il Chardun

revista  rumantscha independenta

CH - 7559 Tschlin

fon 081 866 36 76

IBAN CH

12/2011

Eu sun schmiss dal cumpromiss Chi han fat per satisfar l'ambiziun d'ün tribun. Eu n'ha let in gazetta, cha la CGL (red. Conferenza Generala Ladina a Vulpera - PL dals 22 -11- 2011)) saja statta unanimamaing pel cuntschaint cumpromiss (idioms-rg/rg-idioms). Mo es quai be pussibel, cha ingün(a) nun haja almain gnü dubis e senti ün malesser da quist elaborat dal trenta? Almain ün o üna dals preschaints? Ingio eschna, in ün stadi totalitar? Quai nu sarà bain na üna scossa chi ha temma dal luf popular?

Cha quels chi sun d'oter avis vegnan taschantats da möd intolerabel, m'es cuntschaint. Ma tuottüna! Magistras e magisters chi han il dovair d'educar ils giuvens umans ad agen liber pensar !!! ün genitur chi's fa pissers

  • Tü hast plainamaing radschun! (Remarcha: E tü vessast sainz'oter pudü segnar cun teis nom, o hast forsa eir tü temma da gnir discredità!). La propaganda da la "Pro idioms" am tira adimmaint il sistem da propaganda p l a c a t i v dal PPS/SVP. Ma scha gnanc'il rg, chi'd es pionier per adampachar il vocabulari rumantsch, nun ha ün pled adequat per "Gesinnungsterror", schi co vessan ils idioms d'avair ün tal, e dimena da badar, cha quai es quia il cas?
    Ils idioms stuvaran in avegnir viver e ... murir cun declamaziun!
    PS Dal rest: la Confenerenza Romontscha Surselva (23 da nov. 2011) nun es statta uschè 'compacta' reguard acceptanza dal cumpromiss. Bravo!

 

 

 

 

 

10/2011

"Wird Graubünden bald zum Steuerparadies?" as dumandaiva la Südostschweiz la fin d'avuost. Il "Wirtschaftsforum GR" fa nempe propostas zuond discutablas reguard sbassar las impostas in Grischun. Lura gniss il GR eir el ün paradis sco Zug e Sviz. Eu At dumond scha quista sort da paradis es da bivgnantar e giavüschabla...

Flavio P., A.

  • Eu dubitesch! Quels duos chantuns nun han güsta il meglder nom. E lura! Forsa ha ün bel di eir il GR dabsögn d'ün ter plümatsch da finanzas, quai eir in vista a las catastrofas pussiblas da la natüra. O as craja il Grischun preservà da tuot mal?

 

Il Parlamaint voul spordscher 5 milliardas a l'armada. Tanter oter eir per cumprar nouvs jets. Na nun es quai ün nonsens dad ot grà?

Mena B., C.

  • Quai es ridicul, e minchün da quels uschedits cusgliers san faquint fich bain, cha quists eroplans sun supraplü sco suröss. Apaina im ajer suna eir fingià sur ils cunfins da la Svizra oura, faquint in tschercha d'ün inimi imaginà da tscharvels disturbats.

 

Avant las tschernas dal parlamaint es gnüda la gazetta "Schweizerzeit" da port'aint! Tü savarast bain? Quella gazetta burgaisa, conservativa, independenta etc! (da Schlüer e co.) Eu n'ha bod tschüf alch.

Cristoffel N., S.

  • Alch, che? Dalet o...? Eu per mia part sun indegnà e... trist, cha alch simil es be pussibel in üna Svizra chi's declera umana e güsta ed umanitaria

 

 

 

 

 

 

06/2011

Cur ch'eau d'he let il titel "Im 20-Minuten Takt das Oberengadin verkaufen" in scrittüra grassa grassa aint illa Engadiner Post dals 8 da meg sun eau ieu in gritta e d'he bütto la giazetta in ün chantun. Che dist tü,

Giongion? P. M., Schlarigna

  • Eau vaiva eir eau let quist bel titel. Ma a nun es managio que cha tü t'hest pü prubabelmaing impisso, cha vöglian vender - scu'l solit - propi l'Engidina. Ad es 'be' managio, cha l'access a la regiun da vacanzas vess da funcziuner cul tact u cun la fequenza da 20 minuts. Quella, l'Engiadin'Ota, haune già dalönch inno vendieu, e que sainza il m i n i m t a c t . Nischi!

 

Fin in uossa n'haja adüna cret, cha'l Cussagl dals chantuns/Cussagl da stadis saja ün zich plü güdizius co'l Cussagl naziunal. Oramai stöglia reveder meis güdicat. Ma i sun para tuottüna utschels da las glistessas pennas: I decidan reguard ün'armada schmasürada, i voulan cumprar jets, i voulan far ün percuors per cuorsas da la Fuormla 1 etc. Il parlamaint va in errur. Che t'impaissast tü da lur far e demanar?

