il Chardun

revista  rumantscha independenta

CH - 7559 Tschlin

fon 081 866 36 76

IBAN CH

11/2011

Antropologia da l'uman                

 

Sün üna pagina da la gazetta Südostschweiz dals 16.11.2011: Survart la nominaziun dal nouv CEO da l'UBS, Sergio Ermotti, natüralmaing cun blera pumpa e cun üna pruna declaraziuns d'intenziun, p.ex. cha la plü gronda banca da la Svizra as concentrescha da quinderinavant darcheu süls affars fundamentals d'ün institut da raps: administrar ed imprastar munaida, ma na specular cun raps. Finits sun il temps da bonis astronomics dals bankiers!

Precis quai han eir pretais las demonstrantas e'ls demonstrants dal movimaint "occupy". Ün purtret sün la pagina suotvart muossa, co cha diversas persunas vegnan allontanadas dad ün grond numer da pulizists, in pasch ed in nom da la ledscha. La conclusiun da l'istorgia: L'UBS accumplischa las pretaisas da quists indegnats e consequentmaing vegn il Lindenplatz a Turich uossa deliberà da l'occupaziun.

Scumettain, cha l'UBS pratichescha inavant sco fin qua? Eir quista banca es globalisada totalmaing ed es part dad ün sistem economic neoliberal chi's basa be sün speculaziun da raps. I va impustüt per l'optimar il guadogn dad üna pitschna part dal pövel sün quist muond. Plazzas da lavur e pasch sociala ston star inavo. Ün schurnalist da la gazetta "Le monde diplomatique" fa la dumonda antropologica: "Co ans lessan nus deliberar da l'omnipotenza dals marchats da finanzas e da las agenturas da rating, scha gnanca la crisa gronda dal 2008 nun ha manà a müdamaints remarchabels? La disposiziun negativa actuala da l'uman - chi para i'l temp atomar e d'internet d'hozindi d'esser sco dal temp tard dals Romans - es üna previsiun da la catastrofa spettada". Da far la dumonda antropologica significha da cundannar il maltrattar da l'umanità tras il chapitalissem. Ed in quel sen es sgüra permissa la dumonda, scha la pulizia nu vess fat meglder da rumir l'etascha dals schefs da l'UBS!

 

CASA

 

 

 

 

 

 

10/2011

Spontacts / Smartphone-Apps           

 

Il prüm il calculatur da giglioffa, alura il computer, il telefonin - ed hoz il i-phone, i-pad, i-pod, i-tunes – e Steve Jobs, chi'd es mort, üna catastrofa mundiala, el chi ha müdà la vita da tuot seis discipuls, e quai sun milliardas dad umans! A mai para l'interessant, sco cha sociologs e perscrutaders dal tscharvè s'occupan cun new-medias. La fisionomina dal tscharvè da l'uman s'ha müdada.

 

Quai pretenda ün scienzià da quist organ fich cumplichà. Il tscharvé s'adatta magari svelt a las cundiziuns nouvas da la vita da minchadi. Ed el rimplazza las capacitats da la cellas, voul dir, tuot quai chi vain registrà nouv dvainta eir adüs. Infuormaziuns veglias vegnan arcunadas, minchatant pon ellas gnir reactivadas. Sco ün disc dür dal computer. Bleras infuormaziuns van a perder, impustüt cun far adöver dals mezs moderns. Quai es uossa ün fenomen dal tuot nouv: I's surlascha quasi al mez tecnic funcziuns dal tscharvè per na inchargiar massa ferm las capacitats chi stan a disposiziun a mincha singul uman. Ün exaimpel da las perscrutaziuns scientificas:

I s'ha dumandà a diversa glieud da partir 12'415 cun 13. Il resultat es 955, dimena üna cifra sainza rest. Las persunas examinadas han pudü far adöver dad ün rispli e da palperi, però natüralmaing na da mezs tecnics. E voilà: Tuot las persunas dumondas (dal rest a la riva dal lai da Turich in Svizra!) han fingià stüz quista funcziun in lur tscharvè. Dafatta üna magistra ed ün student da matematica(!) nu sun plü stats bun da eruir il resultat. Stains a vaira co cha quai va inavant cul scriver scha l'i-phone il plü nouv po registrar frasas dictadas. Quel po davo gnir collià cul computer e quel scriva alura tuot in meglder inglais, tudais-ch o chinais: Analfabestissem programmà! Ma quai nun es uschè mal, il tscharvè ha per la paja capacitats nouvas da registraziun….

