12/2011

La cultivaziun da l'üert 2012              

 

Mettains cha nos impissamaints e nossas emoziuns creschan in ün üert e cha pel an nouv vains da planiser sia cultivaziun.

Che vulessans cha crescha in nos üert intern, che sems vulainsa semner?

 

Cò ün pêr idejas che cha's pudess tuot avair in quist üert. Ardöffels, rischmelnas, gibus e salata per nudrir spiert ed orma tres impissamaints chi sbuorflan dal profuond fin a la surfatscha.

Fluors da tuot las grandezzas e culuors pel plaschair da viver. Cò cunvegn que dad ir i'ls detagls e planter tuot las fluors cha vains gugent in möd da sentimaints: dal prüvo al vast, dal pitschnin, cherin al sentimaint vers l'infinit.

Natürelmaing as reserva üna part da l'üert per las plauntas medicinelas, ils remeidis per tuot las ingüstias cha's craja da subir. Ün chantun da l'üert vess dad esser reservo per las plauntas chi artschaivan la tristezza. Alura voul que eir üna plauntina pel saun inclet.

E cur cha la glüna es culs piz insü sun da cultiver las plauntas spinusas scu'ls charduns per criticher il muond inter e l'erva dal diavel per las schmaladicziuns. Impü voul que ün spazi per urtias e zierchel per rabgias ed eir per ün mielin noschdet, il sel e paiver dal minchadi. Ha!

Cler cha in quist üert ho que eir il mantun dal compost. Tuot que cha vains vivieu l'an passo es sün quist mantun da las experienzas. Quellas passan uossa tres la metamorfosa dal s-chart al nudrimaint pel an nouv.

In quist üert vessan eir dad avair lur lö bes-chas da tuot gener: la lindorna per ir finelmaing pü plaun vers il böt, la giazza per invuler ils bels mumaints dal di, la talpa per river a las rischs dals problems, ils verms da plövgia per schlucher idejas fixas, ils paslers per giodair la cumpagnia ed il merl per chanter il gust da viver. Hei, e la not dess be gnir minchataunt la vuolp – ün po furbaria voul que bain eir.

E cun que as giavüsch eau pel 2012 ün üert vario, culurieu e divertaivel!

 

Anna Ratti

 

 

 

 

 

 

11/2011

Suter sutessa, ma'm fo mel la chamma      

 

La tscherna d'ün suppleant dal landamma d'Engiadin'Ota sumaglia adüna dapü ad ün bal da Pardunaunza. La bella candidata Liberela es circundeda d'admiratuors chi vöglian suter cun ella: il prüm as ho schlancho Lemin vers ella per l'invider; vzand quist gest, as ho eir Bedepe mis in muvimaint. Tuots trais fuorman üna allemanda e vöglian occuper il parquet be els sulets. In ün chantun sto ün oter candidat per la tscherna. Quel nu voul fer la tras-cha: "Suter sutessa, ma'm fo mel la chamma".

Il bal paraiva da na pü glivrer. Tuot chi admiraiva la polka magnifica e s'allegraiva da pudair schmancher ils pissers da l'economia e da la politica. Ma la damaun zieva, la glieud as ho algurdeda cha d'eira da tscherner quel banadieu suppleant. La suttunza staunglischma durmiva auncha, intaunt cha l'oter candidat curriva intuorn, dumandand perche cha que drouva trais partieus scha tuots trais dischan e faun tuots precis il l'istess. El faiva valair cha üna buna part dal Cussagl da cumön sajan glieud libra e sainza partieu, e cha quella situaziun als permetta da lavurer per il pövel engiadinais inter. Ils votants as haun alura algurdos ch' els stess avaivan decis avaunt quatter ans cun granda magiuraunza cha la val ho dabsögn d'üna instanza democratica per coordiner ils interess cumöns da la populaziun. Bals e divertimaints nu paun rimplazzer ün cussagl chi chatta il chavazzin in ün muond da pü in pü cumplicho. Dad avair be sutunzs in la suprastanza nun imprometta da prevzair orizzis e terratrembels, ils möds da'ns proteger e da cuntinuer a tegner nos destin in nos egens mauns. La populaziun as ho sdasdeda ed ho tschernieu l'hom scort ed independent, sperand ch'el possa persvader ils tramagliunzs cha il bal ho lö la sanda saira ma cha'd es da fer lavur seriusa ils oters dis da l'eivna.

