il Chardun

revista  rumantscha independenta

CH - 7559 Tschlin

fon 081 866 36 76

IBAN CH

12/2011

Viva l'apocalipsa!                 

 

Scha guardains inavous sül 2011 do in ögl impustüt üna roba: La fin dal muond nun es auncha riveda. Ma be pazienzcha, ella vess dad arriver in ün an, almain tenor ils Mayas. Perche nu vessan quels dad avair radschun? Que as vezza viepü cha eir l'astrologa Elisabeth Tessier vaiva radschun, cur ch'ella ho dit tar l'introducziun da l'Euro, cha que saja ün pover chaschöl e cha que nu varo jamais success!

Bun, lura dschainsa uschè, l'apocalipsa riva a la fin dal 2012 ma che fainsa fin lura?

 

Cò mia prognosa exclusiva per il Chardun:

Tuot quels chi vaivan manchanto da der oura las ultimas Liras dal 2002 as pudaron allegrer, la Lira vain darcho ed insomma tuot las valutas europeicas. Be la Germania tgnaro l'Euro. Ma insomma, que nu porta ünguotta a nus, nus nu pudarons pü ir a l'ester a spender raps. Prüma nu varonsa temp e seguonda mancharon ils raps sajan que Francs, Euros, Schilling u Pesos. Nus vains da lavurer di e not be per l'amur dal lavurer. Il 2012 es nempe eir l'an dal "Aufstieg der Streber". Vzais, per rumauntsch nu do que niauncha ün pled per Streber. Eau propuon il pled taliaun: secchione. Ed ils secchioni, ils Sysiphusists pretendan da nus da fer scu els, lavurer, lavurer e lavurer e schmancher ils ultims giodimaints da la vita scu fümer, sex, giaschair pachific sün cuotscha, ler cudeschs e baiver cafè da Nespresso.

Ün viva sün l'apocalipsa! Ella rivaro punctuelmaing pels 21-12-2012, ma cu ch'ella guarda oura nu so auncha üngün! Juhu, tensiun, eau m'allegr!

 

Chatrina Josty

 

 

 

 

 

 

11/2011

Il püschain dals chucals               

 

Pavlar ils chucals es statta la plü bella e la plü allegraivla lavur da mia stà ad alp.

Vaivat savü cha'ls chucals nu stan sü da lur bun let da strom avant cha'l püschain nun es pront aint il bügl? Listess, ch'eu riva a las ot, a las nov o a las desch per tils servir il püschain, avant cha quel nun es pront nu's vezza ne gnifs ne cuins stortigliats dadour la stalla, i nu's doda gnanc'ün tun. Che flotta vita cha quistas bes-chas han, n'haja adüna impissà, da pudair star in let uschè lönch. Ed eu, povretta, vaiva da siglir our dal let cul scling agüz dal svagliarin fingià a las quatter, mincha di. Ma forsa nun es lur vita lura gnanca uschè bella, adüna il listess püschain: scotta e farina, farina e scotta e minchatant ün pêr vanzets da nus umans, insomma paca variaziun. Ed a la fin da la stagiun d'alp vegnan els, gronds e grass imballats, transportats be directamaing al bacher. Tuot quai per cha'ls umans possan mangiar charnpüerch da püschain e da marenda e cotlettas da giantar. Sto quai esser? Che luxus!

Ma almain quatter mais han meis chucals gnü bella vita! Nus vain suvent giovà, per exaimpel il gö da "büttar intuorn la charrücla" o "d'ingolar la scua". Ils chucals han adüna gnü ün plaschairun. Eu na adüna, cur cha la charrücla d'eira già plain grascha brichafat! Eu n'ha discurrü bler culs chucals, meis amis, tils n'ha quintà da meis plaschairs e da mias tristezzas, da mia buna glüna e da meis problems. Els tadlaivan adüna, squassond las uraglias, e commentaivan cun rögnadas. Cur ch'eu giaiva davent da la stalla, am seguivan els sco per salüdar e dir in lur lingua "grazcha e fin daman". Cur ch'eu am allontanaiva sur la saiv via, tuornaivan els plan planet vi pro'l bügl da scotta o sül let da strom o sül prà per fuar la terra, rögnond e cuntaints. Eu pens suvent vi da meis cumpogns. Quant lönch avran els pensà vi da mai? As vessan els fat pissers sch'eu ün di nu füss plü gnüda e sch'els füssan gnüts pavlats da qualchün oter? A mai uossa, davo la stà d'alp, mancan ils chucals. Eu mang la charnpüerch cun tuot ün oter sentimaint.