Ün sociolog scriva in ün artichel illa NZZ ch'el haja gronds pissers reguard l'isolaziun dals individuums. Quai pervi da las social-medias facebook, twitter ed internet in general. L'uman modern haja tschients dad amihs virtuals ma ingüns reals. Las societats van a perder e l'uman dvainta solitari. Eu til poss cuffortar: I dà uossa fingià smartphone-apps chi organiseschan subit la cumpagnia giavüschada, p.ex. la pagina "spontacts" che chi voul faquint dir: acts spontans… Ingio es il problem?

 

CASA

 

 

 

 

 

 

 

07/2011

Il bun temp vegl - chapitel 3 e fin        

 

Quista jada vaja pels automats da bigliets da tuot gener. Dafatta la staziun da Scuol - tantüna üna destinaziun importanta - nun ha plü adüna avert il büro dürant il temp cha'ls trens circuleschan. Chi chi sto ir cul prüm tren la bunura quel es dependent da l'automat. Dschain uossa chi's tratta d'üna persuna plü veglia chi nun es experta sül chomp da computers e dad automats. Ella es ün pà in prescha causa cha'l tren parta in 3 minuts. Uossa prouva ella dad incleger las directivas da l'automat. I voul var 8 indicaziuns fin cha'l bigliet es pront. 3 minuts sun uossa passats e'l tren parta bainbod. I dà duos pussibiltats. Laschar partir il tren o viagiar sainza bigliet. In quist cas suppuonin nus la varianta duos. Ma oppla: Precis hoz ed uossa daja üna controlla da bigliets. Pervi cha quist tren nun es normalmaing accumpagnà dal persunal da tren esa da pajar la multa da fr. 80.— plus il bligliet. I nu dà ingünas discussiuns! Disfurtüna ha eir quel o quella chi nun ha bancanotas pitschnas. Da la bancanota da fr. 100.— nu voul l'automat savair nouvas. Es quist il service public, dal qual i vain adüna discuorrü?

Eu m'allgord gugent als temps vegls. Sco mat d'eira quai adüna ün evenimaint da cumprar ün bigliet pro'l fanestrigl da la staziun a Zuoz. Prüma la baderlada sur da las plü nouvas cul capo da staziun Florio To. E lura la paraid cun tuot quels bligliets prestampats cun destinaziuns in Svizra. La svalütaziun dal bigliet cun marcar il bigliet cul datum actual. Pajar ed entrar i'l tren ed ingünas agitaziuns. Il tschüvel da partenza dal capostaziun cul chapè cun trais spaghettis.

A pensar cha eir staziuns plü pitschnas d'eiran occupadas plü bod da capostaziuns! Quai maina a mia dumonda sün la quala eu nun ha fin uossa amo mai survgnü üna resposta radschunaivla. Eu less savair, perche cha l'automatisaziun totala da nossa vita moderna vain adüna fatta pervi dals cuosts. Ils defizits da la viafier s'augmaintan linearmaing cun spargnar pro'l persunal! O voul qualchün pretender alch oter?

L'atuomatisaziun cun roboters, automats e computers cuntinua a mordio, sainza tour resguards sün plazzas da lavur qualifichadas e sainza ponderar eir l'aspet sociologic e psichologic in merit.

 

CASA

 

 

 

 

 

 

06/2011

Il bun temp vegl               

Chapitel 2

 

Hoz pensa vi da la posta svizzra e quai chi'd es hoz amo restà da quella. Passà il temp, cha'ls postins o las postinas pudaivan amo esser superbis da lur manster e ch'el(la)s as identifichaivan plainamaing cun lur patrun da lavur. Ils büros da posta in cumüns plü pitschens sun natüralmaing fingià serrats per dal bun, il service restret sün la consegna da la posta. Per retrar marcas o per far pajamaints voula il viadi i'l cumün central. Ma telefonar p.ex. al büro da posta a Scuol, quai es ün'intrapraisa plü difficila. Ün numer direct nu daja plü. Il numer da telefon es centralisà magari a Berna e la telefonista collia inavant pür davo avair fat diversas dumondas reguard il motiv dal telefon.

