11/2011

La staila rumauntscha                  

Ün'istorgetta da Nadel

 

La staila rumauntscha chi glüschiva adüna uschè ferm ed intensiv vi al firmamaint vaiva zieva millieras dad ans pers ün pô sia glüschur. A nu d'eira simplamaing pü scu üna vouta. Ils aungels da Nadel chi controllaivan dad an ad an las stailas cur cha giaiva vers la Festa da la naschentscha da Gesu haun bado cha la staila rumauntscha d'eira dvanteda sblecha e cha sia glüschur nu tendschaiva niauncha pü fin sün terra. Cun observer pü minuzchusamaing haune bado cha'ls tschinch pizs d'eiran üsos, ils üns dapü e'ls oters damain. Che es uossa be da fer per der darcho inavous sia glüschur divina a quista grandiusa staila?

Püs ans haun düro las discussiuns ed ils rumpatestas per chatter soluziuns chi persvadessan e cuntantessan. L'aungel Gabriel chi vaiva a sieu temp annunzcho als pastuors la naschentscha da Gesu ho spontanamaing fat la proposta da cumader simplamaing quels pizs üsos cun ün materiel chi tegna.

Tuot es sto ün pô perplex. A nu savaivan che dir. Cumader cun materiel artificiel paraiva a la granda part dals aungels preschaints üna curiusa roba. Cu po qualchosa uschè glüschir? Impussibel! Discurrind invi ed innò e nu chattand qualchosa meglder haune finelmaing listess decis da pruver cun quist materiel artificiel chi nu persvadaiva brichafat.

 

La construcziun ho düro püs ans, ans da lavur intensiva ed ans da dubis. Üna vouta haune dafatta vulieu capituler e demonter ils pizs già construieus. A s'haun però adüna darcho dos curaschi ed ün bel di d'eiran cumados tuot ils tschinch pizs cul istess materiel artificiel. La staila nu glüschiva e'ls aungels as dumandaivan adüna darcho scha quista decisiun saja steda üna buna chosa.

Dirvers ans as ho accepto la staila rumauntscha sainza glüschur, a's d'eira adüso cha la glüschur nun eira pü avauntmaun. Ma qualchosa tuottafat inaspetto s'ho cul ir dal temp musso: Ils tschinch pizs haun cumanzo a crescher suraint las construcziuns artificielas. L'aungel Gabriel ho vis quecò scu prüm ed ho dalum clamo insembel a tuot ils aungels.

Che plaschair e che algrezcha! La staila rumauntscha glüschiva darcho, minch'an pü ferm e pü cler e'ls aungels giubilaivan cha's udiva lur chaunt celest fin sün terra.

 

Pol Clo

 

 

 

 

 

 

04/2011

Riet Slalom

sbiata

tanter idiom

e rumantsch grischun

- pover chapun!

 

 

 

 

 

 

03/2011

Düsseldorf, ils 17 favrer 2011

Las vuschs dals iffaunts in giassa            

 

Uraglias, mias pitschnas fnestras cheras,

in möd amiaivel laschais vus aint

las vuschs dals iffaunts in giassa.

Suot mias pletschas viagia üna caravana

da fuormas, culuors e da glüsch.

Aunz mia ultima verda oasa

sfuondri in üna profuonda pêsch.

Ils suns d’üna balla e d’üna sua da saglir

am tramettan a la fin il salüd giavüscho.

 

Fritz Stieleke

 

Die Stimmen der Kinder in der Gasse        

 

Ohren, meine lieben Fensterlein,

freundlich lasst ihr die Stimmen

der Kinder in der Gasse herein.

Unter meinen Lidern reist eine Karawane

Aus Formen, Farben und Licht.

Vor meiner letzten grünen Oase

versinke ich in einen tiefen Frieden.

Die Klänge eines Balls und eines Springseils

schicken mir endlich den gewünschten Gruß.

 

 

 

 

 

 

02/2011

Eu sun stut...                 

... da tant'euforia

... da tant'energia

... da la massa da noms .

.. da la Pro Idioms.

 

Eu speresch...              

... cha tuot quel mantun

... da schlass Grischun

... cun tuot quel schlantsch

... resta rumantsch.

 

Polclo

 

 

 

 

 

 

01/2011

Reflecziun               

 

La vaidrina da la butia da mobiglia

reflectescha tia fatscha ed il tschêl.

Mieu sguard sfuondra in tia tschera cuntainta

e chatta ün dachesa ed ün muond cumün.

Mieus ögls segueschan tieu profil da nöblia

e tieu culöz d'ün elegant chavriöl.

Ils razs da la glüsch da saira disegnan avaunt

la via da pelegrinedi cha mieus daunts

e mieus bütschs giaron zieva plaun a plaun.

 

Widerspiegelung                  

 

Die Vitrine des Möbelgeschäftes

reflektiert dein Gesicht und den Himmel.

Mein Blick versinkt in deinem zufriedenen Antlitz

und findet ein Zuhause und eine gemeinsame Welt.

Meine Augen folgen deinem Profil von Adel

und deinem Hals eines eleganten Rehs.

Die Strahlen des Abendlichts zeichnen

den Pilgerweg vor, den meine Finger

und meine Küsse später nach und nach gehen werden.