vöglian sün mort e fin cha la chesa da chüra vegna fabricheda davous l’opidel. Els faun valair cha giajan a perder subvenziuns scha nu’s agescha dalum.
Our d’experienza as so però cha decisiuns trattas a la svelta, per bun rumauntsch as dschessa “Schnellschüsse” sun adüna pü cheras cu progets bain ponderos. La spuonda davous l’ospidel es stipa (üna visita oculera ho do la conferma), la fotomontascha la pü bella nun es in cas da müder la realited, eir sch’ella vain distribuida in tuot las chaseda! A nun es neir na gnieu sclarieu our da che materiel cha la spuonda consista. Cler, l’umaun es hoz bun da fer tuot, tenor il motto: „alles ist machbar“, la dumanda es be quaunt beton cha que drouva per fabricher in ün simila costa. Ma nischi, intrapraisas chi fessan gugent quella lavur vainsa avuonda! Ed experienzas haun quellas intrapraisas eir fat già pü cu üna in Engiadin’Ota.
Ün’otra roba cha’s savess gugent es, che cha’ls partieus burgais fessan cun Promulins, üna vouta vöd. Els argumenteschan bainschi, cha sbuder l’asil da vegls per fabricher üna chesa da chüra pü moderna chaschuness bger fracasch e bgeras incommoditeds pels inquilins e pels contuorns. Eau nu poss crajer cha Promulins chi nu serviss pü scu asil gniss fabricho our per ün oter adöver anzi, ad es pü cu sgür cha la dmura e la chesa da chüra da Promulins gnissan sbudedas. Che gniss fabricho in quel lö ideel, illa planüra cun üna bella vista vers il Bernina ? Abitaziuns “per indigens” u pütost da seguonda proprieted? Ün hotel cun abitaziuns da seguonda proprieted chi nu suottastessan al contingent? In quel reguard ho Samedan insomma “savuro la puolvra” e voul fabricher hotels a tamfun, tuots s’inclegia cun abitaziuns da seguonda proprieted (progets chi stöglian per furtüna gnir acceptos dal pövel).
Üna chesa da chüra nun es be ün stabilimaint cun 147 lets, üna chesa da chüra vess dad avair eir ün concept adatto als bsögns dals inquilins. Tar üna concurrenza da fabrica as stu pudair fixer las premissas, a nu’s po surlascher tuot be als architects. Insomma a’s stu avair temp per ponderer bain il proget e na ir cul cho tres la paraid. Al credit da 400'000 francs per üna concurrenza d’architectura esa da dir da na!

il Chardun

revista  rumantscha independenta

CH - 7559 Tschlin

fon 081 866 36 76

IBAN CH