 

Claudio Caratsch

 

 

 

 

 

 

10/2011

Discrepanzas                    

 

In'emprema constataziun: Ei dat ina discrepanza terribla denter l'omnipresenza da placats e material da propaganda ed il caracter politic dallas elecziuns 2011. Tgaus dad umens e dunnas (dapli umens che dunnas) che supplicheschan da dar ad els la vusch, las gasettas pleinas da reclama pagada per quels che vulan representar nus endretg e duidamein "a Berna". Magari ina gruppa sc'ina pintga famiglia (il Grischun ha gie mo tschun resp. 7 plazs ell'assamblea federala), mo ils biars en lur colur ed en in ambient plitost artificial ed in textet cun schuber negina informaziun. Ed era las colurs van ina denter l'autra. Paradoxamein han partidas ch'han politicamein insumma negina simpatia per tuns cotschens buca spargnau cun quella colur en lur placats. E per cumpletar l'absurditad: Era verd vegn applicau rehamein. (Che la colur verda ei er in factur d'identitad da quella gronda communitad religiusa che vegn diffamada sistematicamein dalla medema partida cun siu verd e tgietschen ei en quei connex forsa bein il tgiembel!). L'intensitad dalla propaganda contrastescha enorm cun l'absenza da cuntegns politics. Ni hai jeu survesiu quei en vesta a tons placats ch'accumpognan bunamein mintga meter da miu viadi alla lavur?

 

Ei dat naturalmein era discrepanzas denter ils programs che las singulas gruppaziuns politicas fan valer anoviars e las decisiuns effectivas che lur representanza prenda el parlament. Jeu discuorel buca da caussas secundaras e da bagatellas! E la damonda con serius ch'ei seigi da prender il dretg da cundecider da burgheisas e burgheis, gliez considereschel jeu buca sco ina bagatella. Jeu sun sedumandaus las davosas jamnas tgei quantum d'inconsequenza seigi insumma supportabels. En quei grau ha la discrepanza cuntonschiu la dimensiun dil scandal. Contas gadas eis ei vegniu detg, scret, declarau ed inserau dad ina partida ch'ella seigi quella che batti per ils dretg da cundecider dil pievel? Quei va naven dil dretg d' eleger directamein la regenza federala tochen sur il dretg da sancziunar contracts internaziunals tochen alla pusseivladad da majorisar perscripziuns dils dretgs humans (pia puncts discutabels e fatgs nundiscutabels). E tgei decida il parlament el medem mument, cun il susteniment vehement dallas gruppas che pledeschan adina per la cundecisiun? Ins aulza il budget per la defensiun (inclusiv la cumpra d'aviuns da cumbat!). E beinsavend che quella decisiun ei pauc capeivla per burgheis e burgheisas ch'audan mintga di per tgei tut ch'il daners maunchien, organiseschan ins la decisiun aschia che votants e votantas san buca prender posiziun leutier!

Con grondas astgan quellas inconsequenzas esser? E con ditg san ellas vegnir praticadas? Con pauc attents e critics essan nus sco votants e votantas!

 

Cristian Collenberg

08/2011

Engadain laivstail                  

 

Cun ün clap ,"Grazcha fich" ha il ,"Festival da Jazz" a San Murezzan tut cumgià in ün inserat ed ingrazchà a tuots chi han assisti ad ün o tschel concert. Quist festival es stat ün dals "lnspiring Events in the Engadin" da quista stà sco cha'l marketing da l'Engiadin'Ota tils preschainta suot il titul "Engadin Lifestyle" aint illa broschüra sün palperi glüschaint "Diese Berge, diese Seen, dieses Licht!", e quai eir in talian, frances ed inglais ("What mountains, what lakes, what light!"). Cler ch'üna part dals giasts vain propcha pervi da la natüra e forsa la glüm speciala. Ma adüna daplü giasts tscherchan eir la culturella culturala. Quella daja vieplü be plü in fuorma dad events. ll festival da jazz a San Murezzan prouva da concurrenzar tschels festivals in Svizra (Montreux e Willisau, p.ex.), ma apaina ch'el es glivrà vaja invant a Schlarigna cul New Orleans Jazz Festival. Eir quels han salüdà in lur prospect cun üna dosa omeopatica rumantscha: "ln diesem Sinne grüssen wir Sie mit einem jazzigen 'cordiels salüds"'.Chi sa che cha Fritschun vess dit sch'el vess savü cha aint il Bel Taimpel es gnüda celebrada üna "messa ecumenica con musica jazz"?