 

Regula Bücheler, Brail

 

 

 

 

 

10/2011

Scoulas – instituts d'allevamaint              

 

Scoulas sun instituts d'allevamaint. Quista tesa nu's fuonda sün retscherchas scientificas, dimpersè sün observaziuns d'üna mamma cun vast'experienza. Per dir cuort e bön e culs pleds da Roger Schawinski : "s'isch miini Idee" – l'ideja es mia. Dimena, per preciser ün pô mia tesa : "Illas scoulas vegnan allevos ils ventuors sclevs da l'industria e da l'economia. Per cha accumpleschan las pretaisas da quista maschinaria vegnane ans a la lungia modellos, valütos ed ümilios." Uossa dscharos ch'eau exagerescha. Cha que sajan ils pleds d'üna tipica cluotscha chi vöglia proteger sieus pulschains. A sto liber a minchün da penser che ch'el voul. Per me però es il cas cler: la fuorma da scolaziun chi vain praticheda tar nus es manipulativa. Minch'iffaunt saun nascha tuottüna cun la vöglia e l'instinct d'imprender, da fer progress. Uschigliö struzchess l'umanited magari aunch'hoz per terra vi, impè da ster sün duos chammas. Minch'iffaunt ho inclinaziuns ed interess differents. Per furtüna. Che mangessans uschinà, scha tuots füssan mecanists d'autos! Ma precis a quists aspets nu vain do pais a scoula. Il pü gugent vessane cha tuots füssan eguels. Ün scu l'oter. Scu sudoïns da plom. Chi chi nun es bun in matematica nun ho il dret da frequenter scoulas otas. Punct. Basta. A nu do ünguotta da discuter. Geografia, istorgia e dafatta linguas peran d'esser main importantas. Musica, disegn e lavuors manuelas nu quintan inamöd ün starnüd. La quintessenza? Cler ed evidaint: ün'iffaunt artistic cun poch talent matematic es pel giat. Exagereschi darcho? Ma, eau nu se… Scha stüdgiains las cifras da giuvenils e dafatta d'iffaunts chi faun regulermaing la sborgna e füman da tuotta sort rüzcha, nu suni sgüra d'avair tüert. Qualchosa vo tort. Sul tort. Nossa societed superciviliseda ho pers il saun inclet. L'umaun es dvanto ün prodot. Ün prodot furmo seguond normas e bsögns economics. Ün stallun degenero. Stögl admetter cha pel mumaint nun ho mia tesa bgers aderents. Ma chi so, forsa ch'ün bel di possi listess auncha dir be baja: "s'isch miini Idee."

 

Bettina Secchi

 

 

 

 

 

 

08/2011

Dessan duonnas tscherner be a duonnas? 

 

Eir scha no vain daspö bod ün on 4 cusglieras federalas sun las duonnas in general adüna amo massa pac rapreschantadas illa politica. Es quai uossa ün motiv per tscherner be a duonnas? Per mai na. Eu guard pro la tscherna sül möd sco ch'ellas politiseschan e cun che argumaints ch'ellas vöglian rivar a lur böts. Eu nu tillas tschern be perquai chi sun duonnas o forsa pervia da quotas. Sch'eu vez p.ex. sco ch'üna Sarah Palin o üna Michele Bachmann polariseschan la scena in America cun lur politica populista schi survegna propi mal il vainter. Ed apunta, da quellas duonnas daja avuonda eir pro no uschè chi's fa bain da tour eir a las duonnas e na be als homens suot la marella critica.

