02/2011

L'auto, idol e taimpel da nos temp              

 

Schurmas d'autos, töfs e camiuns sun passats la stà passada tras l'Engiadina e sur ils pass, occasiunond intops, retards ed immisssiuns da spüzza e canera. Eir las culuonnas d'autos vers il Vereina e quellas chi struozchan mincha fin d'eivna vers ils portals al süd e'l nord dal Gottard nu sun indizis d'üna recessiun dal trafic sün vias ed autostradas. Ils staus sun programmats dürant l'ota stagiun d'inviern i'ls centers turistics d'Engiadin'Ota. Tuot quai dà perdütta da quella deblezza umana da na vulair desister da quista comodità. Sgüramaing, l'auto es ün indriz cumadaivel e pratic. Forsa cha la situaziun nu füss uschè agravanta scha l'homo sapiensi fess adöver d'el cun daplü san inclet!

Mincha epoca, mincha civilisaziun ha seis idols chi vegnan chürats cun gronds sforzs. Ils vegls Egipzians han eret lur piramidas, ils Grecs lur taimpels. Dürant il temp medieval sun gnüdas construidas catredralas magnificas. Hoz admiraina quistas müravaglias, mo nun inclegiain adüna perche cha'ls pövels da quella jada han s-chaffi tuot quists monumaints. Plü facil na be our d'aigna voluntà!

Tschert cha nossa mobilità tant predschada, la quala no ans prestain cun grondas spaisas e sacrifizis, farà impreschiun üna jada a noss descendents. Mo quai tils pararà incredibel cha no vain gnü da sacrifichar bler temp, lavur e munaida per nossa uscheditta libertà e mobilità, pigliond in cumpra l'inascrimaint da l'ajer, canera e'l sguaz da surfatschas da terrain.

L'auto nun es be ün dals blers indrizs d'adöver da nossa civilisaziun. Neir ils taimpels dals Grecs nu d'eiran per els unicamaing lur lö da meditaziun. Quels vaivan plü gronda importanza e d'eiran simbols da prestisch pels Dieus e pustüt per lur constructuors.

Vias nu sun hoz unicamaing mezs da colliaziun, dimpersè eir indrizs chi rendan omagi al cult da la mobilità umana. Insomma, l'auto es e restarà l'idol da nos temp. E quel vain chürà e perfin ornà da tants noms sonors. Eir l'industria d'autos ha badà il trend dal temp ed ha s-chaffi models sportivs ed elegants. Fuorma, culur e forza da chavals dessan far gust da viagiar e promover libertà ed independenza. Il böt nun es l'arriv, dimperè l'esser movibel viagiond!

I's disch cha'l böt dals Cristians saja il tschêl, dals Güdeus sparpagliats in tuot il muond l'Israel, quel dals Buddhists saja il Nirwana. Nos böt para d'esser l'auto, na be per rivar d'ün lö a l'oter, nos böt para d'esser adüna darcheu ün nouv auto. L'auto es nossa mamma, nos ricover, nos ami – forsa eir nos vaschè.

Mo che es effectivmaing quist veicul tant predschà? Bain ün mez da transport dovrabel per rivar d'ün lö a l'oter. La pretaisa, sco slogan d'üna jada al salon d'automobils a Genevra, cha l'auto ans maina plü daspera e promova cumünanza e relaziuns interumanas, as po bain metter in dumonda.

 

Quantas vias sun necessarias?

Aderents da l'automobil sun da l'avis ch'üna via stöglia gnir schlargiada causa ch'ella saja da temp in temp surchargiada e nu garantischa plü ün trafic fluid. Mo i s'ha stuvü constatar cha eir quellas pon esser darcheu surfrequentadas ed occasiuneschan nouvas fufnadas. Alura sarà necessari da progettar üna nouva via o autostrada. Exaimpels our d'oters pajais muossan cha eir quellas saran ün di surchargiadas.

