il Chardun

revista  rumantscha independenta

CH - 7559 Tschlin

fon 081 866 36 76

IBAN CH

08/2011

Democrazia inua via?                  

 

Eau m'impip da las elecziuns, d'heja dit ün di a qualchün. "Ma est narra", ho respus quel qualchün, "tü stust ir a vuscher." Eau stögl ir a vuscher? Eau STÖGL ir a vuscher? "Ma cler, il dret da vuscher es la fundamainta da nossa democrazia." Democrazia. Cur cha od il pled democrazia clappi regulermaing il scuffel. Il pövel cumanda. Ah schi? Inua? "Tar nus", disch qualchün. La fuorma da democrazia ch'eau cugnuosch, es pütöst üna spezcha dad ipnosa collectiva, disch eau. A mincha singul citadin vain do la pussbilted da tscherner traunter püssas pussibilteds. Exaimpel: i'l ram d'üna votaziun cumünela poust magari tscherner traunter ün pè d'impostas dad 85% u dad 87%. Super! Pajer stust però in mincha cas! Ün'otra vouta at vain preschanto ün mantun da candidats cotschens, verds, nairs u in qualche otra maniera culurieus, our dal quêl tü poust eleger ils rapreschantants politics per tia vschinauncha, tieu chantun u la Confederaziun. Eir que es super. Premiss cha nun hegiast aspettativas memma grandas. Üna es nempe pü cu sgüra: müder nu's müda ünguotta. Socialist u verd, cristiaun, populer u liberel – a la fin voul minchün adüna be qualchosa: profiter persunelmaing. "Uossa be schmetta", sbregia mieu amih qualchün, "tü exagereschast, scu'l solit." Chi so. Il pastrügl politic chi regna tar noss vschins pera da'm der radschun. Pigliainsa ils Frances: a tschernan üna regenza conservativa chi imprometta rom e tom e mez Milaun. Pochs mais zieva badane cha que ho pü füm cu rost. A sun dischillus e grits. Ils socialists rian stigl e's preparan per la reconquista dal trun. Ma hoppla, eir tar els es aint il verm. Che cha be ün unic Dumeng Strüz-Barchetta es bun da cumbiner! Da tuot ils oters nu vulainsa niauncha discuorrer. "Schi, ma tar nus...", mieu qualchün nu do pos.

Basta! Eau per me d'he decis: eau m'impip da las elecziuns. E tschern mi'egna via.

 

Bettina Secchi-Fluor