Eu am giavüsch per quist utuon üna cumbatta electorala cun üna tscherta maniera e na üna polemica sco cha'l parti da zikzak fa pel mumaint cun seis placats cullas s-charpas nairas chi traplunan sülla bandera svizra. I para be ün'armada chi marcha aint in nos pajais. Quai sun placats fats aposta per semnar discordia, per far temma da tuot quai chi vegn dal ester. Polemica cunter esters chi vegnan pro no a lavurar o sco fügitivs mo eir cunter umans chi nu stan socialmaing uschè bain, cunter umans chi pensan oter o chi han ün'otra religiun o ün'otra culur. Quist agir tös-chainta il clima in Svizra. Tuot quels e quellas chi vöglian far vuschs cun da quistas metodas rassistas e disfamusas nu merittan ingün sustegn, chi sajan homens o duonnas. Eu sun per fair-play eir illa politica e na be pro'l sport. Mia visiun per la Svizra es quella d'ün pajais avert per tuot quels e quellas chi respettan las normas da nos stadi. Perquai survegnan be politikers e politicras chi as sfadian per rivar a quel böt mia vusch.

 

Giovannina T. Tschlin

07/2011

Ir e turner                 

 

Il temp da vacanzas ho cumanzo. Daspö duos, trais eivnas sun las portas da scoula serredas, ils rullors laschos giò. Per las prosmas ses eivnas regna la liberted. Uschè resaintan bgers scolars e bgeras scolaras. Il tema il pü preschaint es lura, inua cha's passainta quel temp liber. Da l'America fin in Zipra, tuot las destinaziuns vegnan numnedas. E pü dalöntsch cha's po ir, dapü gniervusited e gust cha's clappa. Rester ses eivnas in Engiadina pera be lungurus e memma simpel. Düraunt las vacanzas s'ho tauntüna temp da viager, dad ir a guarder il muond! Il desideri da passanter aventüras, da vzair lös incuntschaints e glieud estra es tar bgers umauns grand - e radschunaivel. L'incuntschaint es per l'umaun misterius e fascinant. Perque attira el minch'an millis da turists. Las agenturas da viager faun precis cun quist desideri profuond lur raps ed ans tiran il dschambun tres la buocha cun lur placats e prospects. Eivnas a la lungia vain discuto a chesa che offerta chi saja la pü favuraivla, che lö il pü interessant, che hotel il pü cumadaivel. La decisiun nun es simpla, üna vouta mauncha la discoteca sper l'hotel, ün'otra vouta nun ho que üngün pool, ed al terz lö es que memma chod, memma prievlus u memma turistic.

Forsa cha la chadafö es memma poch exquisita, l'hotel memma grand u il svoul memma lung. A do auncha bgers oters motivs chi vegnan ponderos in vi ed innò, fin cha la decisiun finela vain tratta. E lura as po s'allegrer, il prüm as quinta las eivnas fin cha's parta, lura ils dis ed la fin dafatta las uras. A me restan auncha precis 19 uras fin cha l'aviun parta. Que daregia ün svoul in ün oter muond, in ün'otra cultura. Las cuntredgias lo saron pü süttas, il mer dastrusch, las bes-chas rapazzas, e la glieud s-chüra. Tuot es different, ester e perque uschè interessant. Eau m'allegr ün mez muond per quist'aventüra. Ma que do eir aunch'ün'oter sentimaint in mieu cour ed ün'otra vusch in mieu cho. Quella dumanda, scha que nu füss precis uschè bel da ster a chesa, in Engiadina? Fer il bagn pudessi bain, ils lejins sun uossa chods avuonda. Fand ün pêr gitas as pudess observer bes-chas sulvedgias, sainza avair temma da gnir attacho d'ün liun e la glieud chi gniss incunter discurriss la glistessa lingua. Eau nu stuvess stüdger che cha'd es da paquetter, ün süjaintamauns ed il vstieu da bagn bastessan per ir al Lej Marsch. Neir vessi d'avair temma da las turbulenzas i'l aviun, eau pudess simplamaing tschanter sün mieu velo. Las strapazas dal lung viedi nu badessi, eau vess be da trampliner ün poïn pü svelt. Mia liaungia da brasser am gustess bain, la diarea nu clapessi. A la fin dal di crudessi in mieu let uschè prüvo e m'indrumanzess cuntainta. Hm. Che vusch in me es pü ferma? Quella chi tira e vuless ir davent u quella chi restess pü gugent a chesa? A la fin dals quints ho la prüma ün argumaint in pü e quel am persvada adüna darcho. Sper il sentimaint dal gust per ir davent s'ho lura nempe eir il gust per pudair turner a chesa. Ed ün es cler, ün sentimaint pü ferm, pü profuond scu quel nu do que. Eir scha ir davent es stupend, turner a chesa es in mincha cas auncha bger pü bel. E chi chi nu vo, nu po turner. In quel segn giavüschi a tuots e tuottas bellas vacanzas!