In meis domicil as pudaiva fin uossa büttar aint las chartas illa chartrera fin a las 16.30. Davo svödaiva il schofför da l'auto da posta la chaista e pigliaiva cun sai las chartas. Tschel di vaiva da trametter üna charta urgiainta cun posta A e tilla n'ha manada l'ultim mumaint al schofför da posta. Ma quel nun ha plü tut in consegna la posta. La chaista vain uossa svödada fingià a las 16.00 e quai dad üna firma privata. Quella vain cun l'auto privat a ramassar la posta e'l schofför da posta es gnü liber da quista lavur. Amo plü bizara es la situaziun pro'ls paquets. Quels as maina - fingià pervi dal porto - meglder directamaing e persunalmaing al destinatur. Scumpartir üna spediziun collectiva, magari üna missiva ufficiala? Fin avant circa trais ons nu d'eira quai ingün problem. I's surdaiva a la postina ils fögls e quels gnivan scumpartits il plü tard il prossem di in cumün. Hoz vegnan quistas spediziuns ramassadas centralmaing giò la Bassa e scumpartidas infra ün'eivna. Ün cas classic da la demontascha dal service public.

Illa lingua moderna dals managers da la posta tuna quai natüralmaing tuot oter: "In temps dad e-mails e da pajamaints electronics stuvaina urgiaintamaing optimar l'andamaint da lavur, quai chi maina ils respargns necessaris". Soso… e magliar oura las beccadas dals politikers burgais chi privatiseschan a mordio intrapraisas publicas?

Las victimas eschan üna jada daplü no abitants da las regiuns periferas. Ma id es sco chi'd es: No nu rendain, il service succeda là ingiò chi renda!

 

CASA

 

 

 

 

 

 

05/2011

Il bun temp vegl                       

chapitel I

 

Per dir la vardà: Minchatant am giavüsch eir eu inavo i'l temp vegl. Per exaimpel, scha'l telefon ha ün disturbi. Amo avant var 15 ons as pudaiva telefonar al tecniker directamaing, e davo ün mez di d'eira'l quia e la reparatura pudaiva gnir fatta subit. Davo as offriva amo ün cafè al specialist da disturbis da telefon e's daiva üna baderlada.

Hoz: Telefon numer 0800 800 800. Ün computer piglia incunter il clom. "Swisscom, cun ün problem da telefon schmachar il pom 1". Davo amo üna schelta da 5 numers per oters cas. Bun: numer 1: "telefon cun cabel: 1, telefon sainza cabel: 2, telefon digital: 3." In quist cas dimena 2. Uossa voul il computer savair meis numer da telefon: Eu til dun aint e lura cumainza il spettar. "Ingün da nos persunal nun es liber, spettai ün mumaint o tramettai ün fax." Uossa as doda musica electronica da computer e davo ulteriuors 2 minuts la buna nouva, cha bainbod saja liber üna collavuratura o ün collavuratur. Bun, spettaina amo ün mumaint. E bravamaing, davo ulteriurs 3 minuts: "Swisscom Störigsdienst, co Al possa güdar?" La vusch da la duonna tuna magari stressada. Il prüm tilla dumonda, ingio ch'ella as rechatta. "A Berna in ün büro cun 30 ulteriuras persunas" disch'la, ma ch'eu dess uossa spiegar meis problem. Davo tilla declera il möd dal disturbi ed ella am giavüscha da spettar ün mumaint, ch'ella tschercha ün tecniker liber. Uossa darcheu la vusch dal computer: "Per plaschair spettar ün mumaintin, la persuna giavüschada es bainbod libra". Intant sun passats almain 10 minuts. Ed uossa la surpraisa: Il telefonin (handy) ch'eu n'ha imprastà per telefonar nun ha plü ingüna forza. La lingia es interruotta – e'l disturbi dal telefon nun es scholt. Sch'eu füss almain rivà amo üna jada pro la telefonista. Eu tilla vess jent dumandà, sch'ella vegna a baiver ün cafè cun mai cur ch'eu sun la prosma jada giò Berna……

 

CASA

03/2011

Disperaziun                 

 

La “Südostschweiz” dumonda a sias lecturas e lecturs: “Eschat vo pront(a)s da pajar daplü per la benzina i’l interess dal clima? 32 % dischan da schi, 65 % na! Il cussglier da stadis a Berna, Christoffel Brändli s’ha profilà i’l parlamaint dürant la discussiun d’üna eventuala introducziun d’üna gabella da CO2 cun la seguainta expressiun: “L’augmaint dal predsch da benzina dischavantagescha las regiuns muntagnardas!” Per incleger si’argumentaziun in ün artichel illa glistessa ediziun da la “Südostschweiz” douvra que faquint ün per IQ’s daplü co quai cha meis tscharvè da nan. Co as voula salvar il clima suot quistas cundiziuns: Ingüna prontezza per pajar daplü per benzina e cumbatter la gabella da CO2! E che as voula far cun üna pressa chi fa da quistas dumondas e chi pissera per üna plattafuorma per artichels talmaing indiffernzchats i’l servezzan da la lobby dad öli?

