il Chardun

revista  rumantscha independenta

CH - 7559 Tschlin

fon 081 866 36 76

IBAN CH

08/2011

Mister Badi versus Miss Berna               

 

Il tema dad oz: Che dischan ils giuvens da las tschernas? Eau d'he 27 ans e duonna Baldina dal Chardun m'ho dumandeda da scriver qualchosa lotiers. Eau d'he però dubis. Prüm dubi: Sun eau insomma auncha giuvna? Seguond dubi: Cu dess eau savair che cha'ls giuvens dischan da las tschernas? Ad es nempe uschè ch'eau nu se!

Ils giuvens nu discuorran ün cun l'oter, ils giuvens scrivan Statusmeldungen sün Facebook ed ils giuvens faun filmins per Youtube. E che expriman ils giuvens lo? Eau nu se! Ad es üna têla massa illa rait cha's perda la survista, impustüt la survista sur da candidats u candidatas. Chi candidescha per "Mister Badi" e chi per il cussagl naziunel.

Ma melgrò tuot, l'internet nun es be ün caos totel, a do listess eir löins inua cha'd es miss tuot bel in uorden. Güsta scha vo per tschernas, am vain que adimmaint, do que la pagina smartvote.ch!

Fantastic, lo haun ils candidats e las candidatas respus a dumandas davart tuot ils champs politics, scu economia, politica sociela, budget da la confederaziun, l'armeda ed uschè inavaunt. Sch'eau respuond uossa a las listessas dumandas lura vain oura ün "match", voul dir, la u il politicher da mieus sömmis, quel u quella chi ho respus scu eau e chi fo dimena precis la politica chi plescha a me.

Uschè dvaintan las tschernas propi bubi. Eau cumainz a cliccer intuorn, schi, na, schi, na, forsa, unbedingt! E traritrara, zieva pochs minuts è'l oura, mieu candidat. U meglder dit, mia candidata! Ad es üna duonna chi ho respus bod scu eau. Sia tenuta politica correspuonda per 68% a mia. Na mel, eau sun però stutta cha que es güsta ella, üna duonna ch'eau nu vess prubabelmaing elet, melgrò ch'ella es üna cuntschainta, eau la d'he eir già inscuntreda: Cun ir a cuorrer aint il Fürstenwald a Cuira.

Ha, a do listess aunch'üna vita dadour l'internet, forsa cha vela la paina da guarder intuorn lo per candidats e candidatas adattedas. Üna buna conclusiun, u na? Eau la stögl güsta metter sün Facebook!

 

Chatrina Josty

 

 

 

 

 

 

07/2011

"Hello Kitty" – "hello creschieu"               

 

El: "Eau crajaiva adüna cha saja il problem dals homens cha nu dvaintan mê creschieus, cha guardan auncha cun quaraunta Trickfilms e cha sunan bass in bands da rock fin cha sun grischs! Ma las duonnas nu sun bger megldras, faun partys per guarder insembel ‚Germanys Next Top Model'. Duonnas creschidas guardan da quellas emischiuns chi sun fattas per mattas da 15 ans. E lura lur abitaziuns, sömmis in rösa!"

 

Ella guarda intuorn in si'abitaziun, ella ho be cò e lo qualchosa rösa, que saro bain auncha permis.

 

El disch: "Hej e ‚Hello Kitty' quel giattin chi'd es sü dapertuot, sün risplis, etuis, telefonins, chotschas suot, stinvs, tuottas haun ‚Hello Kitty', la poppina da 3 mais e la duonna da 30 ans!"

 

"Mhm." Disch ella e sto sü per ir per ün magöl vin. Que nun es uschè simpel dad ir in chadafö sainza ch'el vezza che chi'd es sü sün sias chotschas da pigiama. "Hello Kitty" esa scrit cun grands custabs rösa e que eir auncha sül chül! Ma che dess'la be fer? A NU DAIVA ÜNGÜNAS OTRAS CHOTSCHAS DA PIGIAMA!

 

Chatrina Josty

 

 

 

 

 

 

02/2011

Tü vest cun me              

 

Tü vest cun me,

eau'm dumand perche.

 

Tü riast dal dalet,

cur ch'eau d'he dit

ün pitschen gentil pled.

 

Chi sun eau be,

cha tü vest cun me?

 

Tü tuochast mia pel,

cur ch'eau pigl tieu maun

e giod il contact* bel.

 

Tü vest propi cun me,

eau'm dumand perche be.

 

Fritz Stieleke

 

Du gehst mit mir            

 

Du gehst mit mir.

ich frage mich warum

 

Du lachst vor Freude,

wenn ich dir ein kleines, sanftes Wort

gesagt habe.

 

Wer bin ich nur,

dass du mit mir gehst?

 

Du berührst meine Haut,

wenn ich deine Hand nehme

und den schönen Kontakt genieße.

 

Du gehst wirklich mit mir,

ich frage mich warum nur.

 

*) Quista poesia es üna poesia sur da la schmüravaglia melcrettaivla, la schmüravaglia da gnir amo. La persuna chi discuorra do - sainza savair - la resposta sün sia egna dumanda. Ella vain ameda, perche ch'ella ama svess. La schmüravaglia, chi crescha perfin auncha fin a la fin da la poesia, es la cumprouva persvasiva da sieu entusiassem per l'umaun amo. Quist text voul musser cha l'entusiassem e l'amur dependan l'ün da l'oter. In quista poesia d'heja tschernieu il pled "contact" per exprimer duos chosas: la magia repetida dal prüm tucher ed il sentimaint dad esser i'l tact l'ün cun l'oter.

 

Dieses Gedicht ist ein Gedicht über das ungläubige Staunen, das Staunen darüber geliebt zu werden. Die Person, die in diesem Gedicht spricht, gibt selbst die Antwort auf ihre eigene Frage, ohne dies zu wissen. Sie wird geliebt, weil sie selbst liebt. Das Staunen, das sogar bis zum Schluss des Gedichtes noch wächst, ist der überzeugende Beweis ihrer Begeisterung für den geliebten Menschen. Dieser Text möchte zeigen, dass Begeisterung und Liebe sich einander bedingen. In diesem Gedicht habe ich das Wort "Kontakt" gewählt , um zwei Dinge auszudrücken: den wiederholten Zauber der ersten Berührung und das Gefühl, miteinander im Takt zu sein.