 

Flurina Henkel

 

 

 

 

 

 

05/2011

Ad alp                 

 

Eu vegn ad alp, ün'alp da vachas da lat. Plü cha'l di da la chargiada d'alp s'approsma plü intensivmaing ch'eu am dumond: perche vögl eu ir? Che voul dir quista feivra chi'm tschüffa mincha gün? Es quai la ferma vöglia da mütschir da la vita civilisada, da viver alch oter, la vita simpla? Esa il bsögn da'msfogar? Dad ir "back to the roots"? Perche m'naja decissa da star sü mincha di fich bod, da lavurar dür, sainza avair liber la fin da l'eivna? Tuot da libra voluntà baininclet. Am spetta quai ch'eu tscherch probabelmaing ? Ma la vita d'alp hozindi nun es plü primitiva, i s'ha a disposiziun electricità, duscha, glatschera, buns mataratschs e telefonins, tuot vaira confortabel. Sün mia alp nu daja internet, per furtüna, televisiun neir nöglia.

Eu craj da tscherchar il gir regular dal di, dad avair be üna occupaziun, sainza stuvair pensar parallel a desch otras robas, d'am pudair concentrar ad üna unica lezcha. Eu varà d'incleger ün gir cumplet: dal ciclus da las erbettas fin al chaschöl e'l painch, bunischems. Eu pos observar mincha di quista metamorfosa. Il chaschöl n'haja fich jent, üna fletta da pan cun lasura ün centimeter painch e meil. I nu dà nöglia oter uschè bun sco quai cur chi s'ha gronda fom. Ed ad alp as haja üna fom naira, adüna. Esser dependenta da la glüna da las vachas e da l'ora, da las muos-chas e da las bacterias da lat, da las sajettas e da la süttina .... Che bè da viver almain per trais mais üna vita natürala, sainza dar bada a la gardaroba ed a las partenzas dals trens, mütschir da la vita artificiala. Quai am motivescha, d'esser respunsabla per il bainstar da set dunzainas da vachas, per ils pas-chs, per il bainesser da la pastriglia e per mai. La sfida es da viver üna cumünanza casuala, limitada a temp e spazi. Eu m'allegr, sun nervusa, n'ha dubis, sun averta e buondriusa. A nus tuots giavüsch eu üna buna stà.

 

Regula Bücheler, Brail

04/2011

Cun quels esa mel manger tschireschas     

 

Minchataunt suni gritta. E da las voutas simplamaing stupefatta da noss'ignoranza. Daspö la catastrofa a Fukushima als 11 marz vain discurrieu bger dals prievels da l'energia atomara. Dad eventuelas catastrofas natürelas chi pudessan chaschuner ün desaster nucleer. Da la tecnica chi pudess refüser sieu servezzan. Da collavuratuors chi pudessan fer sbagls. Da la manchaunza da lös adattos per alluntaner ils vaunzs radioactivs. Da, da, da... Que chi'm fo gnir gritta es ch'üngün nu discuorra dal cumanzamaint da quista chadagna schmaladida. U vais Vus forsa udieu a quinter da la situaziun spaventusa chi regna i'ls lös inua cha l'uran vain extrat da las muntagnas? Vais udieu a quinter da la pertschientuela straminabelmaing ota d'amalos da cancar in da quellas regiuns? Vais udieu a quinter d'oppressiun e discriminaziun, da translocaziuns, spossessamaints e privaziuns da drets in connex cun l'extracziun d'uran? Na, nevaira? Ed eir scha per cas qualchün vess udieu qualchosa, a chi interessa que? Taunt as rechattan var 70% da las reservas d'uran sün terra indigena, voul dir suot il terrain da pövels indigens in America dal Nord ed Australia. In Russia, Kasachstan, Niger, Südafrica ed oters pü. "Cur cha vus impizzais la glüsch, glivra tar nus la vita", ho dit Tom LaBlanc, ün Indiaun dal pövel dals Sisseton-Dakota (USA).