Durietta P. , S.

  • Propa! I van in errur, sco cha tü dist. Il parlamaint in general es il spejel da la società da noss dis.

 

La staziun da Zernez dvainta - as dschessa - üna gronda plazza da trans-chargiada ed es sülla megldra via da güdar a l'uschedit progress / a l'industria da fabrica a surfabrichar plü svelt pussibel e quai massivamaing eir l'Engiadina Bassa e la Val Müstair. O vezza massa s-chür?

Men D., A.

  • Insè vezzast tü fich cler! La reacziun a chadaina! La Retica metta a disposiziun ün'infrastructura schmasürada e pretenda in seguit, chi vegna fat adöver da quella.

 

 

 

 

 

 

05/2011

Daspö ch'eau se, cha bgeras reclamas ed indicaziuns sün mangiativas sun scrittas in rg las leg eau be pü in tudas-ch. Eau crajaiva cha que füss sursilvan.

Leta M., S.

  • Ad üna constataziun nu poss eau insè der üngüna resposta. Ma eau deploresch cha tü preferischast da leger que chi vegn scrit in tudas-ch impè dad in rg, cha tü perast d'avair chapieu fin uossa.

 

Uossa saran ils 'idiomists ladins' cuntaints d'avair pudü güdar a lur tribun o a lur s-chellera sül s-chüd da las tschernas pel Cussagl naziunal. El ha sgüra profità da la gronda publicità chi'd es gnüda fatta, cun el e... per el - s'inclegia - e quai dafatta cun seis conterfai. O nun es quai uschè?

Tumasch P., S.

  • Tü pudessast avair radschun. Ma eu dubit cha tuots sajan cuntaints da quist effet - per uschè dir - "collateral" da lur acziun. O? Tuot ils adversaris nu sun sgür e tschert brich partischans o aderents dal PPS.

 

Tü sarast dischillus da la decisiun da la radunanza cumünala da Zernez dals 20 d'avrigl 2011, da quella decisiun chi permetta oramai da surfabrichar ün bel löet dal cumün vegl da Zernez. Tü e teis tschirescher vaivat bain gnü spranza, cha ün ideal vala eir a Zernez ün zichet daplü co be ils raps da monopolists e privilegiats.

Men N., A.

  • Jou nu sun be dischillus, jou sun dafatta trist. Chi m'han fat ridicul insembel cun 'meis' bös-ch 'sacral' (chi nun es meis bös-ch!), quai nu'm s-choda. Ed jou sun nar vaul cun mai svess, cha jou am fetsch amo adüna illusiuns. Ma, apunta, i nu's schmütscha a seis destin.

 

 

 

 

 

 

04/2011

Ha eir il Chardun respectiv qualchün dals Chardunists survgnü ün invid a las nozzas da William e Kate?

Sebastian A., T.

  • Fin hoz malavita na. Ma i füss stat greiv da chattar la persuna adattada, chi savess las reglas da la chasa roiala e dal rest nun ha il Chardun las finanzas necessarias per cumprar ün regal adattà e la büschmainta necessaria (in media sto mincha giast investor üna somma cun ses cifras – glivra sterlina - per pudair accumplir las pretaisas per pudair esser giast…..)

 

 

 

 

 

 

03/2011

Che chi vegn tuot fabrichà! E quai, malavita, plüchöntsch mal e dafatta fich mal. Ma fingià George Sand (1804-1876) dschaiva: "Ils meidis pon eventualmaing sepulir lur fals dal manster, ma als architects as poja be cusgliar da propuoner a lur cliaints da laschar rampignar edra (Efeu) sü per lur chasas." Ün bun cussagl, che?

Mena Pia S., S.

  • Schi! Ma scha quai crescha uschè plan - quia pro nus!

 

Il cumbat per pudair entrar aint il "palazi" federal es lantschà: Il PPS/SVP es sül vial da surpassar. Il PCD/CVP e'ls Liberals lessan - davo 20 ons - darcheu tour pro. Il PS/SP ha da tmair la vendetta da Blocher pervi da sia nunreelecziun. Il parti BDP e sia Widmer-Schlumpf as dostan per surviver. Ils Verds voulan entrar aint il Cussagl federal.

Duri R. Monsch, S.

  • Stain a verer, stain a dir, tü poust star e tü poust ir! Id es da quels chi's laschan tscherner per amur da la chosa, v.d. per cooperar a bön dal pajais e da seis pövel, id es da quels chi ambischan pussanza/stima/respet public, id es da quels chi rapreschaintan interess da gruppas e... dimena eir interess privats, id es da quels chi's laschan cumprar etc.