Ma perche insomma manzunaina da quists evenimaints illa marella critica? ld es bain flot cha tanter ils stars internaziunals ha il public - probabel eir internaziunal - gnü occasiun da tadlar eir a nossas stailas indigenas sco a Bibi Vaplan o a Corin Curschellas! ll problem es ün oter. La publicità e la recloma, l'uschedit marketing per da quists evenimaints ed eir ils rapports illas gazettas sun stats numerus, illa propaganda esa gnü investi pliffers sainza fin. Blers han savü sgrommar üna part da las finanzas apparaintamaing surabundontas dals sponsurs. Daspera vaina evenimaints in Engiadina chi nu fan bod ingüna recloma e ch'ün oter public – forsa main internaziunal - frequainta cun grondischem interess. L'on passà ha l'inter cumün da Ramosch giodü l'exposiziun da fotografias in sala da gimnastica, quista stà han fuollas tadlà il concert final dal uörcschop dals Fränzlis a Tschlin ed a Sent nun esa gnanca stat lö in sala cumünala per commemorar ils 100 ons da Jon Pult ed i s'ha stuvü ir in baselgia a tadlar als musicants ed ils pleds. Chi chi'd es stat nun invlidarà. E tschels han manchantà alch. Quai es üna fuorma da cultura plü simpla e forsa plü s-chetta chi nun ha dabsögn da blers sponsurs, ma chi dà satisfacziun e chi fa sentir la cumünanza. E las algordanzas restan. Quai nu sarà quai cha'ls turitikers manajan cun "vivere all'engadinese", ma id es quai cha nus Engiadinais inclegiain suot "Engadain laivstail".

 

Pradèr da Pradasütta

 

 

 

 

 

 

06/2011

Il misteri da la conferenza                 

 

El es que cha's nomna üna persunalited importanta. El fo part ad üna conferenza cun persunas selecziunedas, invidedas e chi's saintan colliedas in möd bod conspirativ, dischan ils na invidos. Scha savessan propi que chi til interessa pel mumaint schi glivress tuot in üna granda risatta. El voul giodair ün mumaint indisturbo, intaunt cha tuot craja ch'el hegia da decider l'andamaint dal muond.

El es uossa schanto vi da la riva dal lej. El ho trat our las s-charpas e guarda sün sieus peis nüds sül tschisp. Uzand be ün po ils ögls segua el il muvimaint da las uondas sün la strivla stiglia da sablun brünaint. L'uonda passa suravi, lascha inavous üna s-chümina ed as retira darcho, ed adüna darcho tuorna e's retira ella, e vegn e vo e vegn e vo e las uondas davous tiers brievlan plain stailas. Suotaint es l'ova verd s-chüra e minchataunt schmütscha lo ün pesch in üna quietezza infinita. L'hom s'impaissa quaunt curius cha que saja, cha suot ova il pesch nu lascha stizis e sur ova es taunt muvimaint, ün impissamaint inütil - el chi'd es adüso da fer contabilited culs impissamaints in plus e minus per avair ün bilauntsch attractiv.