Il sviamaint da la cità da Turich sarà sgüramaing ün schligerimaint pels abitants. Mo eir la realisaziun da la transversala da las Alps, la NEAT, il schlargimaint da la via dal Güglia sco via naziunala pels camiuns da 40 tonnas saran be pel mumaint la soluziun e nu'ns spendraran da las serps da tola cun lur staus in avegnir. Las consequenzas sun unicamaing ün spostar dal trafic cun tuot seis problems in ün oter lö.

Daplü veiculs chi sun in movimaint e daplü vias surchargiadas – daplü vias surchargiadas e daplüsas chi stöglian gnir construidas .......Uschè lönch cha no crajain da stuvair levar tuottas culuonnas d'autos sün nos planet, uschè lönch ans rechattaina in ün rinch diabolic infinit.

Adüna darcheu, pro mincha schlargiamaint da via o nouva autostrada, as sto far la dumonda quantas vias chi sun necessarias. I's stuvess dumandar güsta uschè bain quants automobils chi's voul vairamaing. Forsa cha la populaziun arcugnuoscha üna jada ch'üna cuntrada ideala per l'auto sarà ün'illusiun e per l'uman ün schnuizi.

Il dilemma da l'avegnir es cha las prosmas generaziuns portaran las conseguenzas e stuvaran sacrifichar amo daplü surfatscha da terrain per dar via libra a l'auto – o cha'l trafic sün las vias stendschainta a sai stess! Siand cha tuottas duos vias mainan in üna giassa orba, as tratta da mustriar il trafic

  • tras ün adöver plü spargnuoss ed economic dals veiculs a motor

  • tras promoziun dals mezs publics collectivs da trafic-

  • tras üna politica da colonisaziun chi restrendscha ed abolischa il trafic sforzà, pigliond resguard sün ambiaint ed uman.

 

Vias e turissem

Blers schlargiamaints e bleras construcziuns da nouvas vias vegnan motivats cun las cuntschaintas pretaisas dal turissem. Quai ha nom cha'l turist d'hoz vöglia rivar plü svelt pussibel a la destinaziun da sias vacanzas e giodair eir amo là la comodità da seis veicul. Colliaziuns cuortas e sveltas dals centers vers las regiuns periferas sun dumandadas. Il lö da recreaziun dvantess plü attractiv, cha quai maness schurmas da giasts ed eir daplü entradas. Mo l'incuntrari po esser il cas; las megldras vias mainan bainschi glieud a tanfun, mo eir daplü disturbis, canera e spüzza. Quai chatta l'uman eir a chasa dich ed avuonda, e la valur da viver d'üna cuntrada turistica chala e dvainta main attractiva.

Hansruedi Müller, il manader da l'Institut pel turissem svizzer a l'Università da Berna pretenda: "Üna politica dal temp liber nun exista. Temp liber ha da chefar cun libertà, e qua nu vöglian ils politikers da nos pajais as arder ils mans!"

Intant prosperescha il trafic d'automobils sün nossas vias. I's prevezza cha quel crescharà fin l'on 2030 per 20 fin 30 pertschient. Eir il marchà d'autos para d'esser sün buna via per rivar our da la crisa. Daspö il principi da l' on 2010 sun gnüts miss in circulaziun 194 161 veiculs, 10,5% daplü co dürant il 2009.

In duos ons gnaran realisadas lavuors da sanaziun i'l tunnel dal Gottard. Sgüramaing cha'l trafic da transit cun tuot seis disturbis as spostarà eir süls pass grischuns. Eir la realisaziun da gös olimpics in Grischun dal 2022 in Grischun occasiunessan staus, caneras ed immissiuns nuschaivlas a disfavur d'uman ed ambiaint. Sun quai be illusiuns vanas o forsa la trista realtà?

Dal bainstar, da comodità e mobiltà nu larà ingün desister, mo tuot quai varà üna jada sias conseguenzas negativas. Quist cuntegns restaran bain la deblezza umana, na facila da tilla tschessantar!

 

Alfons Clalüna

il Chardun

revista  rumantscha independenta

CH - 7559 Tschlin

fon 081 866 36 76

IBAN CH