Terribel, pensainsa forsa ün mumaint. Pütöst be ün mumaintin. Ed alura fains darcho ir la maschina da cafè, la televisiun e'l computer. Cuschinains, fains la duscha e telefonains. Sajans sincers: a nun essans pü pronts da desister dal curraint, da renunzcher a las comoditeds d'üna vita moderna! Schmettains dunque da fer ün tel teater pervi dals implaunts atomars! Eau sun stüfcha marscha da quista bigottaria, da quist baderlöz da müdamaints e d'ün'economia pü respettusa. Üna pipa tabac respettusa! Nus respettains be noss egens bsögns. Da noss conumauns luntauns e da nos planet ans instrafuttainsa. Ma sapchans: creschentscha in ün sistem limito porta cun se destrucziun. Ed uschè nu'ns resta oter cu da conviver culs spierts cha vains clamo. Chi so, scha ünsocura badains nus martuffels cha cun quels esa però mel manger tschireschas?

 

Bettina Secchi-Fluor

 

 

 

 

 

 

03/2011

Scu scha…             

 

Scu scha turistikers dian als paurs cha’l verd da la plazza da golf saja eir natüra, cha dessan vender lur pros e sustgnair il svilup economic, tuots stöglian fer sacrifizis…

Scu scha ün speculant d’immobilias disch al pur, eir eau am la cultura indigena, tia chesa engiadinaisa, eau se maximer sia valur - culs milliuns cha survainst poust ir giò la bassa e’t fabricher ün chalet, stust ir cul temp, esser innovativ e flexibel. Chi chi tegna vi dal vegl es vegl!

Scu scha ün at dschess: scha voust inscuntrer ad oters stust esser scu els. L’esser different impedescha l’incletta e la stima vicendaivla.

Scu scha ün politiker dschess: scha’l pövel chi t’ho tschernieu nu’t fo pü per cumand, al stust cumbatter, scha necessari cun agüd dad esters.

Scu scha ün decidess dad inventer üna nouva cultura perche cha’d es difficil da proteger l’egna.

Scu scha ün linguist dschess: scha stust proteger e promouver tschinch linguas minoritaras periclitedas, las masdast, invaintast üna nouva, rimplazzast las veglias. Que cuosta pü poch ed es pü modern e pü effiziaint. La nouva vela dapü cu la veglia, quella es perdütta d’ün regiunalissem ridicul cha’s stu survendscher. Eir linguas artifizielas daun identited. Dal rest eir oters nun aman lur lingua da scrittüra, eir per oters nun es la lingua da scrittüra lur lingua dal cour. La magiurited ho simpatia per nus, scha fains tscherts sacrifizis. Gnins be respettos scha essans pronts da desister da nos dret da viver nossa lingua dal cour.

A do dumandas da lingua chi’t laschan sainza pleds!