Que al vegn adimmaint cha sia Sofia, vaiva dit cha co tar quista riva as possa udir, u forsa vaiv'la dit eir be badair, il puls da la terra e cha que saja il lö predestino per ir illa sfalizcha chi s'avriva in mumaints speciels per river i'ls muonds parallels. Ed el as lascha trer precis loaint, in ün dals muonds parallels. Cur ch'el vain darcho in se – pü bod vess el dit, cur ch'el eira darcho sdasdo - es il sulagl passo davous la costa da la muntagna e la culur dal lej es pü s-chüra cun s-chüminas alvas sün las uondas. Sieus peis sun però auncha chodins. El tira aint las s-charpas, sto sü e s'inchamina vers la plazza da parkeggi e resta tuot perplex, ch'el ho durmieu uschè lönch. Uossa piglia el notiers il telefonin e bada ch'el ho manchanto trais telefons. Ün dal chef da sgürezza, ün da sieu afferist da la buorsa ed ün prubabelmaing per til dumander sch'el vöglia dvanter president da sieu pajais.

El tuorna tar la conferenza. Uossa sun tuots spartieus in pitschnas gruppas chi baivan lur "drinks" preferieus aunz cu's raduner per la tschaina da gala. Co til clappa la granda increschantüm pel muond parallel. Luotin vo el darcho a la riva dal lej – ad es tschêl stailieu.

Üngün nu til chattet pü. Delegio important sparieu da la conferenza sainza lascher stizzis? Haun miss ad ir mundielmaing ün'intera maschinaria per til chatter – ma üngün nun ho flippieu pled invers la pressa. Per quelo nu savaregians mê chi chi'd es ieu a perder quella not a l'ur dal lej da Segl.

 

Anna Ratti

05/2011

Perche avair temma                 

 

In nossa bella val pudains nus mner üna vita exposta a pochs prievels. Cò nun avains ne ün Ghadaffi, ne ün Putin in nossa prusa politica regiunela; in ün pêr mais nun avarons niauncha pü ün landamma. Ils members dal Cussagl da cumön sun da divers partieus u eir sainza partieu e lavuran tuottüna insembel da möd paschaivel. Üngün prievel per democrazia u liberted, üngün motiv per temma in quist reguard. Eir il prievel d'üna guerra per nus es imprubabel. Nus avains da temp in temp pitschens terratrembels, ma na dal gener scu in Giapun u Spagnia; üngün nun as algorda d'avair vis chesas desdrüttas o vias ruinedas tres telas catastrofas. Las lavinas e las boudas vaun giò in lös inhabitos.

Nos pumpiers ans protegian dad incendis scu quels dal temp passo. Inundaziuns da l'En u dal Schlattain nu sun pü guera pussiblas.

Cun nossa munaida solida giodains predschs moderos per las marchanzias importedas. Sch'ün chatta ils predschs memma ots as po facilmaing ir giò Clavenna per chatter tomatas pü bellas e pü bunmarchedas i'l marcho da la cittedina taliauna e giodair auncha il clima pü tampro per ün di da vacanzas. A nun es da tmair faminas; ils pochs chi sun imnatschos da poverted chattan sustegns sociels dals cumüns u da las baselgias.

La vita es telmaing organiseda per nos iffaunts cha que nu po bod na esser pensabel ch'els cuorran ün ris-ch in lur gös, u a las scoulinas e scolas. Nus vegliets ans algurdains che cha nossas mammas ans laschaiven fer avaunt settaunta ans : lungs tragets giand a pè a scoula, liberted per passanter il temp liber nudand in flüms u lejs, rampchand per ils bös-chs intuorn, clappand serps e müers, taunta roba chi dess hoz grand spavent a mammas e magistras.

La sandet es ün problem per tschertüns, ma nus avains ospidels e meidis cumpetents in vicinanza. Epidemias scu la pesta u la cholera sun imprubablas.

E tuottüna ho bgera glieud temma. Las medias prouvan da vender lur prodots al public u in al divertind u in al fand temma. Giazettas, noviteds al radio ed a la televisiun sun implidas mincha di cun infurmaziuns sur dad accidaints da las vias, sur dad incendis, sur da la guerra in lös cha bgera glieud nu cugnuschaiva il di aunz, sur da crisas finanzielas, sur dad ingians. Craja la glieud propi tuot che chi'd es scrit illas giazettas ? Saro que ün bsögn psicologic dal umaun da resentir temma? Tuot quist ping-pong traunter medias e public pera ün gö ün po stüpid ed inütil.