La “Tagesschau” da la Televisiun svizzra invida sco expert per declarar la catastrofa nucleara i’l Giapun ad ün professer da la Scoula politecnica a Turich (ETH), üna plazza chi vain pajada da la Swssnuclear, ün expert, dependent totalmaing da la lobby da las ouvras atomaras in Svizra? Perche nu vain a pled p. ex. la schurnalista Susan Boos, arcugnuschüda da tuottas varts sco experta critica in dumondas dad ouvras atomaras,? Ella scriva per la WOZ (Wochenzeitung) reguard las catastrofas nuclearas a Tschernobyl ed uossa i’l Giapun il seguaint:

..”Sch’eu sun sincera: Eu svessa nun ha mai cret landervia, cha quai possa succeder – I d’eira logica abstracta chi’m dschaiva, chi pudess succeder. E la forza imaginativa, chi sforzaiva d’esser critica – causa cha p. ex. ün super-gau a Mühleberg sforzess, da rumir tuot la Svizra bassa scha’l vent gniss dal vest. Insaco n’haja scrit illa cretta irraziunala, ch’ün tal evenimaint nu capita mai e ninglur intant chi’s cumbatta cunter il spavent potential e cha quel vain nomnà. I nun ha güdà. Ed id es terribel, d’avair gnü radschun, là ingio chi nu’s laiva mai avair radschun.

“Minchatant am chat ün pa illa listessa situaziun – e lura am discha: na disperar, forsa cha tü hast radschun – sperain chi nun es alura massa tard!

 

CASA

 

 

 

 

 

 

01/2011

Prodot naziunal                 

 

Prodot naziunal brüt, prodot social brüt, cifras da la buorsa, cuors da las aczias, o creschentscha da l'economia. Tuot expressiuns privilegiadas da las medias, impustüt da la revista dal di da la Televisiun svizzra, ma eir dal radio e da diversas giazettas. Emischiuns specialas da la buorsa dürant ils meglders temps d'emissiun. Avant cuort la prüma contribuziun da l'emischiun principala da la "Tagesschau": La firma X ha spedi 200 lavuraints per spargnar cuosts da gestiun. Perquai s'ha augmantà il cuors da l'aczia per 3 puncts. – Voilà! Per l'economia moderna, voul dir pel chapitalissem neoliberal esa cler: Main plazzas da lavur promouvan la valur da las aczias, voul dir da las firmas. E'l pövel nu's defenda, cuntuot cha be la plü pitschna part d'el(la)s possedan aczias. Davo cha quista politica ha quasi manà a la catastrofa economica da quist planet, regna hoz darcheu l'uorden dal di. Las bancas liongeschan (per bun rumantsch as dschessa wursteln) inavant sco schi nu füss stat nüglia. Davo cha'ls stadis han salvà las bancas, suna dastrusch a la bancaruotta. Ma salvan las bancas uossa ils stadis? La lezcha uriunta d'üna banca d'eira, da custodir ils respargns da la cliantella e da conceder credits ed ipotecas. Per lur lavur inchaschan ellas spaisas. Ed hoz vain speculà culs raps da la cliantella e'ls managers inchaschan bonis enorms. Ed ingün nun ha vöglia, da s-chaffir ledschas chi reglan quists affars. Uossa spettaina sül prossem crash, e quel pudess alura esser il cuolp final cun consequenzas plü agravantas.

Ün oter pled tuotpussant da l'economia e da la politica moderna es la creschentscha economica. Scha l'economia nu crescha mincha on per almain 2 %, alura van a perder plazzas da lavur (forsa..) ma impustüt as diminuischan ils profits da l'economia speculativa. L'ambiaint da quist planet nu cumporta inavant ün augmaint permanent. 2 % creschentscha da l'economia voul eir dir 2 % daplü disturbis negativs per l'ambiaint.

Qualchün m'ha dit tschel di, ch'eu nun inclegia ils connex da l'economia moderna. Cha'l marchà as regla adüna svessa e cha'ls stadis nu's vessan da masdar aint in quist affar. Mo bain!

 

CASA