 

Maria Marmuogn

02/2011

Svizzers                

 

Svizzers mangian be chaschöl d’alp

Svizzers baivan café fraid

Svizzers fan vacanzas in Svizra

Svizzers van a chatscha

Svizzers fabrichan implants atomics

Svizzers fan politica cun success pella Svizra

Svizzers han lur schluppet in s-chaffa o suot let

Svizzers politiseschan our d’amur pella Svizra

Svizzers giovan a ballapè Svizzers tschernan SVP

Svizzers fan il pisch in pè

Svizzers sun kerlis

 

Uoi che curaschus da metter tuot ils Svizzers in ün chaschuot! I lura no duonnas? Eschan eir no manajadas cun quists slogans? Na dal tuot perche no vezzain las robas magari in möd plü differenzchà e na usche bornà. Preferin la pasch e l’armonia, tscherchain la cumünanza, mantgnain üsanzas. Il bainstar per tuots ans sta a cour, eir per quels chi stan dadour.

E perche vaina per far cariera adüna dad esser megldras e far tuot plü bain co quai cha’ls homens fan? Els nu san.

 

Giovannina T. Tschlin

 

 

 

 

 

 

01/2011

Che es Bologna?                

 

Bologna – uschè as nomna il nouv sistem d'universited. Daspö l'an 2006 stüdgian ils students e las studentas tenor quist nouv program. Na be a Turich, in tuot la Svizra, insomma in tuot Europa, - ed eir in America, Australia ed Africa. Dimena sün tuot il muond. Ün sistem universel – quist Bologna. El es gnieu construieu per simplificher ils andamaints bürocratics, per spordscher dapü pussibiliteds e per unificher ils programs universitarics. Hozindi as stu esser internaziunel e cugnuoscher bgeras linguas. Aunz, sainza Bologna, saja que sto pussibel, ma ün schaschinatsch. Pel pü s'ho stuvieu frequenter ün u l'oter cuors duos voutas, minchataunt nun ho que però neir do in ögl cha s'ho lascho our ün cuors düraunt il temp a l'ester.

Tuot que nu saja pü üngün problem cul sistem da Bologna. Cun el po ün student taliaun stüdger russ ill'America e cumbiner sieu stüdi facilmaing cun physica. Zieva trais ans po el sainz'oter müder universited e stüdger inglais a Mosca. Tuot üngün problem, perche cha tuot las universiteds seguan al glistess program. Uschè nu dependa que pü, sch'eau stüdg a Luzerna, Londra u Lissabon. Ed il pü grand avantag da Bologna: Tuot ils stüdis düran glistess lönch. E tuots haun a la fin il listess certificat, u ch'els sun ‚bachelor' u ‚master'. Ün u l'oter, tuots glistess, üngün problem.

Chi chi craja cha que saja propcha uschè, ho fallo. Almain in quist cas. Ma que es natürelmaing eir ün'excepziun. Chi vuless già stüdger rumauntsch? E lura auncha cumbiner que cun scienza d'educaziun? E suprapü auncha clapper l'arcugnuschentscha pel stüdi da la scoul'ota. Que es telmaing extraordinari, exotic, vi da que nun ho üngün dals teoretikers da Bologna penso. Ma eir quist es fattibel cul sistem da Bologna. Üngün problem. Trametter ils documaints e cumanzer il stüdi, tuot simpel.

Ses mais sun passos daspö cha l'universited ho cumanzo. Ses mais plain termins, discuors e telefons. Adüna il glistess, adüna darcho declerer la situaziun uschè speciela. Rätoromanisch? – Schi que do que e schi, eau vuless stüdger que. Ma lura es ün'otra persuna respunsabla per quist giavüsch. E la prosma es darcho la fosa e la terza m'arcumanda darcho la prüma.

Ils documaints culs diploms da l'otra universited, cun tuot las notas – e que chi quinta: tuot ils puncts fats aunz pochs ans, giran daspö ses mais e nun haun auncha chatto üngün böt - ed eau üngüna resposta. Il sistem da Bologna clappa fouras, grandas fouras, fourunas. Ed ils students, chi stüdgian dapü cu ch'els rabaglian no lur puncts cu zieva lur ram, croudan tres quellas fouras. L'unic chi güda cunter il supersistem da Bologna es pazienzcha e perseveranza e forsa cò e lo ün umaun chi nu pensa vi da puncts e sistems dimpersè vi dals students e las studentas cun lur bsögns: nempe l'interess pel ram e na pels puncts.

 

Flurina Henkel