 

Claudio Caratsch

 

 

 

 

 

 

04/2011

Communicaziun               

 

Avon in pèr dis han exponents da treis partidas burgheisas discutau ensemen al radio davart la damonda pertgei che certas gruppaziuns dil "center" hagien da sbatter las davosas jamnas cun nunsuccess. Votantas e votants paran da volver il dies a quellas, e lezzas piardan mandats els parlaments cantunals. En certs cass en dimensiuns dramaticas!

Ils discutants han anflau la raschun. Ei setracti dad in problem da communicaziun. Ei seigi buca reussiu a quels che fan politica el stil classic da communicar endretg lur finamiras, lur breigias e tut quei ch'els hagien cuntonschiu per il beinesser general.

Communicaziun? En quei mument che votants e votantas sustegnan buca ina gruppa ch'era disada d'haver success duront decennis e magari tschentaners para quella explicaziun da daventar inflaziunara.

"Igl ei buca reussiu a nus da communicar" ... "nossa communicaziun sto semegliurar". Mo tgei manegian ils exponents ch'ein vidlunder da piarder lur influenza en quei mument ch'els criticheschan la "communicaziun" da lur atgna vart? Declarar meglier las finamiras per propi? Mussar co els ein sespruai da far ina politica consequenta en vesta a scenaris ch'ein orientai viers in avegnir ch'empermetta segirtad, giustia e la survivenza dallas generaziuns vegnentas?

Communicaziun. Ella capientscha naïva ensiara quei plaid forsa era ina muntada sco "dir la verdad," "far transparent ils interess", "render quen" e "dar sclariment". Mo sch'ins teidla pli bein sentan ins che quei sto esser manegiau in tec auter: Vender meglier sesez. "Perschuader" ils votants e votantas. "Gudignar" vuschs.

Jeu sustegn cumpleinamein il postulat da megliurar la communicaziun. Per tut las partidas e gruppaziuns.

Far clar ils interess. Mussar clar e bein pertgei ch'ins sa formular in postulat (sco per exempel la controlla dallas bancas ni il schurmetg digl ambient ni auter) e votar serrradamein e consequentamein encunter. Mo jeu vegn buca libers dil dubi ch'ins discuori da communicaziun (informaziun?) e manegi marketing. Marketing ei plitost igl art da presentar sesez sco product attractiv. Cun realitad e verdad ha quei buca senz'auter da far bia. In exponent dad ina partida dil center, sez commenber dil cussegl d'administraziun d'in implont nuclear, ha gest inoltrau in postulat che vegli che la Svizra sedelibereschi dall'energia atomara. Bein in postulat che croda sin gronda accoglientscha. Ina conversiun che fa surstar. El discuors cun schurnalists ha el "differenziau" pauc pli tard sia intervenziun. Igl exit vegni realisaus en 30 – 40 onns! Priu il cass che las condiziuns constettien.

Stai, nuot auter! Tgei dat ei aunc da communicar cheu?

 

Cristian Collenberg

 

 

 

 

 

 

03/2011

Energia: Il muond es gnieu pitschen e'l temp es dvanto cuort                 

 

La discussiun es inevitabla. Eir scha dess avuonda temas actuels locals pel CHARDUN. Ma il muond es oramai gnieu pitschen – e nus essans pertuchos tuottas e tuots.

La catastrofa atomara da Fukushima muossa quaunt poch cha savains. Üngün, niauncha ils experts nuclears e'ls uffizis respunsabels nun haun savieu che chi capita aint ils reactuors: quaunts elemaints nuclears chi nu sun pü cuvierts cun ova per ils sfrader, quaunts chi alguan u scha'ls razs radioactivs derivan da l'uran u dal plutonium auncha pü prievlus. E neir la societed ot tecniseda dal Giapun nu s'ho imagineda cha'l GAU capita in quels reactuors moderns, fabrichos scu'ls noss, e cha alguan forsa tuots ses reactuors insembel. Scu illas tragedias dals vegls Grecs druvains darcho offertas dad umauns chi daun no lur vita per proteger a la societed. Üna vouta in 10'000 ans ho que gieu nom aunz Tschernobyl – e 25 ans zieva capita que già darcho. Il temp es dvanto cuort. Il ris-ch restant – fin avaunt pochs dis accepto scu üna grandezza teoretica - es dandettamaing dvanto reel e concret. Da tuot las impromischiuns dals politikers davart la sgürezza da la tecnica nucleara es l'ultim resteda la spraunza, cha'l vent boffa illa güsta direcziun. "Ma na tar nus, nus nu vains da quels terratrembels" udins auncha adüna.