02/2011

La Quotidiana para da dvantar l'organ ufficial per tuot quels chi voulan sforzar a tuot ils Rumantschs dad introdüer il rg in scoula. Ella spüda tössi cunter ils "idiomists". La plü nouva, na amo verifichada, forsa poust tü dar la resposta: Es quai vaira cha Lebrument ha vendü la LQ ad üna gruppa da rg-ists e cha Vincent Augustin figüra sco lur president?

ro.

  • Già cha la LQ nu fa ingüna censura vess ella sainz'oter publichà eir eventuals artichels dals idiomists. Ma i nu saran entrats ingüns. Quella da la vendita da la LQ es üna dal nar d'avrigl. Ma quia stöglia agiundscher amo alch persunal. A mai esa i malamaing sü pel nas, cha la magistraglia ha laschà convochar la radunanza da fundaziun dal "Pro idioms" ladina da la PPS. Ils uschedits idiomist s'han dimena laschats instrumentalisar da quel parti chi schgnaffa minch'occasiun per far propaganda politica populista. Id es l'on da las tschernas (svizras), ma bainbod eir da quellas regiunalas!!!

 

Uossa cumainza - na, l'ha fingia cumanzà - il spectacul da la champogna electorala per las tschernas i'l Parlamaint svizzer, resp. pels parlamentaris grischuns. E tschertas tschernas paran dad esser fingià uossa fats accumplits. A tuottavia sugerischa la SO dals 23 da schner 2011, cha'l tir da duos: Engler/Schmid saja ün "Dream Team". Cha ingün votant nu's possa giavüschar alch meglder.

Arno Menn, S.

  • Tü dist "sugerir", e tü hast radschun. Quai es ün schurnalissem dubitaivel. Cumbain cha quist tir da duos 'fess' sen! E'l tir da duos svess nu fa gnanca bleras saramonas! Lur candidatura tils vegn "jo" preschantada sül tablet d'argient dals burgais ed excluda praticamaing otras candidaturas.

 

Quai ch'eu am dumond es, co chi fan da finanziar la champogna electorala. Sast forsa tü, Giongion, co cha quai vegn manipulà?

Clärli P. , Z.

  • In Svizra e dimena eir in Grischun sun simlas finanziaziuns top-sectretas, voul dir chi nu sun brichafat na transparentas. Quai es deplorabel ed anti-democratic al plü ot grà. I nu's po nempe bod na crajer ch'ün singul, ch'ün affar o cha üna instituziun sustegna finanzialmaing ad ün parti o ad ün candidat sainza intenziuns zoppadas, v.d. sainza vulair in seguit profitar svess da sia 'generusità'. Quel parti, o quel singul es lura - per uschè dir - dvantà malamaing dependent da seis 'sponsur'. El es dvantà ün avuadà. Tü hast dovrà il pled 'manipulà'. Hei hei, manipiulà sco üna marionetta.
    E sia investiziun privata (chi po eir ella esser considerabla!) speresca'l da pudair etscher in ün möd o tschel - in cas d'üna tscherna.
    L'intransparenza es üna fantschella da la corrupziun.

 

In blers pajais arabs revoltescha il pövel. Uossa dafatta eir in China. Eu sun in plaina anguoscha: Pudess quel virus attachar eir la Svizra?

Sebastian A., T.

  • Nu’t far pissers! Cunter che less il pövel pro no demonstrar? Pro no esa tantüna tuot in meglder uorden.

 

 

 

 

 

 

01/2011

Eu n'ha let da qualchevart, cha'l Chantun subvenziunescha cun 9% ün proget chi fin dal 2016 vess da schminuir la spüzza/savur dal pischatsch. Mo es quist pussibel?!

Mario P. , S.

  • Inchün am vaiva fingià dit quist. Che voust, per agradir al turissem fana tuot ed amo daplü.

 

Uossa cumanzarà il cabaret da la champogna electorala. Aint illa SO dals 28 da dec. 2010 es stat ün artichel "Nicht alle können mit der grossen Kelle anrühren". Quai ch'eu n'ha let m'ha dat da pensar. Da noss dis, cha la glieud fa talmaing per cumond a la recloma, han quels partis e candidats, chi han blers raps a disposiziun, evidaintamaing daplü schanzas da gnir tschernüts. Ed i nun han gnanca da dir d'inuonder nan cha quists raps vegnan. Da transparenza dimena gnanca schmoc, d'egualità da schanzas amo main e quai in üna uscheditta democrazia. Che dist tü Giongion da quist,

R. M. Poo

  • Eu di, cha quai saja deplorabel ed üna varguogna per ün stadi chi pretenda d'esser democratic. Scha almain chi's gniss a savair da chi chi han ils raps, schi füss quai forsa ün'admoniziun als electuors da nu tscherner güsta a da quels chi sun p. ex. i'l sold da la NOVARTIS. Ma scha tuot quels chi's laschan ingianar da quista noscha cundiziun gessan a l'urna, lura as pudessa gurbir ün bun pa daplü egualità da drets.