L'ouvra atomara Fessenheim sper Basilea gescha in üna zona da terratrembels. Il stüdi PEGASUS ho musso dal 2007 cha eir las ouvras atomaras in Svizra stöglian augmanter la sgürezza cunter terratrembels ed accidaints tres aviuns.

"Üngüna energia sainza ris-ch restant !" Che ris-ch ? Che ris-chs sun cuntschaints ütilisand l'energia dal sulagl, dal vent, da la massa biologica e la chalur da la terra ? Il ris-ch es do il pü da tuot pels concerns d'energia chi nun haun pü in maun il marcho lucrativ, scha nus prodüains l'energia in möd decentrel sün noss tets. Giand cul velo lung il Danubi da Donaueschingen vers Ulm as passa tres bgeras vschinaunchas culs tets plain collectuors da sulagl. Il princip: l'ouvra electrica construescha ils collectuors cun misterauns locals, pissera per la gestiun e retira l'energia a predsch actuel - il possessur da la chesa po vender svess l'energia davent dal mumaint cha l'infrastrucura es amortiseda. Interas vschinaunchas sun autonomas a reguard l'energia. Il motiv per quist svilup: Cun la decisiun da la Germania da desister in avegnir dad energia atomara d'avaunt ün pêr ans s'haun sviluppedas las energias alternativas bger pü ferm cu previs, fin hoz a 18%. Premissa es però la sgürezza da planisaziun: la populaziun e l'industria stöglian avair la sgürezza cha las decisiuns velan a lungia vista, cha renda dad investir. Per las trais ouvras atomaras nouvas planisedas in Svizra faun quint ils investuors cun 30 milliardas francs. Quauntas plazzas da lavur dess que per noss misterauns fabrichand ouvras pitschnas decentrelas !

"Sainza dapü energia üngüna creschentscha !" La nouva catastrofa atomara pudess eir esser motiv per ans fer impissamaints davart la creschentscha. Scha la Swiss ho ün record da passagers, scha l'industria da fabrica flurescha darcho e scha'ls concerns d'energia annunzchan ün guadagn da record do que rapports positivs illas medias. Güsta nus in Engiadin'Ota vessans tuots motivs da'ns fer impissamaints, per quaunt cha vulains auncha crescher e da congualer ils avantags e'ls dischavantags da la creschentscha illimiteda.

Fukushima ho miss in muvimaint la discussiun davart l'energia. Nus savains penser e planiser, e vains ün tscharvè chi prasta bger – memma bger. Tuottüna peran müdedas fundamentelas da nos cuntgnair pussiblas be tres catastrofas. Il temp es dvanto cuort – ad es urgiaint da reagir.

 

Jost Falett

02/2011

Epos alpin o: Regiuns fan confusiuns        

 

Tuot chi discurriva daspö alch temp be da fusiuns da cumüns. Duos valladas ans han muossà intanta chi para da funcziunar, la Val Müstair e la Bregaglia. Dal püt da vista administrativ daja avantags, e la populaziun pertoccada nun ha senti otramaing bler. Cha l'identità specifica dals cumüns da plü bod nu giaja a perder dad ün mumaint a tschel es bain cler. Quels da Soglio varan amo adüna ün pa la sbrega cun lur terrassa sulagliva e lur palazis, congualà culs povrets chi stan giò'n val illa sumbriva. Ed eir pro'ls Jauers restaran ils pregüdizis tanter ils differents cumüns. Chi nu s'algorda plü cha quels da Lü vaivan vuschà cunter e han svelt vout la bindera cur chi han vis chi d'eiran ils unics! Uossa vaina dudi da las discussiun epicas cha noss grondcugliers han fat davart nouvas regiuns. Nossa regenza ha bain inclet cha per far fusiunar plü svelta ils cumüns esa da chattar ün tric. Ils mänädschärs cloman quai ün incentive. Sco la gronda part dals pleds inglais deriva eir quist dal latin (e quai voul bod dir dal rumantsch). Incendere voul dir impizzar, e che chi sun incendis san noss cumüns da'ns quintar. Ma la Regenza nu less dar fö, be stimular da refuormar las structuras istoricas dal chantun.

Tour per mans staina quista fatschenda, ma quant inavant laina ir? Ils Glarunais han amo trais cumüns: Glarus Nord, Glarus Mitte e Glarus Süd. Quists noms uschè poetics e armonius ans muossan fingià quant important chi'd es da dovrar nos farstond per üna tala refuorma. Chenüna Engiadinaisa less viver aint in üna regiun chi ha nom Arco Sud co cha'l chantun tilla less nomnar? Cler, plü bel co Südbünden tunessa forsa. Daspö cha'l Brument ha però redüt nos Grischun a la Südostschweiz e tuots han acceptà quista etiketta badaina cha tuot possa gnir fat e decretà e decis, sainza cha'ls abitants hajan pled in chapitel. In tudais-ch ha quai nom: Die Macht des Faktischen. Ils fats crean nossa realtà.

Perquai stessna ans impegnar per badair e decider lura svessa chi chi less esser in charas chaussas cun chi. E quai in prüma lingia tanter cumüns, tanter las vschinaunchas chi'ns algordan cul pled svessa che chi'd es l'important: ils vaschins. Eir i'l cumün il plü pitschen dependa co chi's vain daperüna culs vaschins. Fusiuns tanter cumüns pon nascher da buns vaschinadis. E quels cumüns decidaran lura chenünas regiuns chi s'affan il meglder per sfidar ils problems da l'avegnir. Quels decidaran eir cha Arco Sud saja be stat üna toffa d'ün impiegà. L'Engiadina mantegnarà l'En in seis nom, eir scha Jauers, Puschlavins e Bargaiots vessan da fuormar ün'unica regiun. E quai nömia pervi da la "marca" cha'ls turists han para dabsögn, ma perche cha l'identità d'üna regiun dependa apunta adüna eir da sia istorgia e da seis ambiant natüral. Schi nu riva tanteraint ün Brument chi'ns persvada cha nossa regiun as vess da nomnar BERGENPOS (BERGiaglia e ENgiadina e POSchiavo) per pudair lura far recloma cun il slogan: Berg-Epos in Bergenpos – aifach positiv!

 

Pradèr da Pradasütta

 

 

 

 

 

 

01/2011

Parallelas?                   

 

In America congualan ils aderents dal muvimaint “ party da tè” (pdt) lur president Barack Obama cun Hitler

In Svizra conguala Blocher il chef da finanzas da l’Uniun Europea cun Hitler

 

In America disch la pdt cha quels chi vöglian chaschas d’amalats per tuot la populaziun sajan landervia a desdrüer l’America.

In Svizra dischan ils adversaris da l’iniziativa per la protecziun cunter la violenza tras armas cha schi’s metta las armas dals sudats aint ils arsenals invezza da tillas laschar pro minchün in s-chaffa, schi chi’s desdrüa la Svizra.

 

In Arizona demonstrescha avant las tschernas üna candidata da la pdt cun sia mitraglia forza e curaschi.

In Svizra as fa üna cusgliera naziunala dal PPS da gronda illa gazetta d’indumengia. Ella as preschainta in üna pultruna cun seis revolver in man..

 

In America publichescha Sara Palin, la scheffa da la pdt sün sia pagina d’internet cartas da geografia cun cruschinas sco pro las miras dals schluppets in differents lös.Üna es dedichada al domicil dalla rapreschantanta dal congress G. Giffords in Arizona.

In Svizra declera ün vicepresident dal PPS ch’el preferischa da far politica culla resgia a motor.

 

In America piglia ün giuvnot da 22 ons sia pistola e tira a Gabrielle Giffords ün tun aint il cheu.

In Svizra nu capitess quai mai. Pro no esa propi tuot oter.

 

Giovannina T., Tschlin

il Chardun

revista  rumantscha independenta

CH - 7559 Tschlin

fon 081 866 36 76

IBAN CH